肥咗 (Patreon)

無得唔面對現實；重點係點樣去改變。近年低位係 160 磅。

其實同人比賽，定吓目標呢啲，對我都係無乜用。正面啲咁睇，我份人真係好佛系，完全無鬥心無恆心。但據說有個講法，就係 don't set goal ，build a system 。嗯，呢樣似乎對我 work 啲。

是咁的，只要每日有 500 大卡嘅 deficit，就可以平均一個星期減一磅。即係半年左右就達標。

點樣減低食慾呢？之前嘅經驗係早餐打返杯 bullet proof coffee；好多人用牛油，但我用椰子油。有一排用 MCT ，又好似真係功效好啲。然後成日最多就係一個鐘頭內，食多兩隻蛋之類。

我有一排就係咁食，然後成日都唔覺想食嘢。好多時，人食嘢都係為咗解悶，又或者習慣，而唔係因為肚餓。可能有人會話咁樣食得唔夠，又話會「壞胃」。「壞胃」呢個講法，就無乜科學根據，但唔夠就真嘅；但「體重管理」重點就係要「唔夠」，夠又點減呀？

我知有好多人會話：「最緊要做運動呀。」其實做運動唔係唔重要，但唔係最緊要，甚至對減重可以話係無乜幫助。對我自己來講，做運動係有兩個目的，一，畀我自己嘅身體知道，我嘅身體要燃燒能量，係時候攞啲儲備出來用吓。如果唔係，500 大卡嘅 deficit 好易變成新陳代謝速度減慢。我之前減重嘅副作用，就係令到體溫低得好緊要，好怕凍。只可以話，我個身體好快適應低能量嘅狀態，如果真係出現咩饑荒之類，我應該係存活得比較耐個種人。

做運動另一個目的，係要執返好個 posture ；執返好個 posture ，重點在於用返身體啲真係相對強大嘅肌肉組。我好意識到自己係用錯肌肉，所以成日都有啲炎症病症。同埋，執好個 posture 個人真係會精神啲。

題外話，有件事我到依家都係唔了解嘅，就係我嘅呼吸好慢，一分鐘平均六次呼吸。有次去朋友屋企，佢哋玩冥想呼吸，理論上大家要規律一致，但我真係跟唔到佢哋咁快，佢哋一呼一吸，我都未吸完。但呼吸慢嘅問題係，如果做帶氧運動嘅時候，我會好缺氧，好快暈，所以我唯一可以做嘅運動，就係游水，因為游水嘅時候，好接近我平時嘅呼吸方法，即係深呼吸然後慢慢放。但游水太花時間，我沖涼嘅時候又特別多 ritual ，所以有少少糾結係咪游返水。重點係，游水對我以上兩個做運動嘅目的係無乜幫助。

所以，做運動唔係帶氧運動，反而係啲針對個別肌肉組嘅 calisthenics ，例如 core 、大腿四頭肌、大股肌等。糾結緊係咪要 HIIT 去練習呼吸，我知呢個係好重要嘅 game changer。

風水佬就呃你十年八年，如果跟以上所講，三個月應該見效，半年就有結果。就當由 10 月計，即係到明年四月再睇吓成效。

Build a system ，唔係 set goal ；睇吓呢個方法 work 唔 work 。