決戰地產黨 (Patreon)

01，上星期路透社報道話北京下旨，要地產黨堅決擁護特區政府解決香港房屋問題。結果，今個星期一開市，各大地產發展商股價就斷崖式直插。

With tighter grip, Beijing sends message to Hong Kong tycoons: fall in line | Reuters  

02，呢篇路透社都算新聞？講咗好耐喇。不過，時機上，剛好係體現愛國者治港選舉前。各位，記著，新聞政治學 101 ，新聞出街嘅時機同內容，多少都會透露出推手啲動機。

03，之前又有好幾篇報道話，北京講到明唔畀同一個家族有多過兩張選委票。但其實如果大家係熟悉選委同功能組別操作，就知道每個家族間接可以影響嘅票，可以係一百幾十票。記唔記得 2012 年梁振英對唐英年？誠哥堅持撐唐英年，結果梁振英就算贏，亦都只係得 689 票。

04，但大家又有冇諗過，整治地產黨呢一幕，其實早在廿年前就埋下伏筆？

05，首先，返去最基本嘅一個問題：「鬥地主，係唔係為大群消消氣呢？」又或者：「鬥地主，係唔係透過製造階級敵人，打擊小眾，團結大眾？」我就唔係咁認為；至少係香港，近年地主其實都非常之小心處理民意。鬥地主可唔可以降低民怨，絕對係一個 testable 嘅 hypothesis。假如真係要拉一派打一派，大把對象喇，例如元朗。

06，「你咁講又唔啱喇；過橋抽板，以後仲有人幫你賣命？」地產黨，其實自七、八十年代至今，何嘗唔係誠惶誠恐，聽聽話話？從政嘅人眼中，根本沒有絕對嘅忠誠，沒有永遠嘅朋友，只有利益，才是永恆而真實。

07，今日如果你只係記得一件事：「分析任何政治，第一件事就係睇 coalition building。」

08，Coalition 換句話說就係共同利益。共同利益之間，甚至唔需要有任何白紙黑字契約。默契，就係大家心知肚明乜嘢對大家長遠有好處。

09，自從七十年代，大陸確立嘅方針，就係只要人民有飽飯食，就唔會作反，就可以繼續四個堅持。由 1986 到 1989 年，以及之後鄧小平南巡再到江澤民時代，都係貫徹「發展是硬道理」，亦即係以上所講嘅共同利益。

10，講得再白一啲，北京嘅統治，建立於人民普遍相信「未來好過以前」嘅承諾。任何人只要可以幫到北京去達成目標，都係共同利益嘅一部份。

艾敬：我的 1997 | Youtube 

11，1997 年之前嘅意義，大陸人嚮往香港嘅生活；甚至當年有位歌手叫艾敬，都唱話 「我的 1997」，要來香港。我相信唔少大陸人覺得， 1997 之後可以成日落香港：

1997快些到吧　八佰伴究竟是甚麼樣1997快些到吧　我就可以去HONG KONG1997快些到吧　讓我站在紅勘體育館

12，當年北京提出一國兩制，我哋以香港本位去睇，就梗係以為要來畀我哋呢班人可以安心接受「回歸祖國」呢個事實。對唔住，呢個睇法錯晒。其實，一國兩制係北京要來保護牆國裡面嘅世界不變，但又可以享受牆外世界帶來嘅物資。

13，即係話，一國兩制要來保護嘅，係一國，同埋一國所堅持嘅制度。北京眼中，香港原有嘅制度，有用嘅咪留，無用嘅，就要廢。一國兩制，從來都唔係一個承諾，而係一個安排。

14，對香港舉足輕重嘅地產黨，七、八十年代被奉為最重要統戰對象，除咗係為咗順利收返香港，亦都係要佢哋嘅投資。

15，港商投資大陸，唔可以話邊個得益多啲大啲，更加唔應該抱住一定賺錢嘅心態。事實上，就算係港商返大陸，有人賺錢但亦都唔少輸錢離場。本來，市場貿易，互通有無，買賣雙方嘅關係理應對等。但某神奇國度真係唔係咁諗嘢：「畀生意你做，係你帶挈你賺錢！」「見同你咁熟，先至賣咁平畀你。」

16，1997 年亞洲金融風暴之後，香港五勞七傷。過多兩年，大陸加入世貿，香港嘅存在又少咗一個功能。不過，當時我哋就同自己講：「香港仲有合約精神、普通法、司法獨立、法治、自由市場、聯繫匯率⋯⋯」無錯，以上咁多因素加埋，令香港繼續保持國際金融中心地位；一場亞洲金融風暴，的確打我哋唔死。

17，如是者，又過幾年；江澤民退，胡溫上。2002 年一換屆，第一件事就係要香港「廿三法立法」。記唔記得當年邊個反對廿三條立法？法律界？蘋果日報？唔好忘記，仲有自由黨嘅田北俊。田北俊，亦係香港地產黨嘅代表；咁，大家見到個圖像又會唔會清晰啲呢又。

18，話說 2003 年之後，自由黨雖然以「壞孩子」自居，幻想都仲係一家人咁解。但其實不斷被淘空。 2008 年田北俊、周梁淑怡立法會選舉雙雙落敗；佢兩位有 class ，同時辭去黨內職務。當時有個叫李大壯嘅深圳商人，配合中聯辦，打算佔領自由黨。另外，林健鋒、梁劉柔芬、梁君彥等三個由功能組別選出嘅議員，又退出自由黨。結果，地產黨並無支持李大壯。2012 年，田北俊「邊度跌低就邊度企返起身」，從新東出選再入立法會做多一屆議員。

19，今日睇返轉頭，早在 2008 年北京已經提出「第二支管治力量」。撰文嘅曹二寶雖然只係中聯辦嘅研究員，但發表嘅平台係中央黨校嘅《學習時報》；而當時中共中央港澳工作領導小組嘅組長，咪就係習近平囉。所以，呢個方向，係北京嘅立場。

20，時光倒流 2008 年嘅時空，假如你係香港幾大家族嘅其中一份子，過去三十年來都有用唔同方法向北京「溝通」，換咗一個新嘅人物，理論上都係照從前規矩，係咪？習近平之前，係曾慶紅；以前點樣 engage 曾慶紅，跟著咪點樣去睇習近平台戲囉，係咪？

21，好明顯，呢幾年香港嘅財閥同北京，開始出現矛盾。有人話曾慶紅仍然有影響力，江派喎。呢啲我就唔深入講，正如上面所講，我唔相信政治有永遠嘅朋友。乜派物派，究竟係憑乜嘢去維繫忠誠？結論咪又係同共利益。所以，直接從共同利益去分析就好，唔好畀啲名相擾亂思考。

22，2012 年嘅行政長官選舉，係地產黨第一次措手不及嘅衝擊。當時，主流都以為，家族係愛國廠商，做過議員，又做過官，個 profile 靚到不得了嘅唐英年，一定會坐定笠六喇。結果，輸，都唔緊要，係個過程真係完全不留情面，仲差少少就犯官非要坐。假如我係佢，午夜夢回都會反問一句：「究竟係官廷政治本身就咁殘酷？定係自己得罪咗人都唔知？」

23，梁振英執政嘅日子，同過去最大嘅分別，就係各路人馬示忠嘅方式變得更露骨，更著跡。何解有呢個現象？最簡單直接嘅解釋，就係最高領導人嘅風格，鍾意呢種咁嘅個人崇拜。當然，你見大陸其實都有呢個現象。不過，從系統、環境嘅角度分析，有理由相信係 communication breakdown；亦即係話制度內嘅信任都出現崩潰，有乜嘢要表達都好，一定要用最誇張嘅方式去表達 committment 。

24，如是者，梁振英一收到風話北京要搞一帶一路，香港做乜都一帶一路；雖然當時個個都唔 Q 知一帶一路關香港乜事。一帶一路，其中一個地緣政治考量，就係要突破美國借太平洋島鏈對中國嘅圍堵。其實 2012 年奧巴馬話「重返亞洲」，之後習近平就講一帶一路；兩件事有好緊密關係。

25，可能 2012 年嘅北京眼中，香港其實淨低嘅功能已經無幾。自從習近平做中央港澳工作領導小組組長開始，香港財閥同北京嘅關係，似乎越來越疏遠。大家記唔記2015 年底「別讓李嘉誠跑了」呢篇文？其實去到呢個時候，似乎都已經將地產黨問題定性。

26，如果我無記錯，溫家寶最早提出香港「深層次矛盾」，應該係 2010 年 3 月。之後呢五隻字，就各自解讀，你鍾意話係乜都得。不過，首次將呢個問題講到係地產黨嘅原罪，應該係 2010 年 12 月一篇《金融時報》嘅評論「香港模式的瓶頸」。作者羅天昊，乃黨媒《求是》顧問。點睇呢篇都係出口轉內銷，特登寫畀你班香港人睇。

27，我哋一般小市民，唔會感受到地產黨誠惶誠恐嘅神經緊張；但其實佢哋經常收到電話。黨媒每次出手，地產黨都會評估，究竟係針對李嘉誠，定係人人有份。以我嘅理解，佢哋認為自己絕無二心，只係想繼續派對，所以乖乖地，靜靜地做人，應該無事；北京唔妥嘅，就只有李嘉誠，而且亦唔係完全唔妥佢，只係有個別人士，好似唔信佢嘅忠誠。

28，以上呢種「只要聽話就唔關我事」嘅 wishful thinking，可以係好致命嘅自負。聽話？騰訊聽唔聽話？唐英年聽唔聽話？記住，政治唔係講忠誠，係講你有冇用；後現代嘅 Machiavellian 如是說。

29，比起梁振英 vs 唐英年 ，林鄭月娥 vs 曾俊華呢一役，應該加速北京對香港嘅不信任。話說，當日其中一個講法係：「其實如果你哋當日 831 決議你哋收貨，至少香港人都可以一人一票 endorse 曾俊華吖。」

30，要知道，任何一個司長以及重要嘅政治任命，都一定經過北京嘅 vetting；所以唔存在話曾俊華美國讀書所以係番鬼仔，北京唔會信，呢類榕樹頭解釋，真係聽吓就算。

31，大家記唔記得曾俊華由辭職到得到確認，搞咗近一個月；何解？就梗係當時北京要考慮點樣處理呢件事。結果處理方法係梁振英唔選，由林鄭月娥去馬。今日另外一個大家要記住嘅政治常識，就係政務司司長呢個位主要功能係後備；即係假如行政長官有乜依郁，就由政務司司長暫時頂上；記住，係暫時。

32，當然，後備有時頂頂下又會做落去；但當年做後備，即係本來唔屬正選。曾蔭權、林鄭月娥，都係後備變正選。董建華、梁振英呢類，就係任務好清晰嘅首選。即係話，下一屆如果換走林鄭月娥，似乎意味呢個角色，將會要為北京做一場大龍鳳。當年董建華嘅最主要任務，就係推政治問責制，削弱政務官制度。至於梁振英，就係令西環干預更加深入。

33，話說回頭，曾俊華參選代表 Anyone but CY 嘅政治力量；當中有李嘉誠，亦有香港專業界別，甚至又見到田北俊。從歷史嘅 perfect hindsight 去睇，一場曾俊華有得贏嘅選舉，其實都超出北京嘅安全系數。所以當年 831 決議，有理由北京睇死唔到過，提出來等你哋自己否決。呢個講法，亦都解釋咗當時建制派點解會「等埋發叔」。其實成件事，一言以蔽之，就係唔想過。

34，2014 年後，其實不論係香港抑或國際局勢，都越來越緊張。北京亦越來越強調國家安全，亦成立中央國家安全委員會。2017 年十九大，係另一個重要分水嶺，令黨、國更密不可分。如果將以上嘅 33 點連結，其實去到呢一步，都知道北京係點樣睇任何影響到香港嘅力量，包括香港內部本身嘅影響力。最初討論逃犯條例，商界話影響營商環境；大家記唔記得大劉？

35，「你班地產黨都無幫特區政府處理 2019 年至今嘅社會怨氣；一日都係你哋太有錢，所以年青人唔高興。唔高興就唔愛國。唔愛國就⋯」呢個最新嘅講法，其實一啲新意都無。而 2019 年呢隻死貓，亦大到無一個人可以啃得落。當然，最終「外國勢力」會承受一切嘅罪名；但如果好使好用，要來再 consolidate 權力，亦未嘗不可。記住，忠誠，既無法量度，亦無法驗證，所以示忠永遠都只係自欺欺人。

36，「政治就是共同利益」好多人以為，錢，就係共同利益。不過，對今時今日中南海裡面班人，錢，佢哋要幾多都有。所以，佢哋眼中，財閥又算甚麼？仲用上世紀嘅眼光去睇，一定錯晒。

37，有句說話，我呢世都記得：

擁有財富，好大責任；有權力而唔需要負責任，先至係最高境界。最貪心係可以動用資金，動用 other people's money，而唔需要動用自己嘅財富。

38，換句話說，共產，其實都係殺雞取卵，要你不斷輸送，慢慢收割，先至係最終目的。要做到呢一點，辰時卯時就要用行動話你知，邊個係庄，邊個係閒。

39，再講，北京統治香港咁多年，又點會唔知，政府就係唯一最大地主？解決香港房屋問題，認真便輸。

40，最後，順手貼返上個月寫嘅兩篇文隨筆，畀大家做延伸閱讀：

總加速師的分配再分配  

共富在香港