Sermō Latīnus Rapidus • Ephemeris, 2004 Jūn. pars 3 (Patreon)

[EN] In order to practice listening to Latin spoken at a normal to fast pace for a native speaker, these news broadcasts, taken from the Ephemeris Archive, have been recited at a rather rapid speed. The quantity of available Latin spoken at such speeds is rather small, and yet students of modern languages may regularly enjoy similar audio programmes to challenge and exercise their listening comprehension abilities.  This project's intention is, in part, to fill that need.

[LA] Utī aurēs nostrās assvēfīant celeritātī cotīdiānī sermōnis Rōmānī patriī, hae ēmissiōnēs āctōrum diurnōrum, ex Ephemeridis Achīvō extrāctae, admodum rapidē recitātae sunt. Numerus tālibus vēlōcitātibus recitātiōnum Latīnārum parum inveniuntur, attamen linguārum recentiōrum discipulī saepiusculē patriō sermōne ūtentibus dēstīnātīs acroāmatīs fruī possunt, ita ut vīrēs audiendī rōborāscant. Hoc igitur coeptum est utī saltem partim removeātur cōgēns illa necessitās.

Original text: http://ephemeris.alcuinus.net/archi2004/nuntii/eph1/index.php

Trānscrīpta:

EPHEMERIDIS 2004 [bismillēsimī quārtī] Jūniī Pars 3 [tertia]

Interrogātiō pūblica dē factiōnibus, quam ultimīs diēbus ācta diurna "Rzeczpospolita" fierī jussērunt, optimātēs Polōnōs crēscere cōnfirmant, populārēs autem plērōsque, inter quōs et iī, quī nunc rem pūblicam gubernant, proximō suffrāgiō ēlēctum nōn īrī neque in Conciliō Nātiōnālī fore.

Secundum hanc interrogātiōnem, sī nunc suffrāgium agerētur, factiōnem līberālem et conservātīvam (PO) ēligerent 26 [sex et vīgintī] centēsimae cīvium, factiōnem nātiōnālem et catholicam (LPR) 14 [quattuordecim] centēsimae, factiōnem conservātīvam (PiS) 12 [duodecim] centēsimae. Quod summātim facit 52 [quīnquāgintā duās] centēsimās optimātibus.

Contrā, factiōnem plēbējam (Samoobrōna) ēligerent 18 [duodēvīgintī] centēsimae cīvium, factiōnem coenōnistārum (SLD-UP, ōlim PZPR) 6 centēsimae, factiōnem agrāriam (PSL) item 6 [sex] centēsimae, factiōnem sociālem et dēmocraticam (SdPl) 4  [quattuor] centēsimae. Quod summātim facit 34 [trīgintā quattuor] centēsimās populāribus; sed neuter in Conciliō forent, priōribus enim, ut societātī factiōnum, 8 [octō] centēsimae necessāriae sunt, posteriōribus autem 5 [quīnque].

Cēterās 14 [quattuordecim] centēsimās occupant factiōnēs minimae.

Dresdae in Germāniā orientālī aedēs ecclēsiae Sānctae Marīae (Frauenkirche) restitūta est, quae aedēs, mediō in forō urbis veteris positā, mēnse Februāriō annī 1945 [millēsimō nōngentēsimō quādragēsimō quīntō] māximā cum parte urbis ab āeroplanīs Anglicīs Americānīsque dēlēta est. Ictus ille, quō saltem 60 [sexāgintā] mīlia hominum periērunt, ā plērīsque rērum gestārum perītīs ut ratiōnibus bellī omnīnō nōn necessārius et ultiōnis potius causā ā regimine Britannicō inceptus putātur. Restitūtiō, quae magnā ex parte pecūniā societātum Anglicārum adjuvābātur, ut signum pācis inter nātiōnēs nunc vidētur: crux aurea, quae diē 23 [vīcēsimō tertiō] Jūniī ecclēsiae superposita est, ā ferrāriō quōdam Anglicō perfecta est, cujus pater gubernātor fuerat ūnīus āeroplanōrum.

Nūntiī ultimae septimānae ā Stanislāō Tekiēlī, Dionȳsiō Wood & Victōriō Ciarrochī scrīptī sunt.