日記/2021年1月4日星期一~真實版監獄風雲 (Patreon)
Content
昨晚好大風,風聲浪聲又奏起交響樂,所以訓得唔太好!清晨的依然是牛叫聲。囚衣分別係灰色及啡色兩種,我直接入獄係啡色(拍),而還柙未定罪係灰色(拋)。每人有三套衣服,衣服上沒有囚號,而係你個名,衫褲都有,方便洗衣時可以揾返自己套衫。每個期數洗衣日期都不同,我們係星期二及四洗衫,天氣涼
昨晚好大風,風聲浪聲又奏起交響樂,所以訓得唔太好!清晨的依然是牛叫聲。
囚衣分別係灰色及啡色兩種,我直接入獄係啡色(拍),而還柙未定罪係灰色(拋)。每人有三套衣服,衣服上沒有囚號,而係你個名,衫褲都有,方便洗衣時可以揾返自己套衫。每個期數洗衣日期都不同,我們係星期二及四洗衫,天氣涼,穿兩三日還可以,所以我星期二會洗兩套,星期四洗一套,早上出倉放入膠箱,晚上回倉就可由膠箱揾返自己套衫(幾常有人唔見左啲衫)。今日星期一,正常出倉,正常早飯,當日(2020年12月21日過界)就只有我一個人來到石壁,今日就有囚友在早飯時已經收到風,今日有某某人過來,犯左咩事,有冇單位(黑社會背景)等等,我聽到的並非手足已經無興趣理。石壁係白手(未坐過監)高設房監獄,而赤柱係黑手(曾經坐過監)監獄。係石壁嘅新人組四日會係流倉(清潔期)即我工作嘅期數,之後就會分派到其他期數。我想如果下次有手足來就可以互相安慰一番!
經過我出去荔枝角覆疹一事,今日下午工作完畢後,老闆及保安們叫我們一齊在三號活動室開會,原來監獄真係好似一間寄宿學校,有囚友想搞事,老闆就出來開會化解擺平,最後一句,大家要齊心做好本份就完結,當然有講吓點解會有人咁不滿?做工作唔係分邊個做多啲,邊個做小啲,大家要互相幫助,邊個出左去,大家就合作做埋佢個份,每人分工小小!保安出面,誰敢不從?所以開了十五分鐘,完!結果係我出去睇醫生後,會由最低個位新人做!可是石壁係高設防重犯白手監獄,每星期入來都唔多人,再分比唔同期數,有可能成個月都冇新人來“流倉”工作。真實版的監獄風雲,就在眼前發生。
工作如常,星期一無信收,因為星期五收到嘅信會在下午派發,而星期一收嘅就在星期二中午派,調返轉,每星期有一封免費信,就要在星期一中午前放入信箱,唔使貼郵票,我最初入荔枝角,就係用最高限制四張紙,共八個人(底面各一人)寄返屋企由家人再代為寄出/用我手機Whatsapp、Signal等不同方法交比朋友。既然今日無信收,咪寫信睇書。
星期一,放風日,原來石壁放風(出球場)唔同赤柱每日都有,石壁一星期三日,一星期兩日,即逢星期日、星期一及星期五,下星期就係星期日同星期三。放風又如何,只可以散吓步咁,一返到活動室便被職員帶去醫院,原來要同醫官,身穿白袍,有考過某些認可醫藥牌嘅懲教職員同我對藥及分配返嘅藥膏、漱口水比我,對藥係要知我幾時食咩藥,而藥膏唔可以有金屬嘅支裝,所以佢地擠左落一個膠樽比我,金屬在監獄內係有危險性,可用作武器傷人。
攞完藥膏及漱口水,當然會引起其他囚友羨慕及八卦,一個問完又一個,好正常,可能佢地真係比較少囚友攞咁多嘢!
在石壁監獄內,個個都係黑社會,心狠手辣;物資又缺乏,就好似好多野獸望住你物資,好想用盡方法搶到手,用“困獸鬥”去形容係好貼切,所以要學識保護自己財物。