Home Creators Posts Import Register Favorites Logout

Content

指數繼續上上落落,窄幅波動,低位做國家隊後托住,得閒就係A股拉吓啲內卷金融頂住。成交跌到落七百幾億,繼續買賣兩閒。有疫情又停電政府有躺平,基金大部份睇淡中國,啲錢就會炒細股。好似 TCL電子(1070),會唔會子憑母貴(TCL中環 002129),有重組概念,定係星期五業績會好好? 

新秀麗(1910) 出完靚業績,一大棍上,呢啲同大陸關係唔多嘅股票最近而家外資鐘意,創科(669) 都繼續升。好似以前炒瑞星(2018),啲外資由Apple數落去成個產業鏈都瞭如指掌。復旦(1385) 都唔錯。今次想講下一隻京東方精電(710) 有個buyside朋友同我講話當佢係汽車界嘅舜宇(2382) 。呢個位難追落手。

雖然內房係有啲好消息,但係都係一兩日貨仔,主要都係冚倉,如果長線基金要買返,一定要等啲內房可以正常咁發行翻啲美元債。

騰訊(700)業績終於出嚟,市場預咗差,出嚟又冇咁差。公司進入轉型期,遊戲業務唔會再係增長引擎(除咗海外),廣告會受到經濟週期影響,金融科技同雲應該仲有雙位數增長,但係比例比較細。而家會係食遊戲老本,減少支出,做靚條數。而家要睇去之後嘅回購力度有幾大,因為短期冇catalysts,Naspers又喺度沽緊貨。之後佢會繼續沽咗啲成熟咗嘅投資,可以攞翻啲錢做回購同投資,又可以討好監管,除咗美團(3690) ,佢仲有拼多多(PDD) ,快手(1024) ,B站(9626) ,SE。同時間市場都幾相信佢嘅管理層 (騰訊同美團應該係最好嘅管理層),知道要比時間公司轉型或者等監管放鬆。業績之後見到啲長錢買補返少少貨同埋啲對沖基金冚倉。

其他科技股快手(1024)同美團(3690)市場仲會覺得係有upside驚喜。即係啲蝕緊錢,收入仲有啲增長,又可以節省成本做靚條數。呢兩日都見到番啲中資,買番啲大陸科技股沽美股。

港交所(388)業績麻麻哋,而家成交跌到落700-900億,第二季嘅成績平均成交仲有1,100幾億。第二季EPS係1.71,大家可以計吓。當你全年平均好似第二季咁,全年EPS = 1.71X4 =6.84, 比夠8你, 即係而家成40倍rolling PE… 港交所歷史平均應該係30零倍PE。

汽車股就差啲,長城(2333)就跌穿左位,吉利(175)出完業績就暫時未有方向,理想(2015)第三季指引就差個市場預期,都可以見到五六月份政策出台之後一輪嘅pent up 末必last唔到。

電力股可以留意下,尤其是呢轉限電行得咁犀利,令到一啲電動車充電站停止服務,加埋早兩日有新聞”兩大電網成立專屬公司 將解決4,000億可再生能源補貼缺口” 中國電力(2380) 華潤電力(836) 大唐新能源(1798) 龍源電力(916) 新天綠色能源(956) 。

少少題外話,呢半年一年見到多咗外資基金買越南股同埋喺印度市場,睇嚟啲錢流走咗就去咗呢啲替代市場。不過散戶要投資呢兩個市場都係得啲ETF。亦都有新聞話蘋果將首次在越南生產Apple Watch與MacBook。


免責聲明
所有內容只作知識及學術分享討論,絕對不會含有或提供任何投資建議或邀約或任何服務。本網頁內容並非投資意見,亦不構成任何投資產品之要約、要約招攬或建議。本資料只作為一般用途,它並沒有考慮您的個人需要、投資目標及特定財政狀況。投資附帶風險。您應於進行投資產品交易前先評估個人投資風險之取向。