會訊 20240906 (Patreon)

來個 mid-week update 先。

01. 有一段日子無用 elevenlabs 嘅話音合成，因為之前覺得效果麻麻地。但回心一想，會唔會係我之前畀嘅 training data 唔夠好呢。尋晚又試咗一轉，用啲好少少嘅錄音；當然錄嘅時候亦都有刻意 chok 聲，結果出來又幾好。

02. 咁就重啟返我個英文嘅 blog 喇。之前有段日子無乜點 update ，但其實我好多時自己 take note 抑或 brainstorm ，都係用英文。唔係扮嘢。因為英文始終係成長過程中刻意去學嘅語言，而一直以來英文對我嘅用途係睇新聞，讀書，工作，所以用英文嘅時候，心態反而比較集中。反而就咁寫中文，一係就「我手寫我口」，而「我口」的確有啲累贅嘅；再唔係就糾纏啲細微枝節位，好無效率，效果亦一般。所以，我由今個禮拜起，索性成個 workflow 變成先寫英文，再搵 chatGPT factcheck, critque 同 edit ，個零鐘就寫完一篇。然後再翻譯成中文，然後再跟中文版，用自己嘅方法演繹出來，最後再搵 chatGPT 執返成文字版（加埋字幕，但個 timecode 都仲係有啲 off）。以上就係我嘅流程；咁樣做連埋前期嘅 research 同思考，應該可以做到一日一篇⋯⋯啩。

03. 如果大家唔介意，英文版內容我都會貼上 Patreon 呢度；最初整個英文版，其實都係為咗啲唔係好識中文嘅朋友。咁咪好囉，半成品一樣都有佢嘅價值。

04. 一直都想整啲普通話內容，因為我覺得我嘅題材佢哋都應該有興趣。不過已經有好多人講，千祈千祈千祈唔好撈入去依家條廣東話台，唔好搞亂演算法。所以，唯有由零開始起多條 YouTube Channel 。當然，唔係我自己讀，又係搵 elevenlabs 整。效果有啲搞笑，因為讀出來真係有陣香港人嘅除（古天樂咁）。我 train elevenlabs 嘅時候，係用英文嘅錄音，唔知點解會變成咁。或者真係用開唔同語言嘅人，發音嘅習慣真係會有好根本嘅分別。但咁講喇，elevenlabs 整我啲英文稿，讀出來都有香港 accent ，但我對 Kongrish 係完全無任何問題，但亦未至於好似坡仔咁對 Singlish 咁自豪。只不過，我覺得刻意要講英文講到無晒 accent 都真係無乜必要，我亦唔會因此感到有乜嘢自卑。I am who I am ，英美澳加到處都有人有口音，咁又點喎。

05. 講返新嘅工作流程；由於我想專注啲（我嘅 ADHD 問題年紀越大好似越明顯），所以我會一次過用英文一個系列一個系列咁寫，每篇應該由頭到尾用三、四個鐘，即係每個星期用一、兩日做呢件。然後就係中文版加廣東話嘅製作，但執篇文嘅時間就長少少，但應該都會比之前嘅八個鐘（+/- 三個鐘）快好多，相信會對我嘅產量有所幫助。所以日後呢，大家可以見到係英文版先出，然後再出中文。普通話台就隨緣喇，都無乜 urgency 嘅。

06. 可能有啲朋友 expect 我開 live ，但我真係覺得自己一條友對鏡頭講嘢，好無謂；除非係訪問有對手。財經自由講都係對談喇，都係出樣唔係出 live 。真係同觀眾有互動就 live 嗟，係咪？所以，我都諗係咪不如每兩個星期左右就 schedule 一個定時定候嘅好似 office hour ，如果大家對過去兩個星期嘅題目有咩問題，就一次過答；答得唔滿意，可以即時追問。

07. 唔怕講埋，其實我對你問我答呢個環節，我最搞唔掂嘅位，係無地方儲低啲問題。有啲人 whatsapp 問，有啲人 telegram 問，有啲人 facebook 留言問，有啲人 youtube 留言問。我有睇留言喇，但唔會記得咁多。所以，諗諗吓我不如開個 google form 之類嘅，有問題就麻煩各位行多一步，咁樣我應該會 organize 啲。希望大家可以體諒吓，我個腦同幾十萬年前嘅 hunters gatherers 差唔得好多，可以做到今日咁都要畀啲掌聲自己。人類勝過其他動物嘅地方，在於我哋會用學習同會用工具。所以，麻煩大家，有乜問題可以用以下嘅 Google Form

https://forms.gle/kiGmznNoSXEENTmu9

係咁先。