師傅之養生之道 (Patreon)

如果大家有follow開師傅的文章, 眾所週之, 師傅細細個, 身體係好差嘅.

而家叫做有啲好轉, 由本來一年有幾次大感冒, 每次都要食強力抗生素先好返

到而家, 就算傷風感冒, 可能會自己好返, 或者食一兩碗中藥就好快好

呢樣嘢, 遲啲慢慢share下, 因為有好多師傅睇完嘅書, 又覺得幾有道理幫到的, 可以分享一下俾大家

點解要講健康? 又話講風水?!

其實之前有講過, 因為人本身的身體, 也是一種風水, 你的五臟六腑全是與五行有關

萬一你身體突然間有唔舒服, 梗係陰陽五行有某啲地方失衝, 所以會搞到你病

我係指無論少病或大病

我喺FB又講過下, 話有啲人覺得師傅生得好年青, 完全唔似一個風水佬應該有嘅年紀

我自己就唔係好覺, 因為都睇住自己一日比一日老去

但點樣令呢樣嘢減慢呢?

首先, 我由細細個開始, 就已經早睡早起, 係呀, 不自覺嘅一種習慣嚟

我讀中學時都仲係十點至十點半瞓覺, 早上六點左右就會起身

讀到大學嗰陣都係咁

我記得有一次, 去理大的診所睇病, 我都好少去的, 不過嗰三年大學生涯裡面, 我好似去過一兩次, 其中一次個醫生問我, 你有冇好夜瞓架? 我話, 平時十點幾瞓囉... 個醫生問我係咪香港人嚟?! 

其實我當一刻唔係好明, 因為我從冇了解過同學的生活習慣係點, 丫原來自己同香港人的習慣係好唔同架喎...

直到出咗嚟做嘢, 都係keep住十點半至十一點就瞓

因為我冇乜嗜好, 唔會打機聽歌睇電腦都通頂

十一點前, 冇乜嘢做, 咪去瞓囉

記得有時同啲同事去唱K, 唱到十點零鐘開始打喊露, 俾啲同事笑我...

我諗長期早瞓, 其實係可以令到你個人減慢衰老

另外, 師傅係一個, 唔係好鍾意食甜嘢嘅人嚟

呢樣係冇專登去戒糖, 我本身就唔係好喜歡甜食, 原來年紀大咗, 出咗好多報告, 話涉取過多糖份, 其實係對身體有壞處

師傅, 講呢啲, 咪等於阿媽係女人?

可能係啩, 但又唔係個個人都可以做到

師傅係唔鍾意食飯的, 所以食餸多過食飯, 咁樣汲取糖份, 又會減低啲

不過自從來到澳洲後, 汲取糖份嘅機會, 比起以前大咗好多, 所以而家變咗, 要成日警愓自己, 唔好食咁多甜嘢

仲有, 其實呢樣係最重要的, 就係令到自己心經開朗, 唔好俾週遭嘅壓力, 令到自己情緒出現問題

呢啲壓力, 喺香港, 或者澳洲都係, 就係工作壓力

現代人工作壓力, 係十份之巨大的, 尤其係而家, 你個whatsapp一响, 老細搵你, 即時彈起身, 無論係WFH定係星期六日, 跟住叫你限期前要交乜交乜, 個限期仲要係即晚

呢啲就係工作壓力, 加上一啲負面情緒, 例如人與人之間, 相處時的不快

我哋要盡量令到呢啲問題消失, 唔好長期比呢啲嘢影响自己

唏, 講就易, 做就難丫嘛, 師傅!

係架, 從來, 想健康, 比起想唔健康, 係來得困難

呢幾樣就係我的主要養生之道, 令外, 我都有去做運動的, 做乜都好, 去郁下出身汗, 就好好架喇

今日講完養生之道, 遲啲會講下, 點樣可以減少病痛, 增強自己身體的風水!