Sermō Latīnus Rapidus • Ephemeris, 2004 Jūn. pars 1 (Patreon)

[EN] In order to practice listening to Latin spoken at a normal to fast pace for a native speaker, these news broadcasts, taken from the Ephemeris Archive, have been recited at a rather rapid speed. The quantity of available Latin spoken at such speeds is rather small, and yet students of modern languages may regularly enjoy similar audio programmes to challenge and exercise their listening comprehension abilities.  This project's intention is, in part, to fill that need.

[LA] Utī aurēs nostrās assvēfīant celeritātī cotīdiānī sermōnis Rōmānī patriī, hae ēmissiōnēs āctōrum diurnōrum, ex Ephemeridis Achīvō extrāctae, admodum rapidē recitātae sunt. Numerus tālibus vēlōcitātibus recitātiōnum Latīnārum parum inveniuntur, attamen linguārum recentiōrum discipulī saepiusculē patriō sermōne ūtentibus dēstīnātīs acroāmatīs fruī possunt, ita ut vīrēs audiendī rōborāscant. Hoc igitur coeptum est utī saltem partim removeātur cōgēns illa necessitās.

Original text: http://ephemeris.alcuinus.net/archi2004/nuntii/eph1/index.php

Trānscrīpta:

EPHEMERIDIS 2004 [bismillēsimī quārtī] Jūniī Pars 1 [prīma]

23 [vīcēsimō tertiō] Jūniī prīma nāvis volāns ab homine prīvātō, scīlicet nōn ā regimine cujusquam terrae, strūcta et ōrdināta spatium cosmicum attigit. Gubernātor Mīchāēl Melvill nāvem SpaceShipOne ad altitūdinem 100 [centum] chiliometrōrum super dēsertum Mohāve in Californiā levāvit, ubi trēs per minūtās in statū sine pondere ipse manēbat. Inceptum perfectum est sūmptibus Paulī Allen, quī mercātor Americānus crēdit itinera cosmica post 15-20 [quīndecim vel vīgintī] annōs ā multīs hominibus perāctum īrī.

Kim Sun-il, trānslātor Coreānus linguae Arabicae cui mūnus in Īrāquiā fuerat, necātus est ā tromocratīs factiōnis Al-Qaedae. 33 [trīgintā trium] annōrum Kim ā tromocratīs captus est et ut obses tenēbātur, nē regimen Corēae mitteret 3 [tria] mīlia mīlitum in Īrāquiam pācis restituendae causā. Hoc cōnsilium tamen - ut diē 23 [vīcēsimō tertiō] Jūniī dēclārāvit praeses terrae Rō Mu Hiun - et Kim mortuō immūtātum manet. 

Croātiae ab Ūniōne Eurōpaeā status candidātī, quī ut membrum UE [Ūniōnis Europaeae] esset petere posset, concessus est, proximōque annō ineunte, pacta inter partēs negōtiārī incipientur. Regimen Croātiae spērat sē posse ūnā cum Bulgāriā et Rōmāniā membrum UE [Ūniōnis] fierī Kalendīs Jānuāriīs 2007 [bismillēsimī septimī]. Hārum rērum perītī dubitant tamen hoc tam citō perficī posse crēduntque Croātiam dēmum annō 2009 [bismillēsimō nōnō] Ūniōnem initūram. Multī etiam nōn prō certō habent annō 2007 [bismillēsimō septimō] ipsae Bulgāria et Rōmānia adjungī UE [Ūniōnī] posse - haec 6 [sex] capita negōtiātiōnis adhūc fīnīre nōn potuit, illa, quamvīs dē omnibus capitibus negōtiārī modo fīnīsset, ā Bruxellīs monita est nē quae pollicita in pactandō esset mūtāret (dē ēlectrificīnā nucleārī Kozloduī claudendā inter alia agitur), tunc enim ūnum annum plūs exspectārī accessiōnem cōgerētur.

(Nūntiī ultimae septimānae ā Stanislāō Tekiēlī, Dionȳsiō Wood & Victōriō Ciarrochī scrīptī sunt)