港股 update - Dec 19, 2024 (Patreon)

中央經濟工作會議詳細內容就欠奉，但係有講到就出年會係4%嘅財政赤字，5%嘅GDP增長，其實係符合於。但係市場最想要一個詳盡嘅公布，雖然今次會議將擴大消費擺喺第一位，但係大家都係想知道政策手段係點樣。

星期一，就見到上個星期追咗貨啲長錢打靶，對沖基金又出嚟沽空些少消費板塊，但係都唔敢太過放肆，最多都係做啲長短倉。而香港地產股呢就比較沽空得犀利，領展(823)，地鐵(66)，新世界(17)。隻新世界市值得返130億，有傳HKMA要求銀行就要唔好抽貸，加上公司最近同銀行傾緊去延長部分貸款期限同埋尋求就違反財務指標（financial covenant breach）取得豁免，而家睇個勢應該都要集資（又供股？）還債。

11月份嘅經濟數據都係比市場預期差，不過都唔係好意外，因為條街啲高頻數據都睇到10月有改善之後11月即刻落返去。 中國10年債息都跌到落去1.73%新嘅歷史低位。啲錢又開始買返啲國企打防守，加上內地又出台啲新嘅文件要求國企去做市值管理，但係都係升得個一日貨仔。 港交所(388)就終於公佈出年去收窄買賣差價，希望可以加強流動性，都叫做聊勝於無。 反而啲汽車股有啲睇頭，連日本嘅本田同日產都傾緊合併，睇嚟大陸嘅汽車工業真係做得唔錯。

美國國防部就將中微(688012)正式移除「中國軍工企業」標籤，而美國生物安全法案未被納入CR法案，應該都會胎死腹中，可以留意一下藥明系。另一方面中國就放寬過境免簽證去到10日，令到最近啲航空股都表現得唔。主席呢幾日就喺澳門準備參加回歸25周年典禮。

科技股就多啲消息，美團(3690)就同Walmart合作，阿里巴巴(9988)終於可以賣甩銀泰，不過要蝕咗93億，另外就否認螞蟻準備借殼上市。騰訊(700)嘅微信小店近日開啓“送禮物”功能灰度測試，唔知會唔會改變而家嘅電商嘅遊戲規則，而微盟(2013)就第一時間正率先接入微信小店，支持商家參與微信電商生態就，首先炒起。

Watchlist Review

倉上冇改變。用返上個星期嘅stop loss + stop profit。而家持有嘅港股風險唔多，淨得 1.3R

Watchlist

由於美股去到一個sensitive位。如果美股調整嘅話股港會一齊跌。美股升嘅話又唔係每隻港股都會一齊升，所以暫時就小心啲，冇再加多股票落 Watchlist - 同上個星期一樣

至於美股點睇，過兩日週末嗰時再解釋。

免責聲明: 所有內容僅為本頻道對其本身行為的描述，只作知識及學術分享討論，絕不含有及不應被理解作含有任何投資建議或邀約或對任何其他人士的投資建議或邀約或提供任何服務。本頻道的內容概不構成任何投資意見或購買任何證券、期貨、虛擬資產及或任何金融產品的推薦意見。本頻道的內容亦並非就任何個別投資者的特定投資目標、財務狀況及個別需要而編製。因此，投資者不應只按任何本頻道的內容或本頻道作者所提供的任何資料（包括以其他途徑提供的與頻道相關的回覆或評論）進行投資。本頻道建議任何投資者在作出任何投資決定前尋求獨立的財務及專業意見，而本頻道並不會提供有關意見。本頻道所載資料僅供參考之用，概不保證頻道內全部或其任何部分的資料在各方面均絕對正確或展示事實的全部。投資者有責任自行翻查所有資訊及數據的完整性及準確性。如有疑問，閣下應自行查核頻道所載的任何資料。 本評論上的資料，如有任何變更，恕不另行通知。對於因使用或依據本頻道內所載的資料而引起的任何損失或損害，本頻道恕不負責。投資者應當注意投資附帶風險及過往表現不能保證將來業績，過往表現不能作為日後表現之指示。