日記～27/06/2021～赤柱、石壁的分別 (Patreon)

星期日 陰天

昨晚醒左好多次，清晨五點就醒左，七點起身洗面擦牙執床。今日係大衛day 星期日，好早就開左門，行上三樓集合，赤柱啲倉比較細，又係一道實心鐵門，夏天真係好熱。而石壁房間比較大，而且係一條條鐵柱，比較通爽，兩者有好大分別。

出倉早飯出球場都係一切照舊，陰陰天去做運動最好，攞左個排球玩吓。返到飯堂，學吓改chord，原來可以咁樣做，改左就可以將女仔歌改返男仔key，又係夠鐘去攞結他，係石壁結他係自己保管，只係不能帶上倉房，而赤柱就全部鎖係一間房及locker入面，公眾假期及星期日才能攞出來玩，晚飯前就要鎖反入去。

唔知下星期可唔可以攞結他去球場玩？因為石壁係可以，原來赤柱係唔可以。完左放風，就返到到飯堂玩結他、捉吓棋，下午包妹只食面包，因為逢星期日，就係腐竹煲粥，超難食。全日都係玩左結他一小時左右，因為唔夠結他，大家輪住玩，因為有結他的大哥，過晒去石壁，兩個監獄大兜亂。石壁去赤柱，赤柱去石壁！

好平淡又一日！