港股 Update - Nov 3, 2022 (Patreon)
Content
恆指呢個星期最低跌穿埋14,600先開始反彈,有趣嘅係星期一啱啱係月尾,嗰日奇實幾特別,突然間見到啲外資基金大手沽啲國企例如中石油(857),聯通(762),中國海外(688),仲有啲內銀,似係想趁月尾清埋啲艙底貨,唔想比佢哋啲投資者見到佢仲揸住呢啲大陸股票。原本嗰日個市想開始反彈,仲開始傳中信(267)同其他國企想係南非佬手上買返啲騰訊(700)股票,不過最後都係敵不過沽盤,接近低位收市。如果央企/國企接咗騰訊股票,短線會利好,不過長遠來講唔係好事。
11月1日,開市冇耐已經開始傳北京會成立工作小組(話係禮拜六日已經開過會),去準備出年第一季”有條件”咁放開,時間同市場預期都差唔多,大概係3月中。之後嗰仲有講最快今個禮拜會更新”新冠肺炎防控方案”到第十版,入境隔離由7+3縮到5+2,航班唔再熔斷,下放抗疫權力,加上康希諾嘅吸入式疫苗由上海推廣到江蘇省13個城市,同埋之前航空公司增加國際航班,咁睇落去,都係慢慢咁放鬆。雖然之後有衞健委嘅”澄清” ,不過呢種咁大嘅政策轉向一定唔係由衞健委講,所以睇落去市場係信嚟緊係會放鬆,而有啲基金已經開始position reopening,炒出年Recovery (e.g. 澳門, 旅遊)

11月呢幾日沽空比率跌咗落嚟,去返13-15%,去返啲歷史平均數。
Chart: Hong Kong short sell ratio

板塊:醫藥股比較抗跌,reopening 抽咗兩日之後回返啲,仲有就係市場覺得中小盤股會outperform 大盤,因為外資唔會點啲國企。仲有就係真係越來越多人講Asia ex China (link)
Fund flow: 星期一二都係冚倉盤帶起,到星期二下畫同星期三就多咗長錢買貨,銀碼都係偏細,同埋主要係亞州/主權基金追貨,以科技股騰訊(700) 美團(3690)快手(1024) 平安(2318) 友邦(1299)為主,美資都有,不過沽盤大過買盤,到星期四跌市就即刻縮番,成交又跌返落1,000億樓下。