【是日隨筆】爆機 (Patreon)

過去幾個星期，好疲倦；大概應該係十二月開始。大家亦都應該發現，我出片少咗，甚至乎連文章都少咗。

其實一開始嘅時候都唔係好知點解，但漸漸發現問題係自己生活上一個好細微嘅改變。

以前我唔相信人會 burn out ：「攰，自然會識得去休息㗎喇。」

原來，人，真係會唔識得休息。

我好鍾意同時間睇幾本書；呢本睇幾頁，擺低，另一本又睇幾頁。我做 research 都係咁，呢個題目呢幾份 paper ，擺低，然後就睇另一個題目。。例如上個月對 Peter Turchin 提出嘅 Cliodynamics 〖1〗好感興趣，又因此令我重新去了解 Complexity Theory 〖2〗同埋想學吓點樣用 Python 去 Model 啲 Agents 嘅互動〖3〗。

同時，唔知點解，有日我又忽發奇想：「嗯，點解唔同嘅文明，都會有人死後會去邊 、地獄無點樣嘅想像？一係就當中有啲關連，例如呢啲故事透過古代嘅貿易網絡慢慢傳播開去；一係，就因為人類意識運有啲共通之處，好易產生類似嘅聯想。」如是者又走咗去睇返 Carl Jung 、Joseph Campbell 。

但以上呢兩個題目，都唔足以令我咁攰。一直以來，兩、三本書，兩、三個題目，我都可以處理得到。有樣嘢我覺得自己都算係比平常人更優勝嘅地方，就係好似大纜都扯唔埋嘅幾件事，我都可以搵到啲當中相關連之處。例如以上嘅兩個題目，好明顯係可以從各位典籍，睇返當時對於「人嘅死後世界」有啲點樣嘅描述，再對照呢啲典籍出現嘅時間、地點，以及當時世界各地嘅歷史發生過啲乜嘢事，先做一個非量化嘅分析，然後再諗吓點樣從量化嘅角度去驗證各種推測。我未去做 literature research ，唔知有冇人已經做過類似嘅研究。但如果有嘅話，都無乜人從歷史嘅角度去思考哲學上，形而下嘅現實世界，點樣改變我哋對形而上嘅認知。呢個哲學題目唔新，但個方法就係真正嘅學術。

五年前，我唔會用上面嘅方法去睇問題。AI 嘅出現，對我最大嘅改變，係令到我思考嘅時候，好似畀自己指令咁，然後再收集返啲答案；再問，再答，再問，再答，再問⋯⋯

所以，好嘅問題，係應該會衍生更多問題。試問咁，個人又點會唔攰？點會唔 overflow ？點會唔爆機？

我成日都有呢個問題，就係覺得好嘅 idea 唔去實現好似好可惜；但係將呢啲 ideas 寫低都好吖。當然，咁樣都只係令到爆機嘅機會遲啲出現。

「休息吓囉。」係喎，人攰，自然就會休息；唔係咩？

唔係。

我想休息，但啲 ideas 就好似 background 嘅 program 咁繼續虛耗資源。我諗好多人都好似我咁，無晒 ram 。

真正嘅休息，係要 cut off 一吓。但好衰唔衰，我又停止唔到去睇吓片，唔係真正休息。

〖1〗Clio 係歷史；Cliodynamics 即係用 modeling 去解釋歷史，Cliometrics 即係用計量經濟學去解釋歷史。呢啲都係近廿年先至興起，嘗試用計量嘅方法去了解啲傳統嘅知識範疇。如果話廿世紀係乜都要變成「科學」，廿一世紀嘅學術世界，乜嘢都要變成「模型」。

〖2〗Complexity Theory 又係一個有咗電腦模擬之後先至大行其道嘅知識領域。從前，我哋會想將宇宙歸納到一啲好簡單，一對一，甚至係線性嘅關係。但自從有咗電腦模擬呢個方法之後，我哋可以「睇到」好多唔同互為因果嘅關係之間點樣互相影響。Complexity Theory 主要有兩個好重要嘅啟示：一，就算係好簡單，只有兩、三個互為因果嘅關係，都可以有好複雜嘅變化；開始嘅參數有少少唔同，整個發展就己經可以好唔同。二，有啲現象係「湧現」（Emerge）出嚟；例如一粒水分子唔會有「濕」呢個現象，但一攤水就會有「濕」呢個形容。

〖1〗我無乜 Computer Science 嘅基礎，但 AI 真係好幫到手。