命理隨筆 - 關於地支寅申相沖 (Patreon)

*關於地支寅申相沖*

記得都好耐之前，師傅仲喺某公司打緊工嗰陣，有一日有個同事生日，仲要係正日嚟，按公司部門的傳統，同事們係要幫壽星仔壽星女搞生日的，咁嗰日下午時段，就會搞下切蛋糕咁。

切完蛋糕後，同壽星仔傾兩句，跟住就問佢：咦？你今日正日生日呀？
他：係呀。
我：屬咩呀？（職業病患者上身）
他：屬猴呀，喂師傅贈兩句丫。（識我嘅同事都知我當時係有副業的😆，係個director唔知啫）
我：啊，屬猴呀？今日係二月XＸ日，即係寅月。即係寅申沖噃。
他：咁即係乜呀？
我：你係咪細個嗰陣，生活好動盪，阿爸或者阿媽其中一方可能有劫（因為我只係就咁用年月去同佢講，冇起盤嚟睇，因為仲拎住個紙碟而個紙碟上仲有件未食完嘅蛋糕）。
佢：（佢不介意咁同我講）啊，係呀，我好細個嗰陣，阿爸就走咗喇。。。。
我：噢，原來係咁。

之後同佢再起盤睇過，年月寅申相沖，寅中甲木為正財星為父，申中庚金為劫財，財星受尅，咁更加可以斷定，呢個八字，父緣較薄，而細個嗰陣，家境必不佳。

可幸之後佢一直走南方火地，官殺制比劫護財，必有一番成就。

咁結果佢而家成就尚算不錯。

年月相沖，命主少年時必有動盪，或者係動像，究竟係動乜，咁就要起埋個盤睇下是什麼東東，咁就最理想了。