時光倒流七十年 (Patreon)

見到新聞報道標題話：「香港出口貨值錄得七十年來最大跌幅。」但究竟呢個「跌幅」代表乜？經濟差？出口疲弱？供應鏈重組？

但就因為「七十年來最大」呢六個字，令我「的起心肝」搵返香港過去七十年來嘅貿易數據，然後發現咗幾件事：

01，過去七十年幾來，香港絕大多數時候都係錄得出口增長。雖然每三幾年，偶爾有一、兩個月嘅跌幅，但以全年計，七十年來就只有十一年錄得出口貨值下跌。呢十一次出口貨值下跌，都係代表經濟衰退，而當中有十次，同時連進口貨值都下跌。

02，1954（圖示 1）我見好多歷史書都話呢次衰退，相對溫和，主要因為韓戰後美國政府緊縮開支。但如果單從數字上睇，呢次衰退對香港嘅影響，拍得住「亞洲金融風暴」以及「2008 次按爆破」。更有趣嘅係，我翻查 1952/53、53/54 年香港政府嘅紀錄，當然嘅殖民地政府竟然錄得大額財政盈餘；當時嘅財政司 Clarke 甚至要成立香港第一代嘅「未來基金」，當中嘅儲備足以香港一年嘅開支。

03，1957-58 年（圖示 2）呢次衰退，原因係 H2N2 大流感。不如大家又估下，呢次病毒源頭係邊度？由於某國當時又係無向國際社會通報，結果當病毒傳到世界各地嘅時候，已經係大爆發。呢場流感導致嘅死亡人數，最高係四百萬人，最少係一百萬。香港由於背靠某國，當然亦係首當其衝。呢次感流做成嘅全球經濟損失，都幾嚴重；單係美國都陷入長達八個月嘅衰退，GDP 收縮 3.3% 。

04，1961 年（圖示 2）嘅經濟衰退持續十個月；主流嘅講法話因為聯儲局收緊貨幣政策。但要知道聯儲局主動去宏觀經濟調控，係 1970 年代先至確立嘅事。究竟當時係乜嘢原因導致呢之衰退呢？我搵咗好多唔同嘅講法；結講就係無一個具說服力。

05，由 1961 到 1998 年，三十七年間只有一次明顯嘅衰退，就係 1975 年。其他比較差嘅年份，就有 1967、1985 年；但所謂比較差，意思亦只係話得出口貨值只有個位數字增長，但仍然係增長。

06，1961 年後香港只有三次 GDP 收縮嘅紀錄，就係 1998 年（亞洲金融風暴）、 2009 年（美國次按危機）以及 2019 - 2020 。要注意係，最近一輪，係未爆疫情已經出現衰退。

07，1997 年之後，香港經濟的確比以前更顛簸。我知好多人都一定會話，梗係因為主權移交。但實情係連美國嘅經濟都明顯多咗波動。亞洲金融風暴（1996-1998）、科網泡沫爆破（2001）、次按危機（2009 年），都真係唔可以賴神奇國度；實情當時神奇國度都未有咁大嘅影響力。

08，但係自從 2015 年嘅個次（圖示 8），就真係因為神奇國度嘅影響。2015 、2019、2020、2022 四年，香港不論進出口貨值都下跌；GDP 增長亦明顯比之前更差。

09，神奇國度由 1997 年起，漸漸成為香港輸出服務最重要嘅地方。1995 年，神奇國度佔香港整體服務業輸出嘅 16.2%；2005 年升到 24.3%；到 2013 年嘅 40.6% 。班九品芝麻官雖然成日話背靠祖國優勢，但實情香港向中國大陸輸出服務賺到嘅錢，亦係呢幾年見頂。由 2018 年起至今，香港從輸出服務到中國大陸賺到嘅錢，已經大跌到得返 2007 年嘅水平。三年間，香港從大陸賺取嘅服務輸出收入，急速蒸發 70% 。

10，「梗係因為 __ 暴嚇被人喇！」咁不如我哋又睇吓，香港對美國、英國、德國甚至台灣嘅服務輸出收入有冇變？結果係呢四個外國勢力，仍然支撐住香港嘅服務業收入；金額不但無減，反而有輕微上升。

11，所以，香港呢次嘅衰退嘅「外圍因素」，究竟係因為中國出口差？定係美國需求疲弱？甚至兩者都有啲關係？公道啲咁講，對比香港同新加坡，其實兩個地方過去幾個月嘅外貿數字同香港嘅走勢都係相約。

12，但另外一點我留意到嘅係：香港以及中國大陸一直都係新加坡好重要嘅貿易伙伴，而且新加坡出口到香港以中國大陸嘅貨值金額，長時同都係同步增減。但由 2013 年開始，見到新加坡直接出口到中國嘅貨值金融，開始多少少，現象持續到今。

13，我估計，好多出口到中國大陸嘅貨物，過去都會經一經香港；但去到 2013 年之後，直頭呢步都慳返。當然，呢個現象都好自然，我亦唔係話新加坡搶香港嘅生意。只不過係，啲官員成日話「超級連繫人」，佢哋其實有冇諗過呢五隻字嘅意思係乜？

14， 講返「出口貨值錄得七十年來最大跌幅」；單一兩個月，其實唔需要擔心。但問題係，進出口貨值其實自 2019 年起，除咗 2021 年，四年內有三年係負數（即圖示 9、10、11）；貿易表現差到咁，真係七十年來首次。

15，七十年前，係冷戰開始；七十年後，又係。雖然某國嘅外交部成日話，唔好用冷戰思維，但究竟邊個先係最冷戰思維？大家心照喇。上次冷戰，國際對中國禁運；如果根據野史，有啲人尚靠走吓水貨搵到第一桶金。但今時唔同往日，國際社會仲係唔係可以對香港隻眼開隻眼閉呢？

16，過去既香港，雖然未至於係一帆風順，甚至乎天時地利人和都好似欠少少，但總算可以存活於大國之間。有好多次，香港嘅命運幾乎要改寫。例如羅斯福如果唔係打完仗死咗，杜魯門又唔係睇唔起蔣介石，話唔定美國早就迫英國 1945、46 年同國民政府傾。假如當時英國同國民黨共治香港，1949 年解放軍亦可能從深圳開落新界。

17，如果唔係韓戰爆發，美國亦唔會忽然咁重視亞洲嘅據點。當時本來係想將全副精力放到歐洲；結果守住香港同台灣，係要來牽制中共同蘇聯。

18，1960 年代中共同蘇聯反面之後，尼克遜同基辛格好快就背棄台灣，以換取中共嘅中立。所以，好多人話戴卓爾出賣香港，但實情用香港做籌碼嘅係美國。香港戰後借來嘅時間，借來嘅空間，主要係因為大國搏弈。

19，Richard Huge 寫嘅 Borrowed Place Borrowed Time ，早在 1976 年成書；你估以當時嘅氣氛，啲人唔知香港遲早守唔住？當時戴卓爾都仲係在野黨，唔知自己會唔會有機會做首相。

20，1978 年之後，大家都好天真咁諗，以為時間可能會改變得到某神奇國度； 呢個神話，一講就成四十年。

21，神奇國度最出名，就係個種對變嘅抗拒。2018 年後，大家甚至可以見到，神奇國度嘅統治者為咗鞏固權力結構，會不惜放棄幾十年來嘅繁榮。好多人都唔明，點解過去幾年北京好似不可理喻。

22，其實中南海只有兩個最大嘅恐懼，一就係權力核心裡面嘅矛盾，分裂；第二，就係地方同中央嘅矛盾，分裂。中共嘅兩個恐懼，亦可以混合咁出現。

23，點解中共唔可以容許有人富可敵國？其實呢啲人未必有異心；但假如權力核心一旦出現裂痕，富可敵國嘅人為自身嘅利益是但搵一邊企，結果都會破壞呢個結構嘅平衡。所以，唔畀呢啲科網企業海外上市，根本唔係驚佢哋會洩露國家機密；試問補習 App 、外賣 App 可以掌握得到啲乜嘢國家機密？真正嘅問題，係以上所提到嘅「安全系數」問題。

24，同理，點解要打壓地方嘅文化同語言？唔係話上海、湖南、四川會獨立，但又係假如一旦中南海真係出現權力結構嘅裂痕，地方嘅勢力就會成為分裂嘅力量之一。呢個情況，晚清都發生過。我亦都幾肯定，今時今日中南海嘅一干人等，好清楚知道呢個中國政治千百年來嘅潛在危機。

25，以上種種，其實先至係中共所講嘅「國家安全」。過去幾年破壞金融市場，對地方以強力執行各種社會控制，我會話係 it’s a feature, not a bug 。如果咁樣去理解七十年來最差，一切就變得順理成章喇，係咪？時光倒流七十年，嘅係世界回到冷戰狀態，亦係中共回到 1950 年代，剛剛奪權後重整權力結構嘅過程中，各種光怪陸離嘅現象。