【澳洲經濟】 生產力降至 2016 年水平．十年人均收入微增 1.5% (Patreon)

大寶雪梨來鴻 https://www.patreon.com/cheungtaibo

補充以上 Podcast 無講到，之後先至諗到嘅一啲 after thoughts。

主流討論經濟增長，多數睇每年 GDP 嘅數字；但識得睇一定會睇埋生產力。有啲會睇 Total Factor Productivity、有啲睇 Multifactor Productivity ，唔同國家嘅統計方法都有啲唔同，但同一個國家用長時間去同自己比較，就更有意思。

技術細節唔多講，生產力變化嘅重點，係量度企業嘅「輸出÷輸入」。換句話說，用越低成本經營又能夠帶來越高收入嘅，就係生產力上升。

有啲人唔認同經濟只有企業，即係私營部門，覺得政府開支都好緊要，例如社會安全網、教育、醫療甚至公共交通。不過，有啲國家，例如英國，就係因為政府開支佔 GDP 比例越來越高，同時間又見到生產力增長放緩。究竟兩者有冇關係？更正確一啲咁講，究竟當中有乜嘢關係？邊個係因？邊個係果？定兩者背後有一個共通嘅因素？

呢個係一個可以 testable hypothesis ，所以唔需要估估吓。大多數嘅研究都發現，長遠來講，政府開支佔 GDP 越多，尤其係超過某個水平，就會影響到生產力嘅增長。用常識去推理，政府開支唔係用稅去支撐，就係發債；但無論用邊一個方法，都會影響到私營市場嘅資本。國進民退嘅結果，無論邊個國家結果都係一樣，就係效率低。

但澳洲嘅情況好特別，就係政府嘅開支佔 GDP 比例算係低。呢個現象就好值得研究。如果根據以上嘅討論，見到資金流入澳洲，唔係投資天然資源，就係地產。

之前講中國經濟嘅時候都有提過，就係地產帶動嘅 GDP 增長，其實係「低質嘅生產力」。天然資源其實情況都類似，往往都係因為國際價格而造成國內嘅經濟周期。澳洲嘅情況，我認為好重要嘅因素，係天然資源出口嘅收入實在太過豐厚，反而造成一種「路徑依賴」嘅現象，就係最搵錢嘅行業、最叻嘅人往往都去咗呢啲第一產業。結果，做高增值嘅第三產業嘅人，往往要出到去外面嘅世界先至可以有機會發揮。

話說回來，澳洲嘅環境其實又唔係咁差嘅，係啲樓貴啲；全世界都係，你最理想嘅居所，一定都係貴嘅。下次點都要講吓澳洲地產同金融業之間嘅關係；因為如果有一般嘅計算，澳洲嘅樓市都真係幾泡沫化，但又一直都無事發生。唔係黑心想佢有事，而係經濟現象短期可以偏離基本因素，但總唔可能長期地違反地心吸力。