“骨仔“監獄內吸毒? (Patreon)
Published:
2022-10-05 14:10:04
Edited:
2022-10-11 02:09:45
Imported:
2026-06
Content
小弟自入學之後,平均每月都會去覆疹一次,由於小弟身在石壁,而石壁/塘福及喜靈洲都叫水路,因為未有青馬大橋之,出入要用船,所以俗稱“水路“,而且係沒有直接去睇醫生嘅車,所以必須早一日去到荔枝角住一日,所以“水路“會成為一個期數,即係石壁/塘福同喜靈洲戒毒人士一齊。如有緊急病情,可以call 直升機送院! “骨仔“即係一種含有“嗎啡“嘅止痛藥,如果有骨科或痛症,囚友可以要求醫生開“骨仔“比佢止痛,有名你叫“古惑仔“睇醫生點會唔扮到好痛,痛到訓唔到而要求攞“骨仔“。一粒骨仔,在監獄內可以賣到四非煙(4支)。係獄中煙就是錢,尤其在赤柱,係一個高消費監獄。 每次由石壁上左囚車,先去塘福再去到昴船洲接人,再返到荔枝角。一次,大洲(喜靈洲)啲人問我有冇煙,想用佢食飯時嘅肉交換(監獄就係一個以物易物嘅世界),可惜我並非一個吸煙者,只能拒絕。食過午飯,有位來自石壁的外籍囚友用英文同我講佢有四粒骨仔,想賣比佢地,但啲吸毒者又唔識英文,只有揾我做翻譯,這是我第一次知道有“骨仔“嘅存在,當然一頭霧水,要問個清楚,最後係可以幫佢成功賣出(這當然他是一位吸煙者啦)。為什麼他會有四粒藥係手?其實醫生開藥後,我們(囚犯)係無法攞到,只係每次由職員派藥,要睇住我地吞下再檢查口中脷底有冇藥,確定你把藥吞左,但佢地會用手指公㩒住粒藥,假扮放入口,飲水假扮吞左,所以就可以收埋啲藥,如果被人搜到好大獲,必定要入“水記“(水飯房)! 做完買賣之後,我親眼見到一位來自大洲的廿多歲囚友,把一粒膠囊嘅骨仔,趁職員講緊電話,就打開膠囊掃啲藥粉係枱面,即刻用鼻去索晒啲粉入鼻,佢正正坐係我對面,睇住佢唔使五分鐘,面都紅晒,跟住訓係到 Hi 左。 監獄內一樣有辦法吸毒!