港股 Update - July 15, 2022 (Patreon)
Content
全世界都喺度等美國嘅CPI,出咗嚟9.1%高過晒預期,但係市場反應反而唔係好大,不過美股呢排都係第二日先見真章,而家市場睇七月份八成機會係加100點子。
今個禮拜港股都係靜,係星期一大跌因為驚疫情同埋封城,不過第二日都見到好多旅遊餐飲股反彈,似係有人出嚟解畫話唔會好似上次咁大規模封城。跟住星期四以為個市幾硬淨,到下晝突然急插,都似係啲量化基金果類嘅錢喺度隊個市場。朝早就因為內房斷供隊內房內銀內險,晏晝開始對埋香港銀行香港地產,跟住就成個市一齊跌,真係拗晒頭。之後有啲反彈因為中國當局與銀行召開緊急會議討論內地業主拒供爛尾樓問題,應該暫時都會平復翻啲情緒。
越來越多嘅發展商嘅樓盤開始難尾,原本啲錢係放喺一個監管帳號嘅,但係而家發現有啲錢直接過咗比發展商,買咗樓班人就投訴,開始”罷供“。不過有個現象,就係每次議息或者出啲重要數據,例如CPI之前,啲內房債幾波動下,加埋今次斷供嘅新聞令到市場panic。不過阿爺又係即刻做嘢,叫晒啲銀行出晒通告,話晒比你哋聽有幾多按揭貸款,同埋幾多係喺啲受影響嘅樓盤。

咁呢個禮拜最大新聞都係比亞迪(1211)。巴菲特手貨轉咗入去Citi又未必即刻沽,佢唔想沽又未必會轉入去。而家大家就喺度估嚟估去。始終巴菲特沽貨同公司嘅經營層面係冇咩關係只不過佢嘅影響力實在太大同埋啲貨都有啲多。收市之後都出埋盈喜,係符合預期嘅。

比亞迪單嘢搞到爸爸(9988)都俾人隊,騰訊(700)就繼續俾南非佬沽貨,下星期就應該唔可以再回購因為業績靜默期,到時可以再睇吓佢有冇支持。星期一科技股大跌因為反壟斷罰錢。似係監管嗰邊一次過清晒啲案例。

總體來講大市跌到20,500有啲支持,睇demark呢個位都有得搏吓反彈。同埋突然之間下星期四收市之後出咗一炸盈喜,中海油(883),兗礦(1171),贛鋒(1772) ,神華(1088)… 大部份都係符合預期因為都係啲資源類嘅股份。上個月美國加息美股跌但係中慨股係跑贏晒,今日啲生物醫藥板塊都算係第一個反彈,電動車繼續係有買盤,嚟緊會唔會係科技股呢。
免責聲明 本頻道提及的內容 僅作為討論分析使用 不作為任何買賣投資推介