到目標take profit [港股] (Patreon)
Content
上個禮拜五趁住市場消息話中央考慮減免內地個人投資者投資港股股息需繳納嘅20%所得稅,令到個市再夾多棍上去,呢轉就由嗰幾隻高息股帶住,反而啲科技股就抖抖。今個禮拜,首先就係騰訊同阿里巴巴業績,騰訊就靚仔。但係阿里巴巴呢就比較悲,仲未見到轉向,首先雲業務收入就得返3%增長,而電子商務呢一邊就需要加大投資,focus返喺客戶身上,咁即係代表加大投資而利潤減少。唯一個亮點就係今年有機會完成返雙重係香港第一上市,而家講就係今年八九月完成,咁就有機會今年年底之前就可入港股通,都見到有長錢喺業績之後撈貨。
週末出嘅中國四月份經濟數據,係得CPI過關,呢期大陸似乎都想自己推高通脹。早排先話武廣、滬杭等4個熱門高鐵路段在6月15日起漲價20%。最近有廣州擬調整中心城區自來水價格,加39%。加上又傳一段“上海6月1日起取消谷峰計價,改成分段計價”的電費漲價內容在社交媒體平台傳播。所以呢期啲公用股,例如電力,燃氣,水務都做得幾好,都係炒一個加價嘅邏輯,始終好多大陸嘅費用10幾年都冇調整過。
講返中國經濟數據,除咗CPI,其他數據都幾差,尤其是係四月份嘅社融,係2005年10月第一次按月跌。咁其實係利大於弊 (因為好多壞消息已經出晒嚟)。而2005年社融出咗負數之後,就開始咗為期兩年嘅大牛市。
第二就係美國嘅CPI數據,按月升幅收窄,咁樣都係比市場鬆一鬆口氣,又可炒一轉減息。
第三,地產板塊因為中國正在初步考慮要求「各地地方政府參與吸收數以百萬計尚未售出的住宅 (link),以期用更強有力的措施來挽救陷入困境的房地產市場」雖然之前都有咁講過,但似乎這個最新計畫的預期規模將大得多,加上之前話會減少賣地減少供應,所以整體呢個政策會令到大陸樓市更快見底(暫時唔諗會反彈)。再加上美國債息回落,香港地產股都可能有一轉炒作。
之後仲有上個禮拜嘅減免內地個人投資者投資港股股息需繳納嘅20%所得稅,呢一下令到香港上市嘅高息股大升 (3988, 939, 941),同時令到AH溢價指數大插,一個月跌咗差唔多13%。開始有人pitch買返A short H。尤其是係啲H股股價非常之貼近A股嗰幾隻,主要係招行。
仲有就係中國計劃發行一萬億超長期債券,都係會對啲基建類嘅板塊比較利好,再加上最近房地產政策利好嘅消息,啲水泥建築板塊都唔錯,都會繼續留意。
Market
睇返由二月政府態度180度改變 (Feb 8 Patreon post below),變成好進取咁救股票市場。推出一系列嘅措施同埋改證監會主席。(之前幾次轉主席之後市場跟住都大升,原因好簡單,因為喺呢個時候換依個人佢嘅KPI就係要個股市升)

而家恆指由一月低位至到而家升咗三成。跟住下一個重要嘅阻力就係20,000點嘅心理關口同埋上年六月同八月嘅高位。港股今日成交超過2,000億,有些少擔心大成交見頂。技術指標方面,RSI 78 (overbought),DeMark就到13,大家留意一下。之後有可能會喺A股接力,到時香港嘅H股就會慢番啲。

而家港股(尤其是傳統行業同SOE) 喺短期內升咗好多,原因因為市場冇貨。之前要賣嘅人已經賣晒,所以依浸咁升就搞到夾咗上嚟咁。依啲股票好似3988短期內overextended,喺swing trade冇set up唔好追! 記住我哋嘅目標唔係摸頂。賣完之後佢繼續唔關我哋事。重要嘅係當啲嘢跌返落嚟嗰時我哋keep到幾多錢

Watchlist Review
1186, 941 兩隻都到咗我嘅目標,所以一部份take profit,一部份放紙鷂 (有時呢啲突發嘅嘢,我會喺Discord分享,所以大家可以留意呢一個台)

19 突破之後走勢OK,冇啲大嘅pull back。而家升到我嘅目標嘅一半,我會將stop loss提高。

1258 到咗我嘅目標,呢排啲金屬好強(黃金,白銀,銅)。所以我想留多啲放紙鷂

1157 突破之後,佢嘅price action唔係咁樂觀。尋晚仲要比較高成交咁樣跌咗2%。但係依個只係一個警告信號,通常我唔會因為只係一個警告訊號而干擾。會跟返原本計劃等佢落到stop loss先斬。因為干擾越多嘅話,出錯機會就會越多。記住做交易勝利率只係差唔多五成,睇返依排Watchlist 10隻裏面有六七隻已經到咗我嘅目標。所以就算最終呢隻係失敗要只蝕離場咁樣係非常之正常。

6683 呢隻新股成功突破了,喺兩日內已經升咗一成。今次我個target擠得遠啲,因為我用嘅stop闊啲。同樣嘅突破我可以將個stop擠得近啲咁個目標就唔會咁遠。我成日強調派number幫助有限。要自己學識交易同埋學識點樣控制風險先係最有用

Watchlist
6969 呢隻有少少妖(不過都幾正常因為第一二線嘅股票已經炒起咗,所以跟住就炒第三四線嘅股票)。喺技術分析上佢有啲似將會進入stage two。

9926 都係啲三線股票。呢隻嘅intraday volatility 高。如果交易嘅話我會用收市價作準。

免責聲明: 所有內容只作知識及學術分享討論,絕對不會含有或提供任何投資建議或邀約或任何服務。本頻道的內容概不構成任何投資意見或購買任何股票、期貨、期權、墓金或及金融產品的特定推薦意見,本頻道的內容亦並非就任何個別投資者的特定投資目標、財務狀況及個別需要而編製。投資者不應只按本頻道的內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本頻道所載資料僅供參考之用,並不保證頻道內全部或其任何部分的資料在各方面均絕對正確。投資者有責任自行翻查所有資訊及數據的完整性及準確性。如有疑問,閣下應自行查核頻道所載的任何資料。 本評論上的資料,僅按當時情況而提供, 如有任何變更,恕不預先通知。對於因使用或依據本頻道內所載的資料而引起的任何損失或損害,本人恕不負責。投資者應當注意投資附帶風險及過往表現不能保證將來業績,過往表現不能作為日後表現之指示。
Files
Previews only