成為監獄內第一個人可以戴隱形眼鏡的囚犯！_ (Patreon)

我眼睛唔太好，因為太多化學物質入過眼(2019 相信大家明～胡椒噴霧）。結果角膜受損，造成有傷口，結疤後，角膜厚左同有不規則形狀，造成好多折射，鬼形重要，就有如去睇3D電影而冇戴眼鏡一樣，疤痕性散光。 當時上庭我有戴住隱形眼鏡，帶住一副眼鏡係身。結果即時入獄，好在有心理準備同做好“身後事“（安排如果入獄時親人要幫我做的事）。因為我戴住係one day 所以晚上冲涼就掉，換上眼鏡，但角膜凹凸不平，眼鏡又點會幫到呢？入獄後，懲教會攞我的醫健通密碼，再幫我安排覆疹。但要兩個多月才安排到覆疹，到我見到醫生已經係獄中過了三個多月的3D世界生活！小弟只係判十五個月，扣除三分一假期，實質只有十個月，在囚也只有三佰日。我當然要求醫生寫信比懲教，要求我必須戴隱形眼鏡才可以幫到我，醫生當然答應啦，當時封醫生信及一切眼藥水都由懲教職員攞住，我不可以接觸到的。回到監獄，他們登記及檢查完後，大約一至兩日後，才會比啲眼藥水我。返回石壁又過了個幾月，醫院嘅醫官（懲教職員）才召見我，問清楚我點解必須要戴隱形眼鏡，我照回答因為只有隱形眼鏡，才可把我不平滑的角膜壓平，視力才可以回服正常，醫官又問我要用藥水每日清洗嗎？我話我係用one day 即棄，唔須要藥水清洗，醫官回答，咁都好易申請，每日去醫院戴就得，好啦我幫你申請，但都要等兩至三個月！當時真係好開心，因為可以成為懲教囚犯中，第一個可以戴隱形眼鏡嘅人，日後手足申請就有了先例！好可惜，過了一個月左右，我先去了小欖，再過界去了赤柱。去到赤柱之後，再過了個多月，到赤柱醫官召見我，問我有關眼睛問題，為何要申請隱形眼鏡，於是再講一次，醫官都話可以幫我搞，但現在已經係六月尾，你九月出冊，申請得來你都出左去！唉！真係好無奈，只有回答取消申請，我唔可惜自己申請唔到，只係概嘆，如果申請到就可以成為日後手足們可以申請的案例了！也可以成為監獄第一位申請到隱形眼鏡的人。如各位手足有須要，可以學我攞醫生紙，總之有醫生紙，懲教就必定要跟。