【香港春秋】後冷戰．紙醉金迷．盛極而衰 (Patreon)

一，考考大家（唔準 Google 㗎！），以下幾間公司成立於咩時代：（1）煤氣公司（2）香港電燈（3）中華電力

二，【題示】煤氣街燈，係工業革命嘅象徵，而電燈，就係現代嘅標誌。英國，都係去到維多利亞時代（1837-1901），先開始廣泛使用煤氣燈。而愛廸生嘅第一間發電廠，係 1882 年開始向英國倫敦供電。乜愛廸生唔係美國人咩，點解第一間發電廠係英國嘅？當年嘅倫敦真係世界最繁榮嘅城市；愛廸生係生意人，美國搞創科，但英國倫敦先至係市場。另外，其實當時仲有好多人搞電力，愛廸生只係其中一個。正如我經常講，個人嘅因素真係微不足道；歷史，係時勢做英雄，無話無咗邊個唔得。

三，洋務運動（1861-1895）主流嘅觀點都認為係失敗嘅；清帝國亦都係因為未能與時並進而被歷史淘汰。但客觀咁睇，同一個時代嘅歐美各國，其實又唔係超前好多；清帝國亦唔係想像中咁封閉落後。所以，如果純粹話清帝國覆亡係因為改革失敗，係唔全面嘅。日本明治維新（1867），可以話係成功移植現代；但其實安土桃山時代（1568-1600）嘅日本，都已經開始接受歐洲嘅事件。日本嘅冶金技術，亦唔失禮。同樣，明治維新之前嘅日本社會，亦都唔係普遍想像中咁落後。讀歷史好易產生嘅錯覺，就係將某啲年代分水嶺，睇成一個突變。歷史，永遠都係漸變；但事情往往要經歷好長時間嘅醞釀，到浮現嘅時候無乜人留意到，然後時機成熟，忽然間好似狂風掃落葉咁顛覆既有秩序。

四，好記得當年讀比較政治，其中一個理論就係現代化嘅過程越係漫長，越少流血衝突，得出來嘅新秩序就越傾向穩定而且自由同包容。教科書裡面嘅例子就係英國同法國。咁當然兩個獨例嘅意義有幾大，可以討論；但基本概念例如「現代 vs 古代」嘅定義係咩等等，其實都值得探討。

延伸閱讀：比維多利亞更維多利亞的香港 

五，由洋務運動到後來嘅民國，中國無論係經濟生產力抑或制度嘅改革，都係進三退二。但歷史嘅偶然之下，十九世紀中，香港移植咗維多利亞英國；之後一百年嘅香港，雖然係以華人為主嘅社會，但亦都係一次制度嘅 controlled experiment。

六，更重要係，香港嘅進步，近乎完全來自吸納外來嘅事物。我唔會話香港人無自己嘅創造力，但事實係我哋不但唔抗拒外來嘅事物，甚至會令人覺得我哋崇洋。好多人講到明治維新成功令日本「脫亞入歐」，咁香港又算係咩呢？咁講，又會唔會得大中華主義者呢？務實主義，睇結果，而唔係睇動機。就算當年英國人完全出於私利，結果香港又係咪佢哋口中所講嘅「民族恥辱」呢？

七，其實早在 1945年，即戰後重光之後， 港督楊慕琦就曾經提出要成立一個 30 人嘅市議會；一半係華人，一半係洋人，三份二係直選，三份一係功能組別。另外，改組立法會，將官守議席減到七位，增加非官守議席到八位。不過，之後一年楊慕琦就被退休，原因不明。

八，【題外話】根據 Wikipedia，楊慕琦同彭定康「在香港並沒有任何道路或建築以其名字命名」。無獨有偶，呢兩個港督任內都嘗試推動政制改革，但最終唔係不了了之，就係被推倒重來。

九，接任楊慕琦嘅係葛量洪。根據《葛量洪回憶錄》：「香港問題係大英帝國同中國嘅關係，唔可以當係一般嘅殖民地咁看待，由民主到自治唔合適，獨立就更加唔可行。」所以，楊慕琦計劃亦都「唔再講即係唔存在」。

十，1925年，葛量洪23歲嘅時候，就第一次來香港。之後佢試過學廣東話，後來去北京學北話，係正牌嘅「中國通」。由26歲個年開始，佢響香港做咗十年特別助理輔政司。但第二次世界大戰爆發之前，佢話見自己冇得升喎，所以1935年申請調去百慕達，減人工六成都冇所謂。

十一，雖然冇證冇據，但似乎葛量洪都應該知道香港係一個無險可守嘅地方。話說，1936年駐港英軍司令提交左一份《香港防衛計劃》，都講到明無海軍支援香港基本上係無得守。點解會有份咁嘅報告呢？就梗係因為要做 contingency planning 喇。

十二，【題外話】好多人講到1939年9月德國攻入波蘭，歐洲各國方如夢初醒，知道爆發世界大戰。實情係，由1936年開始，已經有好多不尋常嘅事件，包括：日本陸軍軍官策動政變（雖然失敗收場但都反映軍國主義嘅力量）、德國違反《凡爾賽條約》派軍進駐萊茵蘭非軍事區、納粹德國同日本簽署《反共協定》（Antikominternpakt）等。

十三，當年殖民地部派葛量洪做戰後港督，多少都因為佢熟悉香港嘅情況。更重要係，第二次世界大戰嘅時候，葛量洪響百慕達牙買加做官，同美國合作有功，最終升職做斐濟總統兼西太平洋高級專員。葛量洪有所謂嘅國際視野，似外交官多過殖民地官。

十四，睇返葛量洪嘅經歷，都明白佢點解傾向顧存大局，要「睇定啲」。但佢上任無幾耐，中共就成功奪國。英國保守黨1950年上台，就立即同中共建交。

十五，另一邊廂，五、六十年代，北京多次明確表示，要保持香港嘅特殊地位，唔會收返，但亦唔會畀香港獨立。根據英國嘅解密文件 FCO 40/327，周恩來曾經講過：「任何將香港變成自治領的行動，中國均會視之為非常不友善的舉動。中國希望現時香港的殖民地政治狀態，絲毫不變。」中共嘅華僑事務委員會主席廖承志 1960 年接見香港工會訪京團嘅時候就話：「如果香港走向自治，就係非常時刻，中共會毫不猶疑解放香港、九龍同新界。」

十六，【上回提要】冷戰期間香港最主要歷史分水嶺，係1967年。我哋所認識嘅香港社會經濟政治文化，成型於七零年代，香港人亦同時建立出一種獨特嘅身份意識認同。歷史文件反映，當時倫敦係有意令香港同中國大陸嘅文化出現差異。不過，當時嘅香港已經超過一百年嘅殖民地歷史，加上戰後香港嘅特殊環境，出現香港人嘅身份意識認同，雖然係順水推舟，但唔可以完全話係刻意佈局。

延伸閱讀：【香港春秋】身份認同與制度建立  

十七，中國大陸嘅人，曾經覺得香港係佢哋通往世界嘅窗門。洋人眼中嘅香港，又係一個中國人嘅地方。所以，1969年 Richard Hughes 就寫咗本「借來嘅時間、借來嘅地方」（Borrowed Place．Borrowed Time），呢個講法亦成為主流對香港嘅認知。

十八，但我會從另一個角度睇香港：「出處不如聚處」。正如上面所講，香港雖然本身無咩創造力，但講到聚集人力物力，香港又確係好成功。香港人身份意識認同建立嘅過程，亦好反映到呢種虛懷，呢種包容能力。例如無綫電視當年嘅皇牌綜藝節目「歡樂今宵」，係抄返來嘅，連主題曲，都係抄嘅。八十年代嘅香港流行音樂，好多都係改編日本歌。細細個學成語，會話「青出於藍」代表成功；重點係，唔好因循守舊，每個新版本，都要比過去更出色。改變嘅出現，唔會突然而來；所以先至要從現有嘅事物去改進。

十九，「滿招損，謙受益」最能夠代表香港盛極而衰嘅一幕，我會擇《我至叻》：「叻，我至叻，我哋玻璃可變鑽石⋯⋯」呢個時代流行文化嘅分享，我推介狼耳街華人李聲揚呢篇：從「我至叻」看港豬是怎樣煉成的 

二十，公道咁講，香港盛極而衰，唔淨係因為主權移交，但一定有關。香港嘅淪落，亦唔係呢兩三年嘅事，但最明顯嘅轉變，又確係過去幾年先至浮現。我感興趣嘅問題係，點解去到九零年代，忽然咁多吹奏香港最高最強最大最最最最最？或者一切都要由1979年講起。

廿一，1978年12月16日，中美公布正式建交，兩星期後，1979年1月1日，中美建交公報正式生效；美國首次確認：「中華人民共和國政府是中國的唯一合法政府」。1979年1月28日到2月8日，鄧小平以中共中央副主席嘅身份訪美。同年3月，港督麥理浩訪京，確認中方決意要收回香港；同行嘅行政局非官守首席議員簡悅強，返香港之後就辭任，並且漸漸退出政壇。呢段往事，又令我諗起一句說話：「先知，咪就係早你少少知。」

廿二，重整資料，似乎當時北京好肯定要「收返」；但點樣收，幾時收，就似乎未有具體方案。所以當時中南海負責香港事務嘅領導人，就頻頻接見香港各界。一直去到 1980年底，先至有「對港十二條」；亦係後來所謂嘅「一國兩制」。

廿三，中共幾乎所有重大嘅方針政策，都係換屆時公布。1982年，係中共十二次全國代表大會，亦即係所謂嘅十二大。呢次嘅重大改變，就係中共嘗試確立一個少數人把持嘅集體統治，以中共中央委員會總書記，取代黨主席成為最高領導人。換言之，中共中央委員會，就係名義上嘅集體統治階層。但正如之前所講，黨、政、軍，中共真正嘅實權來自軍隊。中共歷史上最後嘅主席，係胡耀邦，而佢嘅任期為 1981年6月29日到1982年9月1日。

廿四，雖然話由鄧小平1977年復出，到1978年提出開放改革，佢好似係中共最高話事人。實情係理論上華國鋒先至係中共黨內嘅第一人。華國鋒失勢，係 1979年之後嘅事。華國鋒同鄧小平嘅最大分別，就係後者得到美國嘅承認。【題外話】大家近年成日引用鄧小平 1974年聯合國大會上面話「中國永不稱霸」嘅發言，其實都係佢代表中共第一次去聯合國發言。當年好多人以為，鄧小平係溫和鴿派，華國鋒同其他擁護老毛路線嘅就係鷹派。

廿五，中共嘅派系矛盾一直存在。相信亦因為呢個矛盾，所以由1979到1982年，明知有香港前途問題，北京都只係派人收買香港商賈同才俊。一直到1982年9月，鄧小平先至接見戴卓爾夫人。

廿六，由1981年到1984年12月簽署中英聯合聲明，香港人其實一直活在 wishful thinking（oh my, the line rhymes!）。當時有人以為香港可以繼續保持係英聯邦一員，又有人相信真係有「港人治港、高度自治、五十年不變」。實情係，中共眼中「港人治港」嘅意思係唔會派個非香港永久居民做行政長官，就係咁多。「高度自治」就係國防外交以外，你哋自己執行，執行咋，冇話過決定嘅時間唔駛考慮中央嘅宏觀政策㗎。至於「五十年不變」，反正最終都有個完結；畀個便宜嘅希望大家，何樂不為？

廿七，近年，我甚至有更多理由相信，「一國兩制」唔係單方面為咗「畀香港人一個安心」。曾幾何時，普遍有個諗法認為，只要中國大陸慢慢接受自由貿易同資本市場，最終都會觸發社會同政治制度嘅改革。不過，香港以及一國兩制呢度防火牆，由1980年代起，一方面畀中國大陸連到國際資本主義嘅網絡，但同時又唔需要改革自己嘅制度。

廿八，五十年不變，亦可以理解成：「五十年後，中共終於證明一黨專政下嘅科學計劃經濟更加優越，到時香港人會好樂意放棄過去民族恥辱嘅包袱。」近年呢種諗法，就更加主流。

廿九，但返去八零年代，當時中共決意要全面接收香港，又要同毛澤東時代一刀兩斷。當時香港其中一個功用，就係證明中共唔會走回頭路。

三十，中英聯合聲明之後嘅香港，有人選擇移民離開，但亦又有人北上搵銀；再宏觀少少，八十年代中，日本泡沫經濟帶旺亞洲各國，英美就受惠於列根同戴卓爾夫人嘅 supply-side reform，甚至歐洲嘅景氣都好過七十年代，呢期真係到處都係機會。假如回到未來訪問當時嘅人點睇未來，我估唔少人會話：「諗咁多做咩吖？最大嘅恐慌，係窮呀！」要知道，呢一代香港人，真係窮過，亦都見過大陸有幾咁窮，對佢哋來講，只有發財，方能立品。所以，如果按當時嘅軌跡發展落去，又真係唔需要太擔心國家大事。最緊要，係自己唔可以窮。

三十一，與此同時，大陸嘅意識形態都逐漸開放；1985年鄧小平接見美國商人嘅時候，話自己一向嘅立場都係：「讓一部份人先富起來」。由1982到1986年，可能係中共近代最虛懷若谷嘅時代；呢一段日子嘅開放改革，如今睇返，就好似春天。

三十二，1986年，戈巴卓夫當選蘇維埃中央委員會總書記，並且提出 perestroika。同年底，即係中共十三大之前一年，爆發丙寅學潮。某程度上1986年嘅丙寅學潮，可以視為1989年學運嘅前傳。當中唔少議題同人物，都互有關連；情況就好似 2014 年同2019年香港兩次社會運動。

三十三，1986年，世界正式步入後冷戰；其實再過多幾年，就幾乎成個共產陣營瓦解，就只剩底北韓、古巴同中共。有理由相信，八零年代中嘅中共，黨內唯一嘅共識，就係唔可以走回頭路，但要點行落去，就無一個明確具體嘅目標。所以，鄧小平可以呢頭見美國人就話：「讓一部份人先富起來」，轉身就射個三分波，反對「資產階級自由化」。1987年1月，中南海一眾中共權貴召開「生活會」，車輪戰咁力數胡耀邦嘅不是。結果，胡耀邦辭職，由趙紫楊頂上。【題外話】當時唯一撐胡耀邦嘅，就係習近平老頭習仲勳；佢話咁樣文革式批鬥係唔啱規矩。

三十四，再過多兩年幾，1989年4月，胡耀邦心臟病發，群眾去天安門廣場悼念；餘下的，都是歷史。

三十五，唔理順個人利益與集體利益嘅矛盾，貪腐，只有變本加厲。唔解決權力制約嘅問題，就久不久爆發一次社會事件。

三十六，中共嘅開放改革，開放一部份，但又唔開放其他，結果就梗不平衡。不平衡，唔單指利益分配嘅不平衡，而係權力嘅不平衡。八十年代中國社會面對嘅新問題之一，就係貪腐，亦即係以權謀私。窮嘅時候，有權，最多咪可以玩下女（好似毛澤東）；但有錢之後，就唔止玩女咁簡單。最初嘅貪腐，利益金額可能係幾個貨櫃嘅冰箱彩電。慢慢就係以億元計嘅利益。到後來，都唔知應該用咩單位去量度呢啲利益。

三十七，香港嘅門戶角色，其實好似一把雙刃劍。一方面，香港好似促進經濟開放改革。但另一方面，冰箱彩電，可能係香港偷運上去；億元計嘅利益，又可能係香港交收。龐大嘅既得利益，建立響專制嘅權力控制之上。甚至去到2019年初，都仲聽到有種主觀願望，認為修訂逃犯引導條例，最驚嘅一定係將人身性命財產收藏於香港嘅大陸權貴，所以，香港唔會有事。

三十八，事後孔明咁講，一廂情願嘅諗法，主要都係因為忽略咗大國堀起嘅自信。八零年代尾，九零年代初，蘇俄解體，但中共避過一劫。亞洲金融風暴，泡沫爆破但中國又好似獨善其身。加入世貿之後，更加乘勢而起。零八金融海嘯，之後歐債危機，中國又好似越來越不假外求。

三十九，曾幾何時香港嘅優點，不但變成可有可無，甚至係一種威脅。中共唔認為國家需要香港，而係香港需要國家。好多大陸人，甚至小資產階級，真心相信，八十年代之後，九七亞洲金融風暴之後，沙士之後，零八金融海嘯之後，如果無佢哋，無國家，香港人早就食晒屎。

四十，另一邊廂，香港人又覺得，如果冇我哋，大陸依家仲係一窮二白。「點解去到九零年代，忽然咁多吹奏香港最高最強最大最最最最最？」之前我問呢條問題，唔知大家有無諗過？首先，我唔可以肯定，亦唔可以排除，當時係咪出於政治需要，有 propaganda 去吹奏香港「明天會更好」。但環境條件上，泡沫經濟之下香港嘅紙醉金迷，本身好易令人跌入呢種心態。記得當時一個普通中產小資家庭嘅美國留學生，即係我，見到美國嘅同學，好不期然就會諗：「香港真係勁；我美孚間屋企個廁所，已經可以買呢度成間獨立屋⋯⋯」

四十一，【鄭重聲明】講以下嘅諗法之前，我想同各位有宗教信仰嘅朋友講句：「千萬唔好因為以下嘅類比，而感到被冒犯。」我唔係信徒，但亦唔係無神論者。但我真心相信，有無造物者，並唔係我哋可以意識得到，理解得到，證實得到嘅事。有同無，亦都係一種信仰。無錯，無神論者都係信；而我，就連信仰都唔敢肯定或否定，所以先至係無膽匪類。

四十二，八、九十年代香港人嘅精神亢奮背後，其實亦都有嚴重嘅不安；尤其係1989年之後嘅香港人，更加好明顯有種末世嘅意識。有種宗教模式，只需要三個元素：（一）最終審判（二）救贖（三）獲得救贖嘅途徑。假如話1997年係審判日，當年嘅香港人相信，民選之下嘅港人治港，係救贖；選舉，就係獲得救贖嘅途徑。

四十三，民主係政治信仰，專制獨裁，都係信仰。真實嘅，就只有利益。你可以話我 cynical；呢個字嘅本義，就係咁解。過去嘅香港，早在1862年有煤氣公司，1890年有香港電燈公司，1901年有中華電力，甚至1910年九廣鐵路通車，全部都係洋務運動想推動嘅建設；係因為英國人特別優秀？定係因為法治之下，公權同私利嘅關係，有一個制度可以有效咁去理順？

四十四，有個故事，我講過好多次，但不厭其煩，畀我再講多次。2019年，有次我同班 MBA 學生分享香港嘅社會現象，有位大陸嘅同學話，唔明點解香港人唔去專心發展經濟，走去搞政治。我話：「可能你眼中，國家經濟好似一間大工廠，只要多快好省咁用最低成本不停生產最多嘅嘢，就係發展。但我哋眼中，經濟係一個既有競爭又有合作嘅網絡。競爭要有公平嘅環境，合作要有互信嘅基礎。我哋希望完善制度，就係想維持呢種公平同互信。」

四十五，好多人都問我，呢位同學最終嘅反應究竟係點。我唔知；人哋點諗，我哋亦都控制唔到。但正如上面所講，佢嘅價值觀，都反映一個時代嘅環境。中國大陸，由接納外來事物到，覺得自己不假外求，亦都只係過去十零年嘅事；佢嘅諗法，其實亦好似某個時空之下「叻，我至叻⋯⋯」