後現代嘅娛樂至死 (Patreon)

個個好似食咗炮仗咁，見到同自己睇法唔同嘅，就直接人身攻擊；尤其係 internet 大家都好似戴咗個面具，甚至角色扮演緊咁，人身攻擊變成好似 MMORPG 咁，好似打 Quest 咁，一有啲乜嘢就一齊出征。

我發覺真係唔少人只係想聽一啲自己已經知道，已經相信嘅嘢，完全無諗過去從另一啲角度去睇問題。另一啲角度可能都有不足之處，都有盲點，但佢亦都可以彌補自己嘅死角。就好似選舉呢個題目。我話睇情勢民主黨只要四個 battleground states 贏兩個就得到 270 選舉人票，共和黨就要贏三個先得；而從人口流動同分佈睇，亦似乎對民主黨有利。咁都係一個觀點，最終當然亦有可能錯；任何預測都係有錯嘅可能，到時先知，亦到時再檢討錯在邊度。但有啲人，一心就好憎 Harris ，覺得一定要佢輸，世界先至有希望；我亦都明佢哋點解咁諗，但佢哋就會覺得，你推斷 Trump 會輸，所以就係左膠，就係將自己嘅立場用分析去包裝。其實呢種心態，的確係人之常情，而且係一種好容易被 manipulate 嘅人性。試諗吓，只要講一個人已經相信嘅事，就可以換取信任、甚至崇拜，結果會點？結果咪就係好似啲人，相信邊個邊個執政就可以民族復興，邊個邊個執政就可以建立人類命運共同體。幾乎每次講選舉，我都會好似財經節目咁加句 disclaimer ：「假如你會因為選舉結果而感到不安，咁就代表你所相信嘅唔係個制度，唔係相信民主，而只係相信某個政黨，甚至政客。」點解要加呢句？因為不論係我自己，亦或觀眾、讀者，我哋支持嘅政客都可能會輸，咁佢哋輸嘅話，一嘢就跳去結論，話個制度崩壞，咁你又有冇諗過，點解社會有另一類人？有另一種意識形態？了解其他想法嘅來龍去脈，唔代表你要認同又或者接受，但咁做會令你知道個世界更大，比你所想嘅更多唔同嘅想法。人類文明嘅進步，好多時係因為大家可以逐漸將唔同嘅觀點 reconcile ，搵出更高層次嘅 common ground ，然後見到啲從前發現唔到嘅問題。另一邊廂，不論係閉關自守嘅社會，抑或係自以為是嘅人，佢哋最大嘅問題就係往往相信世界有一套已經存在而不可以被挑戰嘅絕對真理，而且可以解釋到一切。佢哋唔認為社會需要進步，亦見唔到自己嘅思想可能有死角有盲點。就係咁，佢哋就只會不斷尋求啲肯定自己信念嘅證據，否定啲同自己睇法有相差嘅觀點，甚至就咁走去攻擊其他人。好多人眼中，立場決定一切。但如果真係明白事理嘅，應該係以證據、邏輯去決定對一件事嘅判斷，乜唔係咩？我咁講，亦都係泛指光譜兩邊，以至唔同意識形態嘅所有人。有啲人可能甚至會以為，立場同自己一樣嘅就係好人，同自己意識形態有別嘅就係壞人。呢個亦係點解個社會變到好似今時今日咁，個個好似食咗炮仗咁，見到同自己睇法唔同嘅，就直接人身攻擊；尤其係 internet 上面大家都好似戴咗個面具，甚至角色扮演緊咁，人身攻擊變成好似 MMORPG 咁，好似打 Quest 咁，一有啲乜嘢就一齊出征。再講一次，唔同政治立場嘅人，一樣都有呢啲表現。甚至乎唔一定係政治，娛樂、財經、體育以及日常各種諸事八卦，都可以係咁。例如財經，睇淡同睇好；娛樂就係「鏡」定游學修；體育就更加唔在講。講到尾，以上嘅現象，我覺得都係「後現代嘅 #娛樂至死 」。我明每個人都想追求認同，想發洩，但教化嘅目的，就係希望人可以人可以克服呢啲原始嘅衝動。所以，呢個唔係立場嘅問題，而係態度嘅問題。當然我其實好清楚自己都會有立場先行嘅時候，所以就更加在意要提醒自己。所以最後，加返我成日提醒自己果句：「唔好令自己變成自己最憎個種人。」