50 歲人學到的 50 個人生道理 (Patreon)

幫你係人情，唔幫你係道理。

不招人妒是鬼才。

憤怒令智商減半。

「我唔做，一樣會有其他人做。」呢句說話可以同時解釋人間嘅至善、至惡以及不作為。

最易呃嘅人，一定係自己。

Responsibility ~ Response-ability。

好嘅師傅，先至真正做到「教識徒弟無師父」。

如無意外嘅話會有意外。

自以為面面俱圓嘅人，其實唔知道自己幾咁虛偽，幾咁乞人憎；乞人憎到連溫恭謙順良嘅孔子都話：「鄉愿，德之賊也。」

小心揀朋友，但要更小心去揀你嘅敵人。

一句比粗口更難聽嘅說話：「我都係為你好。」

你係我手下，我在你手上。

每個選擇背後，都係代價。當你乜都追求完美，代價往往亦高到負擔唔起；理性決定嘅意思係 optimization 而唔係 maximization 。

弱者先至會以為粗鄙係力量嘅表現。

雖則話：「權力腐化。」但無力感一樣會腐化，而且腐化嘅人數眾多。掌權嘅係少數，所以權力都只係腐化少數人，但無力感就可以腐化多數人。被無力感腐化嘅人，不但充滿怨氣同仇恨、思想封閉、接受唔到其他嘅睇法，亦最容易被少數人掌握權力嘅人所控制同利用。

腐化嘅組織裡面，應當通力合作嘅人勾心鬥角，但必須互相制衡嘅就同流合污。

英雄做時勢，只係因為呢個係寫故事嘅技巧；現實中，只有時勢做英雄。

當社會充斥識字嘅文盲，風氣自然係膚淺、虛偽。

自由社會嘅代價，就係日常生活必然遇到啲你唔認同嘅人、你唔贊成嘅事。

人，好自然會先見到自己想見到嘅嘢，會聽到自己想聽到嘅嘢。但，聰明人更加會聽到人哋想聽嘅嘢，見到人哋想見到嘅嘢。所以，聰明就係共感。

「好簡單啫～」每當我遇到啲將呢句說話當口頭禪嘅人，我都會諗：「一係自己好好彩，遇到不世出嘅天才；可惜更大機會係遇到啲不知天高地厚嘅煩膠。」

崇拜強人，但心底裡永遠都係弱者；可憐之人必有可惡之處。

最幸福嘅生活，莫過於可以為家人煮一餐飯。

五十歲嘅我如果可以同十五歲嘅自己對話會講乜呢？「喂，死靚仔，認真睇睇自己有冇 ADHD。另，真係唔駛急住媾女，最緊要搵多兩個錢，第日你會多謝我。」

戀不同愛。戀，好戀易。愛，就算自愛咁直接，亦唔係人人都做得到。自戀嘅人大把，自愛嘅又有幾個？

民主係愛，選舉係做愛。多數人都係鍾意做愛嘅快感，多於愛嘅「恆久忍耐、恩慈、不嫉妒、不自誇、不張狂、 不做害羞的事、不求自己的益處、不輕易發怒、不計算人的惡、 不喜歡不義、只喜歡真理； 凡事包容，凡事相信，凡事盼望，凡事忍耐⋯⋯」

將手段當結果，最終就係「做咗當得咗」 。

心智正常嘅男人，十八歲之後，都唔再相信愛情。

The world is a simulation - 就算依家唔係遲早都係。

所有預測，多少都有啲主觀願望。

最唔願意掌握權力嘅人，先至係最有資格同條件去掌握權力。

9up 當秘笈嘅機會大過秘笈當 9up 嘅機會；因為秘笈唔多，但 9up 就多過呼吸。

後現代社會學：可以唔撈就算係中產，連後代都可以唔撈，先至係真正嘅貴族。

時代嘅進步，往往來自於一啲不容於主流、不容於權威嘅觀點。

自由嘅代價，就係要接受社會一定有啲自己唔認同嘅睇法。

自己的腦自己洗。

工作嘅存在意義就係要被完成。

影響群眾，最直接就係對人不對事。

理財同養生嘅第一課，都係學煮食。

婚姻係兩個人嘅共產。

【常識統計學】真蠢同真叻嘅人，絕對上一定係少過扮蠢同扮叻嘅人。

謙到出晒面，就唔叫做謙。虛到無人見到，就真係好很虛。

我哋每個人嘅存在，單純從或然率計，可以話係接近零；所以兩個人嘅相遇，真係有今生無來世。各位善男子善女子，惜緣喇。

選擇即自由；選擇困難，因為想逃避做決定嘅責任。

一件事公唔係公道，最終睇吓究竟有幾多人會話：「呢啲咁嘅事，我就做唔出喇。」

唔自在就唔係真正嘅自由。

大多數人，大多數時候，都係睇到自己想睇到嘅嘢，聽到自己想聽到嘅說話。

假如成日都遇到好多自己睇唔起嘅人，問題可能係太睇得起自己。

橫財多數係冤枉來瘟疫去；正財就算偶爾失去預算但最終都可以搵得返。

可以製造收入嘅先至資產，要賣出去先賺到錢嘅，叫存貨。

賺大錢，最直接嘅方法係利用別人嘅貪念將風險轉移；世上唔存在「低風險高回報」嘅事。

珍惜願意為你花時間嘅人。