監房醫院鬼故 (Patreon)
Content
現今香港疫情嚴重,所以當囚友要外出覆診後都要經消毒機處理,如果有需要可能住幾日醫院,因為每次都要等口水報告,去到邊個監獄都要在醫院隔離。
作者在赤柱需要到小欖攞份精神科報告甩簿(黃簿/情緒問題),先到小欖住咗2日隔離病房,檢驗陰性就可以同其他囚友一齊。一星期左右,見了精神科醫生,評估冇咩事甩左簿,就返到赤柱,因為外出,所以要住係赤柱入面醫院隔離病房等報告。病房當然係獨立一人囚室。1、2、3、4、5對面是6、7、8,小弟住4號,1、2、3都有人,6號有外籍人士,5、7、8號是吉的,即是4號對住係7號囚室病房。
其他的都是病人,生病/發燒等需要觀察,唯一是小弟在等報告,冇法,要訓一晚,當日下午3至4點左右入病房,入房冇耐就沖涼,大家輪住沖,一個沖完到另一個,大家好靜,冇傾計。
食完晚餐,我係到睇書,開始聽到5號房發出了兩聲...嘻嘻!奇怪啦,5號房冇人,當時約晚上8:00左右,冇理由,繼續睇書,過多一陣,3號房一把男人聲,嘻嘻!嘻嘻!好大聲,可能傻傻地,我冇理。之後見到對面6號房(外籍人士,應該似印度人)同5號房(因為對到正)係到唔知傾啲咩,因為用佢地啲方言,但只聽到6號嘅聲,我聽唔到5號有回應佢!!驚驚,冇得理!傾左一分鐘左右就停左,大佬呢度唔係小欖喎!
到晚上十點要關燈訓教,精彩節目現在開始,我訓係到,聽到有男有女,有大人有小朋友,係到傾計,講咩就聽唔到!等一陣又有水聲,有鐵鏈聲,有波子聲,之後一男一女係5號房傾計。3號房位人兄就成晚傻笑,哈哈,但聽到有2至3把聲同時咁笑,重疊左。頭痛耳鳴,成晚唔使訓。到清晨才開始靜咗小小,一路一路開始冇聲,總算訓到一陣。
早上我問對面6號房,為什麼同5號房講嘢,佢話Never do that…我又趁有機會,問吓職員 3號房點解成日傻笑,阿SIR又話佢冇傻笑!不過佢四圍痾屎,成個倉通地都係,間房好臭,阿SIR要佢自己清返乾淨間房(其實與廁同眠,自己誤會啲臭味由廁所傳出)。問阿sir : 「咁3號房到底犯咗咩事?」阿sir 答 : 「佢燒死人地一家三口!!」Oh My God!!
因為原來口水樣本破裂要再採樣覆檢,結果住了五日醫院。對面的外籍人士,相信他也有靈異體質,古古怪怪,連續幾日都無食飯,夜晚就自言自語,每晚如是。而3號房唔知係咪每晚都嚇到瀨屎,每朝職員都媽媽聲要佢洗地。而作者係醫院晚晚都比班靈體係到開會傾計,嘈到訓得唔好,好在下午可以訓吓。五日醫院被靈體攪到無得訓终於完啦,再係咁,唔傻都會癩!!
監房始終係陰深之地,殺人犯多的是,之前赤杜柱又有死囚,冤魂跟住兇手,所以有咁多鬼係到傾計囉!!
是否這件案?
大埔今凌晨(2021年)發生三死一傷謀殺及縱火案,一對分別13歲及8歲的小姊妹與42歲母親葬身火海,3人身上合共有近50處刀傷,女死者的62歲的男友涉嫌謀殺及縱火被捕。
《香港01》記者今午訪問了事發時欲救人的鄰居陳先生,他憶述逃生一刻時發現3母女家中冒煙,於是聯同其他鄰居踢開起火單位門欲闖火海救人,豈料有大量濃煙湧現,陳先生立即大叫屋內母女走火警,煙霧彌漫的單位中傳來女童驚慌回應「我唔出嚟」,陳先生稱「係最細個女把聲,佢平時都會叫我叔叔」,及後現場濃煙密佈令陳先生不得不離開,「我唔出嚟」便是陳先生與8歲女童最後的對話。