[重磅!必看!]風水上都有因果? (Patreon)
Content
今日這個題目怪怪的?風水上都有因果?其實正確啲講,係術數師既因果,但都同大家有關係架喎,點解呢?
話說我有一個好朋友,都訂閱咗我呢個patreon的,但有好友叫佢開心些牙,朋友沒法子推郤,就些牙咗俾佢了。
咁又點呢?係咪唔些牙得架呢?其實對於我嚟講係沒有所謂的,因為我喺呢件事上的因果關係已完結,我收取了你的訂閱費用,我付出了時間和心思,去提供一些風水佈局及資訊給各位已訂閱了的朋友,師傅的責任已完成。
好了,咁如果你訂閱咗,又開心些牙咗俾人,有咩問題呢?呢樣就係涉及了因果了。
你付費訂閱,本質是來自用,你自己會得益,在財運和工作運上有獲得好處。
但其他人沒有任何付出,而你郤無私地些牙了給他,他從而獲益了。
他在這個空間獲益了,即是說,他在另一個空間,拿取了利益。哪,他所獲得的東西,獲得的好處,在哪個空間所取得的呢?
咪就係些牙俾佢嗰個囉。因為你,佢才獲益。如果不是你些牙,他不會突然得益。
咁因果因果,你的朋友得益咗幾多,係咪會取走返你幾多呢?答案是唔知。因為每個人的福報都不一樣,拎幾多?拎乜嘢?幾時拎?完全由個天決定。
呢啲都係老師的教悔嚟。
記得以前啱啱學風水,年少氣盛,以為自己好勁,人哋有問題有疑難,第一時間衝出去,又風水又八字,幫人解疑,有時連利是都冇收。結果有一次衝出去幫完人搞化是非,自己就大病了一場。
自此之後,師傅好少自己衝出嚟做架兩,自己屋企人就緊係例外啦。所以大部份時間,就算聽到別人有問題,我都唔會主動喺風水層面作出幫忙,但內心就好想你快啲開口問我,開口叫我幫忙。但有時可能緣份未到,我或許未必可以幫到你,又或者你已另有一個心中的人物可以幫到你吧。
你又會問喇,咁我走去捐錢去慈善機構,幫到人,咁係咪又有因果問題,會有報應架?咁又唔同喎,因為你拎個銀包出嚟,一心諗住幫人,意向已不同,對方得益,你付出了時間同金錢,在因果上你已付出,而且做善事是行善積德,何樂而不為呢?
咁喂我朋友個個月係咁些牙俾佢另一朋友,咁點算好呀?佢真係得益咗喎,係咪會好大鑊架?咁我都都唔知架,有乜可以做?可唔可以繼續些牙架?我真係推唔到喎。
可以的。
第一,你些牙完俾佢,自己去捐錢;
第二,你些牙完俾佢,佢得益後,叫佢捐錢;
第三,已經些牙咗好多次,佢已獲益了很多次,自己快啲去捐錢;
第四,唔再些牙,叫佢自己訂閱,又或者叫佢自己去跟其他師傅學啦,自己學識咗咪可以自己得益囉。
其實我哋做術數的,好多時接觸很多因果的關係,例如,喂師傅,贈兩句丫,我而家唔會睬佢架喇。如果大家有叫師傅做過嘢,師傅唔記得問你收錢,又或者你唔記得問師傅收幾錢,記住主動問返師傅,因為有時我唔記得,或唔好意思推,我幫多你幾次,我都可能好快早登極樂。
~本集完~
Files
Previews only