齊來消費香港 (Patreon)

首先，非常，非常之抱歉；唔經唔覺又過咗成十日。每年三月底，時間都好似過得好快。尤其今年要埋數加上去咗灣區嘅香港市集，搞到完全無出文出片。

希望大家多多見諒。

其實去灣區嘅香港市集，都唔係無得著。過去幾個月，去過多倫多以及芝加哥嘅香港人社區中心聚會，感覺係就算美國唔同地方嘅香港人，都有文化上嘅分別，而且都幾明顯。

例如我住呢度嘅大華府，比較多政治明星；佢哋相對出又後生啲，活躍的。呢個社群多啲朝氣，啲人又高調少少。我形容呢，嗯，少少似「學生會」。

好似多倫多呢，成個氣氛唔同晒；好多時一坐低大家都會講吓仔女啲嘢。大家亦都會講吓社會同政治，但好多時都係講加拿大本身嘅政治。我嘅感覺係，如果好粗略咁去講，加拿大香港人總體來講算係「中間偏右」；形象啲咁去描述，我會話似「家長會」。

至於灣區，又係完全另一個感覺。點講好呢？我好主觀咁覺得，灣區嘅香港人社群，好豪邁，好講義氣。我形容呢度似「天地會」。

幾年前返美國，其實無諗過會接觸返美國嘅香港人。坦白講，當時我唔係唔知大華府呢頭有啲香港人，但我覺得自己太主動去接觸人哋，加上當時嘅環境，都唔知人哋會點諗。所以，有好一段日子我都好摺，摺到真係連電話都可以唔駛睇。

後來，因為 The Hong Konger 呢套紀錄片，先至慢慢接觸得多少少呢邊嘅香港人。咁啱香港人社區中心成立，咁我先至叫做有返啲社交。

真係好多感激各位默默耕耘推動香港人社區中心嘅朋友；尤其係 Matthew 。我可以大膽咁講，香港人社區中心可以短短兩年內全球十八個城市都有分陀，好大原因係 Matthew 有包容嘅胸襟，以及凝聚同路人嘅親和力。

呢種領導才能，難能可貴。

我亦都好記得 2022 年 7 月第一次去大華府香港人社區中心嘅活動，令我有個好強烈嘅感覺，就係離開同留低嘅香港人，距離越來越遠。我都唔記得係因為乜嘢原因令我有呢個諗法，總之就係令我覺得，無論點都好，應該要試吓搵一種創作媒介，可以畀唔同地方嘅香港人合作，尤其係仍然身處香港嘅朋友，都可以好安心咁參與嘅創作。

最終我諗，聲音劇應該係好多人嘅集體回憶，又可以只係出聲唔出樣，更加可以保育香港人嘅語言，應該係好理想嘅選擇。

就係咁，今次到我吹雞。吹雞嘅時候，我講到明：「有拖延症嘅我，真係要大家嘅支持先至可以成到事。」

就係咁，港聲你聽呢個組織，基本上由第一日起就係團隊合作，而可以話最無團隊精神嘅人，就係我。又難得大家對我咁包容，尤其係講咁話交稿但可以拖兩個幾月一隻字都無，團員都好似覺得係理所當然。

我覺得自己好似去咗另一個世界咁。

更加神奇嘅係，由成立至今，我哋絕大多數嘅團員都係未見過對方。一直到今次灣區嘅香港市集，我哋先至第一次相認。聽到聲然後先見到個樣：「哦，你就係 Alice！」「喂，大師兄！！」個一刻嘅感覺好超現實；大家好似好熟，但原來係第一次見。

同埋，講多個秘密畀大家知；我除咗有病態嘅拖延症，我亦都有多少面盲嘅問題。其實我又已經唔記得幾位團員個樣，但我好記得佢哋把聲。

常言道，人睇到嘅係現實，但聽到嘅先至係信到十足嘅真理。點解會有咁嘅分別呢？因為聽嘢嘅時候，如果係認真去聽，我哋係會自己製造多一重想像。但用對眼去睇嘅嘢，唔會再想，一就一，二就二。

有想像先至有推理，有主觀嘅立場，有希望同恐懼；真係多好多層次喇。

我又好記得，最初周圍去宣傳港聲你聽，有個好後生嘅記者話：「廣播劇似乎係啲上咗年幾嘅人⋯⋯」我都未聽落去，就笑咗出來；都係嘅，好多嘢其實都好似唔屬於呢個時代咁。

但又咁講，我覺得尤其係今時今日嘅香港，自己一個人靜靜哋咁去聽人講嘢，似乎係更合理，更令人安心，感覺更加私密嘅一件事。

畢竟，我哋兩隻耳仔中間個幾立方寸嘅空間，先至係完全由我哋自己話事嘅地方。

今次去灣區香港市集嘅最大得著，就係令我諗到幾個 project 要去做。之前先至話人生要減法，轉個頭又去諗新嘢。不過，嚴格來講又唔可以話係全新嘅事。話說，早幾個月港聲你聽已經有討論過，係唔係要做兒童故事。不過，講講吓又變咗第二件事。

但其實我哋從來都無放棄過兒童故事呢個方向，只不過係無諗過點可以做得好。

我自己覺得做兒童故事有幾個挑戰。一，大人扮細路好難好聽；二，好嘅故事亦都唔多；三，大人似乎唔係好知啲細路覺得乜嘢先為之過癮。

我都幾肯定，仲有好多挑戰。

呢幾日一路諗：「究竟點先可以行得通呢條路？」但有一件事我同港聲你聽嘅隊員都有共識，就係如果要為我哋嘅文化同語言做啲嘢，最重要一定係小朋友，係香港人嘅下一代。去咗外國嘅就固然係好似失去香港人呢份歸屬感，留低香港嘅亦唔見得一定會繼續可以保存到香港人嘅精神同文化。

我哋有啲想法，但其中有個盲點，亦係呢兩日先至突破得到：「真係想傳承香港人嘅語言同文化，當然係要由小朋友開始做功夫，但咁唔代表一定係由大人對小朋友講故事，亦可以係小朋友對大人講故事。」

聰明嘅你，可能都見到，我哋係好想招募小演員、小小節目主持之類；詳細嘅情況要從長計議，但方向似乎係要小朋友做我哋文化同語言嘅大使；佢哋越早成為香港人文化嘅繼承人，就越有可能將我哋所珍重嘅事情，延續落去。

其實除咗港聲你聽，香港人社區中心其實仲有兩個新嘅項目，但詳情就等適當嘅時候由適當嘅人選去公布。

不過，有件事我想事先張揚。

話說，市集裡面，我見到有唔少檔攤係做文創嘢；又令到我諗到個問題：

「我哋作為香港人，過時過節要送嘢畀朋友，究竟有啲乜嘢係有香港特色嘅嘢？假如有啲嘢可以應返 2024/25 年嘅世界，就更加好。」

順理成章，我有個諗法，不如今年秋天，搞個香港人嘅網上文創展，介紹返世界各地由香港人製作，送禮自用都唔失禮嘅精品。等大家過時過節要諗吓送啲乜嘢禮物嘅時候，多個方向，多啲選擇；一來可以介紹香港文化，二來又可以畀自己香港人呢個身份更加有意義。

要傳承香港人嘅文化同語言，一定要更多人識得點樣良性咁消費香港；甚至乎，呢個亦唔係單單海外離開咗嘅香港人先至關心嘅題目，你睇依家香港嘅情況，其實一樣要思考點樣令香港嘅文化變成有價有市嘅各種產物。

有興趣一齊傾吓呢個題目事嘅朋友，歡迎加入以下呢個新嘅 Telegram Group

(https://t.me/+eO-dJHRtzahiODU1) 一齊傾（好抱歉，之前開咗呢個 Group 但無 follow up ，都係時候重啟返呢件事。

暫時講住咁多先；以上提到語計劃 ，將不定時更新，敬請大家留意。