港股 Update - Sept 8, 2022 (Patreon)
Content
恆指踏入九月連跌六日,指數穿埋19,000,完全冇力反彈,成交又番去800億。市況繼續係陰跌。國內疫情繼續令到投資者卻步,除咗成都深圳之外,仲有好多地方都係封晒。沽空繼續多,去到20%。啲基金覺得個市如果咁樣繼續陰跌,基本上唔係點做嘢。大家都係到等,一係就大成交搏見底 (好似三月份咁),一係就政策轉向。國內嘅朋友就話等二十大之後,講真會唔會政策轉向真係冇乜信心。
Chart: HK Short sell ratio

新能源仲hold到,因為歐洲能源問題,大陸將來只會越嚟越緊張能源供應安全,唔想好似歐洲咁。啲電力設備中國能源建設(3996)東方電氣(1072) 哈爾濱電氣(1133) 應該仲有得玩。隻中遠海能(1138) 應該繼續會受惠歐洲嘅天然氣運輸。仲有嘅就係一啲國產替代例如芯片,上海復旦(1385) 破晒頂。
汽車股算係波幅比較多,不過似乎新能源車真係炒完,琴日話新能源車滲透率已經20%,未來嘅增長只會越嚟越慢,始終新能源配套都要時間去catch up。寧德時代(300750)出完業績到而家都跌咗20%。最近一路都有留意隻京東方精電(710) 批完股都唔係好跌,睇嚟真係唔夠分,行家係話呢隻次汽車板嘅舜宇(2382)。
Varitronix makes smart dashboard in cars. It is the market leader in China

星期三開始見到有少少撈底低,當然啦繼續都係細注,阿里(9988)百度(9888)同埋一啲餐飲股。星期二都見到國企買返少少比亞迪(1211)跟住第二日都有彈返少少。騰訊(700)基本上係單邊齋沽,星期四仲見到Naspers又轉咗190球貨去GS,即係有排同你沽。一個美國大基金,以前係中國科技股嘅忠實擁躉,我諗上年開始都沽,都沽到8899,而家竟然係走去買李寧(2331)。不過鬼佬始終鍾意啲品牌嘢因為有定價能力。
外資亦都有啲deep value fund 買嘢,主要係香港地產股。而對衝基金就覺得個市開源二十大隨時有得再落,因為啲市埸覺得清零政策會放鬆,而佢係好對中國cautious 。仲有對沖基金喺度short 建行(939),可能佢因為嘅房地產貸款係比較大。恆大(3333)融創(1918)都俾人告上法庭清盤,雖然佢哋話冇乜嘢。
今個星期啲醫療生物科技股票跌到一仆一碌,事源有傳中歐基金嘅葛蘭會走,雖然之後澄清咗,不過市場都係有啲擔心因為佢今年嘅成績真係麻麻,佢啲醫療基金加埋接近1,000億。
少少題外話,市況真係幾差,開始見到BUYSIDE SELLSIDE都炒人。
免責聲明
所有內容只作知識及學術分享討論,絕對不會含有或提供任何投資建議或邀約或任何服務。本網頁內容並非投資意見,亦不構成任何投資產品之要約、要約招攬或建議。本資料只作為一般用途,它並沒有考慮您的個人需要、投資目標及特定財政狀況。投資附帶風險。您應於進行投資產品交易前先評估個人投資風險之取向。