人與人之間最適合嘅距離 (Patreon)

無論係做父母，做政治領袖，抑或簡簡單單做一個人，首先都要識得尊重其他人嘅決定。

「我尊重你嘅決定。」大家要留意呢句說話裡面，尊重嘅對象，係個決定，而唔係個人。

尊重係對事，唔係對人；但某啲文化之下，對身份嘅尊敬，變成對決定嘅尊重；兩個完全唔同嘅概念，被搞錯晒。

《被討厭的勇氣》呢本書入面，好重要嘅一個訊息就係：「所有問題都係人際關係問題。」其實人與人之間，如果有清晰嘅界限（boundary）；分清楚事件係邊個承受結果，決定就由邊個去做，好多矛盾都會自然化解。呢個亦係書入面所講嘅「課題分離」。

今集 Podcast 我除左分享《被討厭的勇氣》嘅導讀，亦都會同大家講吓當年我初為人父所學到，至今都仍然記得嘅做人原則。

被討厭的勇氣 | 利世民 on Patreon