【是日隨筆】 選舉 (Patreon)

據說，大陸同美麗新香港，都刻意淡化臺灣呢次選舉。

原因好明顯喇：「沒有比較就沒有傷害。」

就選舉文宣而言，從傳訊嘅角度去分析呢條片，雖然手法上都幾刻意，但清楚講出要講嘅說話，將民進黨目前嘅選情用交代畀自己嘅支持者知，亦無睇低自己嘅支持者，無話畫公仔畫出腸，算係唔錯。

牆內任何一個政工作者，唔理佢係北京班中央，抑或地方政府，只要佢哋當中有人可以話講一句人話，只要試吓講到一句咁多，我都覺得係奇蹟中嘅奇蹟。

假如佢哋連「人話」係乜都唔知，咁真係幫唔到佢囉。再講，假如有人認為牆內中央班人係蜥蜴人，我都唔怪有人會咁諗。

至於賴清德同蕭美琴，佢哋又係唔係好優秀呢？最低限度，佢哋可以講得出人話，成條片都好直接咁講：「臺灣唔係牆國。」

臺灣雖然唔係十全一美，但臺灣就係臺灣。

依家民進黨所關心嘅，已經唔係贏唔贏得到總統大選嘅問題；民進黨嘅計算係要贏埋國會。

之前有睇過一本書講台灣嘅地方政治操作。根據呢本書嘅講法，去到鄉下地方，基本上唔係睇你嘅政見立場，而係睇班里長點吹雞。里長，基本上係可以用錢解決嘅問題。

再講多次；之前我話，唔好沉迷選舉政治，唔好睇到選舉結果好大件事，只係想大家明白，健全嘅社會，唔係建立於任何一個人，而係建立於制度之上；只有當越多人能夠明白呢個道理，先係可以擺脫個種封建嘅帝王思想。

咁唔代表我話選舉政治唔好，而係選舉政治唔係萬能。

但我亦都好明白，唔少人仍然擺脫唔到偶像崇拜；佢哋會覺得，自己鍾意嘅政工作者輸咗，一定會天下大亂。

聰明嘅你應該睇到，極度狂熱於呢種信念嘅人，並非真正信任民主嘅精神；呢種人只係見到自己見到嘅世界，覺得自己信仰嘅價值觀先係主流、正統，佢哋信嘅係少數服從多數，信嘅係多數人暴政。

但仍然有人會堅持：「選舉嘅結果好重要㗎；如果國民黨贏咗，就會出賣臺灣㗎喇。」呢種辯論方法，叫「打稻草人」；賣臺，就係「好嚴重嘅結果」，就係稻草人。好多人思考嘅時候，會不自覺用咗呢一種方法去分析問題，最終連自己都呃埋。

首先，國民黨贏唔贏到先？再講，如果贏到嘅話，咁係咪代表臺灣人嘅意願呢？如果贏到嘅話，之後甚至支持歸順，咁又意味啲乜嘢呢？

千祈唔好誤會，我唔係話支持臺灣要順歸大陸。我嘅意思係，如果咁驚有機會畀國民黨賣臺嘅話，咁又會唔會寧願唔要民主選舉？會唔會只要有一個反對統一嘅政黨永遠執政，就係好事？

一個自由、開放嘅社會，一定有人睇法同自己相反；最緊要係，那怕執政嘅人同你嘅睇法完全唔一樣，你都可以好好咁生活；呢個就係民主嘅定義。

所以，如果你真係相信民主，就應該唔會咁緊張選舉嘅結果，明唔明？其實呢個只係一個好簡單嘅邏輯。但又話說回來，雖然政工作者嘅偶像崇拜都幾普通，但最神奇嘅地方在於，一個真正完善嘅民主社會，對以上呢種民粹主義都有一定嘅抵抗力。

但究竟點解呢？梗係有得解嘅，遲啲再講 😛