Home Creators Posts Import Register Favorites Logout

Content

昨晚大風,第一感受石壁的狂風大雨,可能近海,晚上大風到好像八號風球咁樣,風吹到啲樹所發出的聲音就感受到。 早上橫風橫雨,我住四樓。

聖誕節紅日,隨了洗衣期及㕑房期要開工外,清潔也冇假放(某些期數係放紅日)。來到石壁幾日,都係好唔習慣,在荔枝角個個都係輕罪嘅犯,來到石壁,唔係殺人就係運毒,唔係製毒就係打劫傷人嘅重犯,始終大家成長背景有異,觀點角度也有很大分岐。

早飯後,在活動室睇吓書,見到有囚友玩結他,於是立即寫信叫妹妹入個結他比我,同時也同B仔話自己要申請猫仔(收音機),問我如何扣錢,我根本唔識什麼叫包頭(入獄後,擺放個人物品地方),問我係咪扣包頭嘅錢,我只有答係! 開始工作,當然跟大隊由四樓清潔到地下,我當然係每層洗厠所啦! 早上完成工作就繼續寫信,而派信員就是新生組豪哥,派信先派比b仔再分比我地,所有信已經拆開晒檢查過!下午食半片面包及一碗粥,其實根本唔夠飽。我開始收到石牆花嘅信,另外我也有寫信比李俊威議員(我當初係佢選舉代理人)希望他可以幫我print “解悶工廠“。

晚飯時認識了一位新朋友!始終新相識,只係同枱食飯,佢做CMO “運輸“ ,成日有機會入倉及去禁區工作!暫時保持距離,監獄始終品流覆雜。而且監獄很多騙子,個個都話自己被人屈,自己冇做過,只有小部份年青人知道自己心急揾快錢而運毒感到後悔,有啲十幾歲就去左YP(未夠21歲的少年監獄),今年也只不過係26歲(夠21歲就會由YP過界去正式監獄),已經坐左十年多。

今日星期六,有時下午休息,因為唔同老闆(當日看守職員)有唔同規則,今日老闆話下午休息,因為懲教係四更,每逢中午一點半,晚上八點半,深夜一點半,早上八點半左右就係交更時間。又係休息室自由時間,一個平行空間,在牆外真係忙到唔夠時間用,在牆內時間係多到唔知點用,所以有收音機,有結他,有畫具,有書有信都係好重要。回吓信,信中提及原來係監獄內係一個以物易物嘅地方,每個人目的都係為了錢,所以係有賭馬賭波,甚至打康樂棋都要錢(即係煙)有此人用餅及食物作賭注。

我只係判15個月,扣除假期,實際坐10個月,到今日為止,入獄廿六日,一個品流覆雜嘅地方,到底一個文人要怎樣才可以係一個黑社會橫行嘅地方生存?牆外可能100人當中有一個係黑社會,但在獄中,十個人有9.9個都係黑社會! 戰戰驚驚地又過了一日!

Files

Comments

Wai Tong Tze

危機四伏,只能如履薄冰😵