港股 Update - Oct 13, 2022 (Patreon)
Content
上個星期反彈完之後跌足咁多日,17,000都守唔住最後就係睇16,000穿埋之後都冇support. 市場情緒跌到落去冰點內憂外患,冇樣好。今個星期人民日報連續三日講堅持動態清零,令到市場原本仲有一絲放鬆希望都冇埋。跟住國慶假期之後疫情散播得比較快同埋比較多地方都有局部封城,再加上美國制裁中國嘅半導體產業令,到市場情緒更加悲觀。香港股市繼續被derate,risk premium 越來越高。(US semiconductor ban article )
今次嘅制裁非常嚴厲,基本上係可以切斷晒所有先進少少嘅晶片製造業,就算係普通用途嘅晶片佢都可以變ban, 同埋唔俾任何美國籍嘅人員(包括綠卡)去協助中國嘅客戶。所以見到啲電動車/科技股都跌得好犀利。例如阿里巴巴嘅AI,百度嘅自動駕駛都需要呢啲高級晶片或者超級電腦。
再加上英國嘅退休基金,係市場上沽貨,因為佢哋要係星期五BOE結束買債之前籌集足夠嘅資金防止再俾人call孖展,所以見到星期三香港開市有啲panic sell, A股北向淨沽出50億,星期四淨沽出80億,主要都係啲基金愛股,茅台,五糧液,招商銀行等等。
雖然星期三晏晝A股反彈收高,但係港股都跟唔到,喺路透社話汪洋會做總理,市場都比較buy, 因為汪洋比較開放,同埋國內有做窗口指導啲基金唔可以淨沽出出多過3千萬。
最後星期四又係內房,旭輝就話還唔到利息,令到成個板塊殺落。唯一嘅好消息就係嚟緊施政報告香港有機會減辣同埋放寛移民簽證,不過都係覺得實際作用有限。
澳門股,星期四晏晝突然大插,尤其係兩隻美資永利同金沙,有新聞話金沙俾人告單嘢都係20年前嘅賭牌嘅事情,唔知阿爺會唔會用續牌還擊。
去到呢啲位,反而有啲中資開始撈番啲科技股,對沖基金做空就唔多,反而有啲冚倉。外資普遍都係沽貨。
問過幾個基金,而家對佢哋嚟講最重要係減低風險同埋提高 info ratio。大家都係揸住多現金。第一因為市場環境唔好,第二因為要 fund redemption為做好準備。
免責聲明
所有內容只作知識及學術分享討論,絕對不會含有或提供任何投資建議或邀約或任何服務。本網頁內容並非投資意見,亦不構成任何投資產品之要約、要約招攬或建議。本資料只作為一般用途,它並沒有考慮您的個人需要、投資目標及特定財政狀況。投資附帶風險。您應於進行投資產品交易前先評估個人投資風險之取向。