港股 Update - July 28, 2022 (Patreon)
Content
個市繼續好靜,成交又得返八九百億。
Chart: HK stocks' turnover almost at year low
原本以為聯儲局加息之後個市會好翻啲,但係都係死死下。美股大反彈,香港就唔跟,成交縮,波幅越嚟越窄,有啲似想爆邊。感覺上市場唔理啲好消息,中央嘅救樓市計劃,拜登習近平通話,阿里巴巴申請香港做雙重主要上市,即係之後可以又入北水,但係指數股價都完全無視呢啲好消息。
市場氣氛繼續都係受到內房問題困擾,其實大家都唔知點補呢個窿。呢兩日都有消息就話中央會搞個3,000億嘅基金幫爛尾樓, 之後又有FT話北京凖備一萬億救市。呢個數就有啲誠意啦。但係內房板塊就晏晝抽一抽之後都回返,物管就好啲,比較好嗰幾隻都升到尾嘅。始終有恆大(3333)穿恆大物業(6666)櫃桶底穿咗百幾億,跟住又有碧桂園(2007)低位配股,呢個位去配股真係驚奇,睇嚟都要多啲實際政策去恢復市場嘅信心。房地產始終佔咗中國GDP四分之一,搞唔掂或者係咁拖落去都唔係辦法,嚟緊仲有幾個月就二十大,應該都要盡快搞好佢。
比較好啲係見到啲港交所(388)買盤都係炒番,啲中慨股回流,其實大嘅淨係得番幾隻未返,大行估成交會升多20-30%,不過以現時每日成交唔到一千億。仲有就係有啲電動車嘅沽盤,仲要係蝕住嚟沽嘅。其他買盤仲有啲係啤酒,旅遊相關嘅。會唔會係最近又批咗隻新嘅新冠藥,跟住高層都出到嚟講佢哋打晒疫苗,個勢就似係會再放寬。
Adidas下調年度業績預測,主要是預期中國市場復甦較預期疲弱,啲體育版塊捱沽。
Table: Companies with high exposure to Adidas

科技股繼續俾啲股東沽貨,騰訊,快手,美团都係繼續俾啲早期股東沽。關於阿里巴巴,佢申請做香港的主要上市,應該有阿爺噏頭,跟住啱啱又話馬雲可能放棄螞蟻嘅控制權,而將啲股份派比啲高級管理層,對螞蟻或者阿里巴巴攞個金融牌照應該係好事嚟㗎。但係股價最近真係好弱,8月4號出業績會唔會有啲人知道業績麻麻哋?