夾萬應該放咩位好？ (Patreon)

昨日去客人新居睇風水，睇到最尾時段，我問客人有冇什麼問題呀？佢諗咗一陣，問我夾萬應該放咩位。

一個夾萬，金屬造，正正方方，裡面全部都係貴重嘢，可能係現金，可能係首飾，也可能是一大堆金條。總之就係重要嘢，唔可以隨便放埋一邊，或者唔能夠放喺當眼地方。如果放喺當眼地方，賊人入到嚟，都唔駛搵，直接成個拎走慢慢搞。除非你搵拉爆螺絲鑲死，咁佢就難於下手。

咁鬼麻煩，點解仲要放個夾萬在家中？放喺銀行的保險箱咪得囉。

因銀行保險箱，而家似乎好難申請。

咁風水學上，有冇話擺喺咩位置最好呢？咁首先，唔好放當眼位置啦。

咁一打開房，斜角嗰個明財位呢？啱唔啱放呀？

嗰度一早放咗張床喇喎。

有一派學說指，夾萬係招財之物，擺啱位，會吸財。

所以一定要放喺明財位。

我攞個羅庚一格，嗰個所謂明財位，最好用嚟做書枱位置，俾客人放電腦工作之用。

放呢啲物件，梗係要開個星盤先啦，嗰個所謂明財位，其實可能暗藏凶像。

客人新居，坐辰向戌八運屋，房間中之乾宮為吉星一白加八白的位置，放一個夾萬，是最理想之地方［因為間屋冇其他財位了］，咁啱又是衣櫃之下的地方，夠隱蔽，不易被賊人發現，所以就提議客人將其夾萬放在這位置了。