【是日隨筆】 溫柔嘅力量 (Patreon)

正話「心繫香港．為大埔宏福苑居民集氣」嘅中場吹水環節，同 「住加男人－CanMen」 講到構思呢個特備節目嘅時候，忽然爆出一句「溫柔的力量」。

真係，連我自己都打咗個冷震。

無心嘅。其實個一刻我個心係諗：「成件事想說明啲乜？就係話畀人知，可以悲哀可以憤怒可以無奈但亦都可以好淡定淡然；無衝突，無抵觸。」

係，我知，近來講多咗粗口；有啲人覺得好 out of character 。咪傻喇，讀咗七年男校，啞嘅都識畀中指啩。

只不過，我又知道，成熟嘅表現，就係克制。

克制唔係壓抑。克制，係知道將能量集中係應該集中嘅地方。

發洩，係因為唔知道可以做乜。但當你知道乜嘢係重要，乜嘢係控制之內，你就唔會選擇去發洩。

其實呢場表演，應該都係香港公民社會嘅一次嘗試。係，最初，好多嘢我哋想做都做唔到，連捐錢都想捐畀李嘉誠，但諗諗吓，又係咪咁無力呢？

眾生皆苦。其實世界各地嘅香港人，根本都面對唔同嘅挑戰；當然，有啲人所面對嘅挑戰係更加艱鉅。所以構思呢個音樂會嘅時候，我諗幾個好重要嘅訊息係：「it is okay to be not okay」、「有需要出聲，幫你唔到最少都有人肯聽」⋯⋯

成個音樂會，其實都好貫切呢個感覺。

但如果真係要用一句說話去概括，我會話：「溫柔嘅力量」。

溫柔，唔係軟弱。

因為珍惜香港人嘅文化同情誼，我哋先至會去想做一啲事，去令大家都過得更好。

六年前，我哋好多人都係香港。今時今日雖然大家身處世界各地，但我見到香港人嘅公民社會不但更多元，我哋對呢個族群嘅反省更深切，更加認真去諗吓可以做啲乜。

呢啲，就係克制，就係溫柔嘅力量。