聚寶盤的製作方法及使用說明 (Patreon)

一睇到呢個題目，你會諗，師傅，不如你自己監制，跟住拎出嚟賣啦。

師傅呢，好少賣嘢嘅，係都只係會幫啲客人去人哋舖頭買，仲要平好多嗰啲；而自己搵廠整，跟住再加持，賣貴一百倍嗰啲，師傅唔會做的，所以冇嘢賣，又唔會遊說你去買嘢。

講返呢個聚寶盤，其實說到底，就是將一個五行正確的東西，放在家中或辦公室中的財位，令到呢個空間（差啲講咗處所添），佢嘅五行氣，有催財嘅效果。

呢個方法，好多人都識，你上雅虎谷歌，都一樣搵到，記住，呢個係坊間師傅的做法，我會有個我自己的方法，之後會講。

首先，買一個圓型，陶瓷造，矮而闊身的兜先，呢個五行屬土的；

然後，買一大堆水晶碎石，以黃色白色再好；

加多一粒圓型的大水晶；

預備大量真錢，紙幣錢幣。

做法係咁，將紙幣及錢幣，由細到大排列好，放喺個陶瓷兜的底部；

放大量的水晶碎石，放到大概３／４個兜多啲的高度，要冚住啲錢；

再將大圓型水晶球放上啲水晶碎石上面。

將呢個擺設，成個放喺原局財位度。

如下圖（網上圖片，不過佢用了粉紅色的晶石，唔好跟啊）

好喇，如果你係師傅嘅客人，點解好少叫你做呢舊嘢呢？

因為師傅認為，以五行角度，呢舊嘢未必能有催財的效果。

點解呢？

五行嚟講，以水為財，成毎設定都冇水，何來財俾你催？

而原局財位，你又要啱八宅的天醫位，該位置在飛星九宮中，又要啱五行，即係，如果你原局天醫係木火旺，你放呢舊金土的東西落去，就會打晒交，唔方唔催財了。

而且，呢個設定，陶瓷兜係屬土，錢幣係屬金，水晶係屬火土，紙幣係樹木做，帶點木氣，催財力量不足，而且成舊嘢火土成份最多，水則為財，即係土尅水，咁點會對財運好呢？放呢舊嘢時，要好小心，唔係就真係多得佢唔小。

師傅我嘅版本係點架呢？

一樣係放喺原局天醫嘅位置，但該位置必定係要土金皆旺的，但最好避開二黑五黃及七赤星，因為唔係個個都啱用，用六白八白就最理想了。

一樣係搵個同樣嘅陶瓷兜，只需預備大量的錢幣，然後將佢放晒落去。

如果你有心機放，可以沿住個兜打圈咁將啲錢幣慢慢排靚佢，如果冇時間就就咁放晒上去就可以。

一來，乎合天醫財位放聚寶盤原則，二來，該位置加強了土金相生的效果。

但缺憾係，仍然冇水，所以必定要喺第二個位置加一些有水的催財佈置，這又是第二個課題了。