【DeepSeek】深圳福田引入 70 AI 公務員 (Patreon)

何謂 Agentic AI？AI 取代記者定係傳媒業自暴自棄？

今日三個重點：

01，自從 DeepSeek 一石激起千重浪，中國就乜都 AI 。福田政府引入 70 個 AI 公務員，與其話要來改善服務又或者減省成本，倒不如話係深圳政府知道上面要啲乜。你睇香港特區政府？就連呢樣嘢都慢三拍。所以啲京官成日「提醒」呢個政府，唔係無原因。

02，依家 AI 嘅應用，好多人講 Agentic AI 。其實唔需要諗到太複雜，Agentic AI 即係將一連串要做嘅，又或者要思考嘅過程，變成一個自動嘅流程。但我睇怕呢個都係一個過渡性產後，因為 AGI ，即係 Artificial General Intelligence 要做到嘅，就係連呢啲倒模嘅流程都唔需要。補充一點，依家嘅 reasoning model 唔係做唔到，只不過係成本好高。最近睇咗份 paper ，睇怕今年內呢方面都會有突破，距離 AGI 又近一步。

03，搵呢單新聞嘅時候，發現好多報道係互相抄襲嘅。我都明今時今日做記者，真係好似無乜前途，但呢個現象亦都令某啲要帶風向嘅人更易達到目的。以前傳理系教啲記者唔可以有個人立場同觀點，但我覺得如果無立場同觀點，記者咪唔識問問題囉，咪變成呢啲抄新聞嘅報道囉。記者嘅第一個立場係：「呢單新聞背後有乜嘢 agenda ？」