日股股災牽動環球股市調整潮 (Patreon)

係咪應該沽咁啲手頭上嘅貨？

今日無理由唔講吓日股股災。其實除咗日股，歐、美都見到個別股份有拆倉嘅現象。亦都有朋友會留意到巴郡都套咗唔少現，手頭現金近二千八百億美元。

當然，大家最關心嘅係：「咁我係咪應該沽咁啲手頭上嘅貨呢？」

一，首先，第一個問題係，究竟我哋見到嘅 unwinding 係周期性現象？定係結構性現象呢？假如係周期性現象，而且係一個好短嘅周期，而你手上嘅股票，又係啲一籃子嘅 ETF ，最緊要係你唔等錢使，咁我嘅建議係由得佢。我自己就係咁，因為美股有個遊戲規則，就係食糊嘅話要交稅，但一日唔食糊一日都唔駛交稅。除非話個周期好長，會跌得好多，否則都係一動不如一靜。

二，日股我自己無買。正如芒格話齋，唔識就咪掂。但從一個旁觀者嘅角度，日股呢期嘅升幅，係幾顯著下。最難評估嘅，反而係日本呢一轉起伏，究竟係周期性定結構性嘅轉變。毫無疑問，之前嘅升浪，反映咗市場對日本企業未來嘅憧憬，亦即係擺脫迷失。而我自己嘅觀察亦都係，日本經濟的確有同過去三十年有啲唔同。不過，日本嘅制度性問題，基本上無改變過，只不過係當年嘅泡沫，終於用咗咁多年去消化。所以，日本並非我嘅首選，只係唔識就唔掂。

三，至於美股，大市嘅跌幅唔算嚴重，但個股就明顯好多。科技股，尤其 AI 同芯片等概念，真係吹大咗。無幾耐之前都有講過，唔重覆。但唯一想強調嘅係，有泡沫唔代表時代嘅變化係假嘅；就好似 1999-2000 嘅科網泡沫爆破，先至係科網經濟嘅起步點。所以，唔好只睇股票而忘記咗市場經濟同社會嘅轉變。

四，雖然大家一早都睇死港股，但正正因為呢個原因，港股就算跌都未必會好急。港股同香港其他環節嘅問題，就好肯定係制度性多於周期性。換句話說，跌嘅時候我哋有份一齊，但跌得無咁急，但升嘅時候，香港又無份升。

五，港樓嘅泡沫大好多，亦都更加得人驚。如果真係要擔心，應該擔心香港嘅地產；尤其係香港地產與政府收入息息相關。香港係無條件去面對一次金融危機，如果真係發生嘅話，就真係由一個本身已經出現結構性轉變嘅經濟，因為一次周期衝擊，再帶來更多制度上嘅轉變。而呢件事發生嘅機會一啲都唔低，重點要睇嘅係香港未來一年會唔會有斷供潮嘅出現。要行到呢步，要有兩個條件；一，負資產，就算賣樓都要抬錢去贖；二，供樓嘅人失業又或者收入大減。當負資產個案同失業個案上升到某個地步，好自然就會有兩者同時出現於同一個家庭嘅情況出現。我嘅粗略評估，香港呢個風險一啲都唔低。

六，賣唔賣樓，賣唔賣股票，大家自己決定喇。有一個好重要嘅因素就係：「你買樓，買股票嘅目的係乜嘢先？」「賺錢囉！仲駛問？」借用我朋友李聲揚嘅講法，呢個答案唔係「錯」，只係「廢」。賺錢？升咗唔賣你又點賺錢？「你又點知唔會繼續升呀？」唔知㗎，所以咪要分究竟係結構、制度現象，定係周期現象囉。如果係周期性嘅調整，有閒錢又負擔得到，加注添喇。更重要係，邊個唔知買股票係為咗賺錢？問題係最初你點解覺得你買嘅嘢有「值搏率」，而背後嘅因素仲成唔成立。如果明顯見到最初買入嘅原因已經唔再成立，理性嘅決定係套現。現金，只係代表一個 option ，你蝕嘅通脹，蝕嘅息，就係係為咗保留選擇而付出嘅 option price 。最終，無論你揸乜都有代價，都有風險，有嘢係必贏，呢個係對金錢必須要有嘅覺悟。

七，道聽塗說，過去幾年買樓嘅人，好多都係信香港地產有「剛性需求」，「磚頭長遠最穩陣」。呢種諗法嘅背後，就係假設過去發生過嘅事，未來好大機會繼續出現。不過，呢種思維如果遇到結構性嘅轉變，就會錯得好緊要。

八，再講，香港嘅制度，其實從來都好薄弱；大家都知我講緊乜，不贅。

九，賺錢有好多方法，點解會有人堅持係港股、港樓呢？因為習慣同熟悉。所以，好值得去了解多啲其他市場嘅情況。而明明美國嘅市場水最深（唔係貶義），所以理性上點都應該由呢個市場開始。呢個亦都係美國金融市場好難挑戰嘅「制度優勢」。

十，最後，補充多一點，就係所謂嘅減息。聯儲局減嘅係「短息」；而大家講緊嘅通脹、按揭成本等，係要睇「長息」，亦即係十年、甚至三十年國債債息。目前嘅情況係，所謂孳息倒掛都維持咗好一段時間，而一般來講，都係要等短息回落到一個合理水平。而短息回落，又往往意味市場對「短錢」嘅需求相對上咁減少，而呢啲情況通常都伴隨著一個短期嘅經濟衰退。其實呢次衰退好多人講咗好多次，但睇來今次係「嚟真」嘅機會又大過之前。

十一，但就算係衰退，對美國都係周期現象，對日本都可能係（但我真心唔係太肯定），但對香港就只會係加劇本身制度問題嘅一次衝擊。

十二，至於神奇國度，下回講「習式衰退．點解北京拒絕國基會萬億救市方案」再詳細分析。