港股 Update - May 27, 2022 (Patreon)
Content
今個禮拜,恆生指數仲係行range,成交繼續低迷。上海開始慢慢解封,不過北京疫情開始嚴重,跟著天津又封市中心,搞到指數係兩萬點磨嚟磨去。大陸政府慢慢開始出台更多政策去穩經濟。之後又有拜登過嚟亞洲搞佢嘅印太經濟框架,搞搞震。原本佢仲話會考慮取消關稅去緩和通漲,不過啲參議員都唔係好贊成。
大陸嘅穩經濟政策,貌似越嚟越多,上星期五減5年期LPR 15點子,大過市場預期嘅5點子。之後係減稅減費,又叫銀行放款。總理亦都話五月底之前會出更多細節。首先係國務院話會免600億汽車購置稅。星期四,深圳出台買電子產品同家電減免15%,最高減2,000。買新能源汽車最高減10,000。同埋對航空公司設定最高虧損額補貼標準上限為每小時2.4萬元人民幣。市場真係鍾意呢啲派錢政策。
我朋友TMT (Tech, Media, Telecom)分析員去咗美國同歐洲marketing,美國投資者就非常悲觀,而歐洲投資者就冇咁悲觀(相比之下)因為歐洲都有好多監管。佢講返啲客完全唔問佢係科技版塊,淨係問一啲會同economist/strategist 嘅嘢,淨係問清零幾時會完,跟住就係”總舵主”身體點(因為最近外媒有啲報道話佢嘅健康有問題,同埋會唔會連任,關於科技監管嘅嘢都已經冇乜人埋。佢都覺得中概股有咩好少少嘅嘢可以夾十幾二十%,因為市場太underweight。
就好似星期四晚阿里同百度咁,阿里巴巴嘅預期係好低,條數出嚟又真係冇咁差,百度就真係好過預期,雲業務同人工智能交到數。之前網易同快手都唔錯,係騰訊最差。Weekend仲要話馬化騰喺微信講嘢,市場真係有啲驚佢無啦啦走出嚟講嘢啊,之前啲人都覺得佢係半個啞仔,搞到啲北水星期一係咁沽佢。早幾日攜程老細又係微博寫咗兩段嘢即刻俾人Ban左。
恆指季檢 HSI index review,加埋中芯 981,東方海外 316,中升 881,宏橋 1378。行家真係屌,懶晒係製造驚喜。咁樣,個指數真係比班友做到永遠都冇得升。踢咗瑞聲,以往經驗踢走咗嗰啲都有啲運行,可以留意吓。
房地產仲係死氣沉,咁多城市放鬆,但係成個板塊都冇乜反應。聽到內地嘅情況,就係越放鬆啲人就越多二手盤放。