中共為甚麼要審黎智英？ (Patreon)

早幾日參加一個活動，有個洋人問：「點解中共唔就咁解決咗黎智英？咁咪一了百了囉？」

講返呢個活動，其實係 Mark Clifford 嘅新書發佈會；我都只係觀眾席參與吓，叫做支持吓。而剛才提到嘅呢條問題，背景係新書發佈會有討論到啲專制極權政府，點樣對付異見人士；「解決」嘅意思，大家亦都心知肚明係點解。

發佈會完晒之後，我同幾位相識嘅朋友，繼續討論呢個題目，而我嘅睇法就係：「一個活生生嘅黎智英，對中共更加有用。」

點解咁講呢？中共嘅目的，係要摧毀黎智英呢個符號；黎智英代表咗啲乜？佢代表一種香港人，一個逃離中共極權，係香港獲得自由以及一切機會，然後獻身於維護呢個地方嘅自由同各種普世價值。五、六十年代嘅香港，有唔少好似黎智英咁嘅人，佢哋選擇咗做香港人。當時嘅香港，生活唔算好好，但經過幾代人嘅努力，最終呢個地方，成為我哋所認識嘅香港。

假如中共用「唔經大腦」嘅手段去「解決」黎智英，咁除咗向全世界講：「吹咩？」更大嘅問題就係，中共亦都將黎智英呢個人，提升到一個精神層面，就好似香港嘅 Martin Luther King 一樣，傳頌千古，百世流芳。

無錯，的確有人相信，十年、廿年後，可能一切記憶都會淡忘。但今時今日嘅世界，多得資訊科技革命，集體回憶嘅半衰期長咗好多；而且我哋個個都活得更長，亦都有好多人致力去保留呢啲歷史。由 2019 年到今日過咗都五年，但大家對於好多發生過嘅事，仍然歷歷在目；十年、廿年甚至五十年之後，香港嘅歷史，仍然唔會消失。

所以，中共嘅目的係改寫歷史；改變歷史，首先就要將當中嘅人改變；要佢哋公開認罪，要人格謀殺，摧毀咗佢哋嘅人格同聲譽，呢啲人就再無任何價值，到時係咪解決佢哋都已經唔再重要。

所以蘋果案裡面，要其他人去做從犯證人，令人覺得黎智英眾叛親離。

中共最希望係黎智英會屈服、認罪；但佢哋太過低估黎智英。

坦白講，我明白呢班前同事，想透過妥協去換取減刑。但理性上我覺得佢哋其實太過天真。理論上，佢哋作供之後，對中共已經無任何剩餘價值，亦無任何討價還價嘅籌碼。

我甚至乎覺得，因為黎智英繼續企硬，反而幫咗呢幾個人；中共甚或會想佢哋再去盡啲，再講多啲方天夜譚，咁樣佢哋先至繼續有利用價值。

所以，從博弈論嘅角度，黎智英亦只可以一直企硬落去，呢啲不但只係為咗道義，為咗忠於自己，亦都係對所有人來講，係最好嘅選擇。

中共亦會繼續做一直所做嘅事，去搵唔同嘅方法去嘗試摧毀黎智英呢個人，要改變世人對佢嘅觀感。

從捉棋嘅角度，呢種情況叫 Stalemate；當對手以為你一定輸，而你又無得贏，可以做嘅，係令佢無得贏。

我將呢個想法講畀大家聽，因為要雙方知道呢局係 Stalemate ，先至會收手。

Mark Clifford 新書發佈會上，佢講咗句我非常之認同說話：「過去幾年都無機會接觸到黎智英，但從佢上庭作供嘅時候可以見到，呢幾年苦行僧嘅生活，令佢更加堅強，更忠於自己。」

宗教信仰，畀黎智英有更多嘅智慧；黎智英係 1997 年主權移交後受洗，當時佢覺得自己，有朝一日會需要信仰嘅支持先至可以生存落去。

順帶一提，我唔係教徒，但我唔係無神論者，我係「不可知論者」（Agnostic）；我相信人類永遠都證明唔到神到底存在抑或唔存在；呢類問題係哲學上、邏輯上，都係無法清晰定義，亦唔會有明確嘅最終答案。

但我明白信仰嘅力量；不論係宗教，抑或係其他各種世俗嘅信念；信仰對個人，對社會，都有一定嘅意義，而事實上我哋每個人對乜嘢係道德，亦都係來自於呢啲信念。有啲人認為自己乜都唔信，其實佢哋只係唔知道自己所相信嘅係乜。

聖經福音裡面，有幾句話係有好大嘅力量，就算對我呢個俗世嘅凡人，一樣有好大影響。

「父啊，赦免他們，因為他們所做的，他們不曉得。」（路加福音 23:34）

「你們不要論斷人，就不被論斷；你們不要定人的罪，就不被定罪；你們要饒恕人，就必蒙饒恕。」（路加福音 6:37）

佢對其他案中嘅證人，可能會諗起呢兩句；當然，對於其他人所講嘅大話，佢都要兜口兜面咁去反駁，但係都只係對事不對人。當法官同檢控官都不斷嘗試要證明黎智英「煽動仇恨」，黎智英嘅回應都係講返佢對自由嘅信念，講返佢對香港呢個地方嘅愛。

佢所做嘅一切，都係出於信念同感恩，別無其他；佢亦都唔會憎恨政權、審佢嘅法官、作假證供嘅前同事等。

另外我想補充嘅就係，佢從來都無叫過任何人要抗爭到底。我自己就係一個半途而廢嘅代表，佢亦都無話過我半句。記得 2010 年我第一次辭職話要返美國，當時香港嘅環境仲好安全，佢話：「Simon，你嘅未來係香港，就咁走咗好可惜。」

但 2020 年個次，佢好支持我返繼續美國生活，佢亦都無叫我以後要點樣，要做啲乜。

「我的朋友們，我告訴你們，那些殺害身體的人一之後不能再對你做什麼的；不要怕他們。我要指示你們該怕的是誰：是那些那殺了以後，有權柄把人扔在地獄裡的；是的，我告訴你們，正要怕他。」（路加福音 12:4-5）

有宗教信仰嘅朋友，尤其係基督徒，對以上呢句可能有更多嘅解讀，例如邊個先係有真正嘅權柄，地獄代表乜等等。但作為一個俗人，我唔知道人死燈滅後仲有冇靈魂，靈魂會點樣存在，我只會從字面去解呢段文字。

對我來講，信念唔可以被子彈所摧毀，ideas are bulletproof；離棄咗信念，就連自己兩隻耳仔中間個幾吋自由嘅空間都會失去。

請容許我用另一位俗世嘅哲學家 Marcus Aurelius 所寫嘅幾句話，作為今日呢篇隨筆嘅結語：

「最完美嘅報復，就是唔好成為傷害你個啲人咁嘅樣。」"The best revenge is to be unlike him who performed the injury."

最後，今日係黎智英嘅生日：「師傅，我祝你永遠都得到平安。我哋一定會再相遇，唔係天國，而係英國、美國，到時再同你去食好嘢。」