Sermō Latīnus Rapidus • Ephemeris, 2004 Jūn. pars 2 (Patreon)

[EN] In order to practice listening to Latin spoken at a normal to fast pace for a native speaker, these news broadcasts, taken from the Ephemeris Archive, have been recited at a rather rapid speed. The quantity of available Latin spoken at such speeds is rather small, and yet students of modern languages may regularly enjoy similar audio programmes to challenge and exercise their listening comprehension abilities.  This project's intention is, in part, to fill that need.

[LA] Utī aurēs nostrās assvēfīant celeritātī cotīdiānī sermōnis Rōmānī patriī, hae ēmissiōnēs āctōrum diurnōrum, ex Ephemeridis Achīvō extrāctae, admodum rapidē recitātae sunt. Numerus tālibus vēlōcitātibus recitātiōnum Latīnārum parum inveniuntur, attamen linguārum recentiōrum discipulī saepiusculē patriō sermōne ūtentibus dēstīnātīs acroāmatīs fruī possunt, ita ut vīrēs audiendī rōborāscant. Hoc igitur coeptum est utī saltem partim removeātur cōgēns illa necessitās.

Original text: http://ephemeris.alcuinus.net/archi2004/nuntii/eph1/index.php

Trānscrīpta:

EPHEMERIDIS 2004 [bismillēsimī quārtī] Jūniī Pars 2 [secunda]

Quattuor ferē annōs post clādem comitiālem factiōnēs dexterae et mediae imperium in Rōmāniā repetītūrae videntur. In comitiīs regiōnālibus modo perāctīs majōrem partem suffrāgiōrum collēgērunt factiō nātiōnālis-et-līberālis (PNL) et dēmocratica (PD). Tālis ēventus praenūntiāre vidētur clādem fautōrum commūniōnis bonōrum (vulgō ‘socialistārum’) (PSD), adhūc dīmidiam ferē partem sellārum in senātū tenentium, in comitiīs generālibus quae hōc annō exeunte habenda sunt. Sī utraque pars similem numerum suffrāgiōrum cēperit, māximī mōmentī erunt sententiae Hungarōrum in Transilvāniā habitantium, quōrum factiō, quamquam ipsa regiminis particeps nōn est, ut 'umbella' fautōribus commūniōnis bonōrum in parlāmentō praestō est.

Ictū nocturnō contrā aedēs regiminis Ingussētiae — reī pūblicae autonomae Foederātiōnis Russiae in Caucasō sitae — ā bellātōribus Tsetsēnīs factō plūs quam 100 [centum] hominēs vītam āmīsērunt. Circā 200 [ducentī] bellātōrēs nōnnūllās aedēs pūblicās in urbe capitālī Nazran occupāvērunt et quōs ibi repertōs regiminis Russīcī fautōrēs invēnerant, necāvērunt. Posteā, ante lūcem, in montēs fugā sē contulērunt. Inter mortuōs est minister rērum internārum Ingussētiae Abukar Kostojev et āctor pūblicus suprēmus Mukharbek Buzurtanov. Ictus māximā pugnā in regiōne erat post fīnem bellī, ut dīcitur, secundī Tsetsēnī, annō 1999 [millēsimō nōngentēsimō nōnāgēsimō nōnō] perāctī, māximusque dēdecus praesidis Russiae Vladimīrō Putin, quī Tsetsēniam ā Russīs omnīnō pācātam saepenumerō nūper nūntiāvit. Incertum est an et quoūsque bellātōrēs Tsetsēnī ab Ingussīs in ultimō ictū adjūtī sint — sunt testēs quī affirmant incursātōrēs sōlōs Ingussōs fuisse, quod tamen rērum in Caucasō factōrum perītīs nōn vērisimile vidētur.

Factiō praesidis Geōrgiae Mīchāēlis Saakassvīlī victrīx comitiōrum in rē pūblicā autonomā Adzsāriā factōrum exstitit. Illīus Mōtus Nātiōnālis-et-Dēmocraticus 28 [duodēvīgintī ex 30 [trīgintā] sellīs senātōriīs potītus est. Comitia ultimī diēī Sōlis prīmum facta sunt postquam dictātor et fautor sēparātiōnis Adzsāriae ā Geōrgiā Aslān Abassydze mēnse Majō mōtū populī in Moscoviam fugere coāctus erat.

(Nūntiī ultimae septimānae ā Stanislāō Tekiēlī, Dionȳsiō Wood & Victōriō Ciarrochī scrīptī sunt)