給老闆的信 (Patreon)

你知唔知我試過留係公司四日四夜？

老闆：

法庭宣判前兩晚，我發咗個奇怪嘅夢。夢入面我返咗公司，同啲 sales 嘅同事開會，就好似以前咁。夢入面嘅我，明知係發夢，都唔介意沉醉多一陣。

瞓醒，又撞啱周末我哋呢邊嘅香港人有個聖誕節聚會。我同朋友話：「尋晚發夢返工。」

點知一個二個會錯意，以為我近來工作壓力大。

「唔係呀！返工係好開心嘅事。」

肯定連你都唔知；最初搞直播，我曾經最高紀錄係四日無離開公司，朝早去五樓沖涼再食個早餐就開工。

不過都真係好多年前嘅事；個時仲後生。

過去呢六年，反而感覺好虛幻。試過係陌生嘅環境，見返啲熟悉嘅朋友。網上見到熟悉嘅地方，桃花依舊，但人面全非。最近，又試過忽然間有種大家都知道係似曾相識嘅感覺，但偏偏要壓抑住。

由個人到世界，呢六年嘅變化真係好大。

我終於明白，原來人可以承受好大嘅壓力，漸漸都會習慣，甚至乎會好識去享受呢種肩膊上嘅重量。真正會令人失去方向嘅，係唔知道會發生乜事嘅個種無以名狀嘅徬徨。

2011年 我第一次離開壹傳媒、離開香港移民美國，你同我講話我嘅事業應該係香港，要留低先至有發展。我知以你嘅性格，如果你唔係關心一個人，你係唔會咁樣去畀呢啲 unsolicited advice 。雖然好似輕輕嘅一句，但我係好記得，亦都好感激。

有時我又會發白日夢，係另一個平行時空，假如我哋可以正正常常咁去經營公司嘅發展，究竟我哋依家會做緊啲乜嘢呢？2017 年你搵我返公司，想改革運作想用 AI 。諗返轉頭雖然行得前咗少少，但我哋有邊件事唔係咁？

2000 年你搞 adMart 嘅時候， Amazon 都係剛剛由賣書轉去賣埋其他嘢一、兩年。2006 年 YouTube 剛剛 launch ，都未有直播，你就想我去搞蘋果直播。2008 年蘋果出 iPhone 3G ，你就即刻要我哋去搞 App 。當時 Netflix 都剛剛轉型做串流，你就已經話要搞機頂盒要做 OTT。啲人都唔知乜嘢係 GPT，你就已經諗住要用AI 改革蘋果。

老闆，我成日係公司通頂，唔係無原因㗎！

你又記唔記得，2020 年我離開公司前，你想我去做一個平台去畀啲獨立嘅創作人，等可以係蘋果做內容收訂閱課金？依家香港好多人都真係靠呢個模式搵食。

就連我都係做自己內容收吓 YouTube 廣告、收少少訂閱課金；都叫做搵到兩餐。當然，點都無從前咁充實，但勝在自己可以一腳踢，加上有各種 AI 工具。經營自己用嘅時間心機，肯定遠低言之前輕鬆，彈性、機動性又強。

唯一就係無同事，自己一個人；所以我咪發夢返工開會囉。

講住咁多先。你好好保重呀。

Simon