港股 Update - Sept 29, 2022 (Patreon)
Content

港股去到17,000附近,但係似乎仲係冇買家,星期四高開想跟外圍反彈,開波已經冇力,啲長錢都係趁反彈走貨,下晝再傳上海陸家嘴有一個確診,之後倒跌。恆指九月份跌咗14% - 自從九月2011一個月最差嘅表現,跟住個月恆指反彈13百分點)。

10月中開二十大,暫時10月唔係睇得太淡。原本港股仲喺度陰跌,直到人仔跌到去7.2,英鎊大插令到指數急跌,成交都開始放大,連啲公用股防守股都跌得好甘。VHSI 香港嘅VIX 由月頭24.9升到34.76。希望有啲見底跡象。

最新星期四收市之後,路透消息指,中國國有大型銀行被要求為干預離岸人民幣市場做好準備,此輪行動將會動用國有大行的美元儲備。消息人士指,「為捍衛人民幣走勢,這一輪美元拋售規模將相當大。」繼早一日出完口術之後,直接做嘢,頂滙價。

市場方面,旭輝(884)傳爆煲大插,又攪到內房內銀內險一齊落。唔知最後呢幾間民企內房,碧桂園(2007) , 龍湖(960) 唔掂,政府會唔會真係出手,因為呢個幾間都係”示范民营房企”。另外BOE 似跪低咗,又QE又加息。少心匯豐(5),渣打(2888),長實(1113),長和(1)。
Flows嘅話,多咗去消費類嘅板塊,似係政策最容易去刺激一個嘅板塊,啤酒,餐飲,消費,仲有啲濠賭股都係有人買。仲有就係17,000點嘅時候開始都有人撈科技股,主要都係美團(3690) 阿里(9988)。同埋今個禮拜醫藥股係比較硬淨啲。
仲有就係呢個禮拜見到至少有三間sell side 講大陸嘅防疫政策,Morgan Stanley 同UBS 都預期出年第一季會放鬆,而Jefferies睇11月有機會開始初步放鬆,而出年第一季開始更加開放。WHO係2020年3月11日正式宣布Pandemic, 佢應該係最遲三週年之前會宣布疫情結束,咁大陸會有個下台階去放鬆,同時如果美國通脹受控,息口見頂,大陸出年第一季有機會炒復蘇。
最後就係最近呢兩三個禮拜啲回購/增持越來越多, 除咗騰訊(700)友邦(1299),小米(1810) 每日都回購之外,仲有中海油(883),中石化(386),中交建(1800),東風汽車(489),長城(2333),中國生物(1177),瑞聲(2018),領展(823) ,金碟(268) ,長實(1113).. 雖然回購/增持唔一定升,但係見到越來越多嘅話都係一個比較積極嘅訊號。
免責聲明
所有內容只作知識及學術分享討論,絕對不會含有或提供任何投資建議或邀約或任何服務。本網頁內容並非投資意見,亦不構成任何投資產品之要約、要約招攬或建議。本資料只作為一般用途,它並沒有考慮您的個人需要、投資目標及特定財政狀況。投資附帶風險。您應於進行投資產品交易前先評估個人投資風險之取向。