誰是真正話事人？ (Patreon)

一，要普通人明白、相信一件事，最簡單直接嘅方法，就係用「二分法」；光明對黑暗、正義對邪惡、民主黨對共和黨等等等等。所以，最多人狂熱投入嘅競賽活動，都係兩陣對疊；記得有人曾經想發明三個人玩嘅象棋，結果就當然係冇乜市場喇。又正如上一篇所講，一啲事物嘅存在與不存在，雖然永遠都無結論，但亦都可以無止境咁爭論落去。無錯，假如有外星人嘅話，從佢哋嘅視點去睇地球人，呢個物種從來都係信仰嘅生物，只不過信仰嘅目標對象隨時間而改變。

延伸閱讀：陰謀論．Deep State．Post Trump USA 

二，外星人對地球人，又係一個好簡單嘅二分法。其他嘅二分法，例如古代對現代，西方對東方等，都一樣係用來做思想改造好駛好用嘅對立。

三，我唔係話黑暗唔存在，又或者邪惡唔存在，甚至話以上種種嘅二分法完全係虛構。只不過，人睇到啲乜嘢、聽到啲乜嘢、甚至乎點樣去理解呢啲感觀，都係出於主觀願望。我知呢個講法，亦都係好易令人產生對立嘅比較：「你咁講，即係話，其實人只要唔去過份解讀自己嘅色受想行識，就可以五藴皆空喇。」係喎，佛學嘅重點，就係話人有呢啲思想傾向。諷刺係，當佛學變成佛教，智慧變成戒律，再變成教條，本來教人明白唔好執著，就偏偏變得執著。

四，好多事情，原意係一件事，結果又係另一件事。嘿，又來二分法；思考最易中伏嘅地方之一，就係將手段同目的切割，甚至對立。「究竟目的同手段，邊樣重要啲吖？」呢個又係一個爭議幾千年嘅命題。就係因為人類永遠都有呢啲內在嘅思想矛盾，對我哋呢啲成日要靠搵題目嘅人，先至唔怕無切入點。

五，【Caveat emptor】希望以後大家見到：「世界可以好粗略咁分成兩種人⋯⋯」就明白我都係為咗方便解釋而極度簡化，有時甚至有少少 tongue-in-cheek⋯⋯

六，上次講 deep state，我想再補充一點。世界可以好粗略咁分成兩種人；第一種，相信有民主普選就有自由法治和平友愛。另一種，相信世界上嘅權力，由一小撮人所把持。但諗深一層，呢兩種想法，其實又唔係咁對立；有人會話，一個描述講嘅係理論理想，但另一個係現實。

七，將理論理想同現實二分，又係一個好常見嘅 rationalization。「理論理想，會唔會有朝一日變成現實？」如果答案係「會」，究竟理想同現實當中差咗啲咩？但假如答案係「唔會」，咁點解會有呢個理論嘅存在？

八，現實，住住比簡單嘅二分法來得更複雜；即係唔係簡單嘅「左 vs 右」。但係咪多幾重二分法，就可以更精確咁去描述呢個世界呢？我曾經都好鍾意用「十字𠝹豆腐圖」去解釋事情，例如以下呢張 Nolan Chart。

九，有人鍾意講所謂嘅「協同效應」，又或者所謂「一加一大過二」，但其實有個更加通用嘅概念，叫 emergence。好簡單咁講，就係當「個體」之間嘅關係去到一定嘅複雜程度，「整體」嘅某啲特性先至會呈現出來。舉例咁講，生物嘅成份最最最基本嘅元素成份，離唔開H、C、O、N、P。不過，宇宙都係過咗幾十億年嘅歷史之後，先至出現會自行複製嘅核酸；當個體一旦集合成整體，有一定嘅複雜程度，就會開始自行複製，甚至演變。可以話，生命嘅出現係好多偶然之下嘅結果。

十，點解講講吓二分法同deep state，無端端又開個新題目講 emergence？等我將一切概念串連之前，請容許我再分享多一個打工嘅經歷。

十一，話說，我都曾經打過工；當時我呢位老闆，成日有新意念，我嘅職責就每幾個星期就轉一次，好多時連 title 都轉唔切，就要負責新任務。但其實公司本身，不但有自己嘅高層，唔同嘅 business units 亦有自己嘅權力範圍同職責；正如多數大公司一樣，都係將多過兵。

十二，咁我又考吓大家：「你認為，呢間公司邊個先係真正嘅話事人？」

十三，「仲駛問？梗係大股東兼主席喇！」人前人後，我都尊稱大股東兼主席做：「精神領袖」。好多同事其實都好仰慕佢；其他高層主管做每件事，亦開口埋口話跟足佢嘅意思。

十四，不過，假如精神領袖真可以一聲令下就乜都做到，我就冇存在嘅需要喇；有時同事唔了解佢嘅意思（我成日話自己係翻譯），有時同事係諗唔通點做，當然亦有時同事係唔完全贊成，但唔敢出聲。

十五，另外，架構上 CEO 掌握行政權力；就連精神領袖嘅願望，都要 CEO 支持先至可以執行（以大家亦都可以想像，我同呢位 CEO 嘅關係，可以有幾咁精彩）。不過，我又唔認為 CEO 真係有好大權力；甚至有時我都戥佢無奈。至於董事會、CFO、COO 等一眾高層？算喇，都係。

十六，究竟邊個先係真正話事人？定係好似精神領袖嘅格言咁講：「消費者先係上帝！」我曾經負責嘅其中一個任務，就係要親近多啲消費者。不過，結果發現無論我哋自詡有幾咁市場主導，實情同消費者嘅距離係好遠好遠。

十七，驟眼睇，呢間公司好似管治非常混亂。實情係，我哋唔止係業內數一數二，我位位舊同事都係獨當一面嘅人物，精神領袖本人，就更加係一個傳奇。呢間公司嘅經歷更令我相信，世界其實比我哋想像中要來得更混亂、兒戲。所謂嘅權力，好多時都只係幻象。

十八，以上真人真事嘅經歷，對我了解社會時局有好大幫助；話晒都叫做從「權力核心內圍嘅外圍」觀察過權力。假如話「消費者係上帝」，其實就好似民主萬能論，將口號當做真理。以為大老闆話晒事，就等於相信君主專政，唔明白寡人有幾咁孤獨。以為高層集體弄權話事，就更加係將打工仔睇得太高；當你從佢哋（我哋）嘅角度去睇，其實無一個人會認為自己真係話晒事。

十九，換句話說，微觀如一間公司，就算已經有晒明確組織結構，有晒 reporting line，所謂權力核心，都一樣要面對大量不受個人主觀願望控制嘅條件限制。

二十，管理經驗話我知，人越多，就越依賴制度。制度，又唔係純粹係理性嘅設計。制度好多時都係 emerging 嘅現象；當人數同關係嘅複雜程度到達某個臨界點，就自然出現唔同制度。制度本身選會演變進化，而且演變好多時係單向過程；新嘅識知出現之後，就返唔到轉頭。

廿一，所以，假如話一個國家，可以由一班神秘組織操控，當中一定有啲好超越常識嘅事。假如講到呢個神秘組織，可以跨國發揮影響力，就更加不可思議。

廿二，假如世間萬物都可以透過演變而漸漸形成生命、社會、秩序道德，過程只係幾個好簡單嘅原則，唔需要有造物者去 micromanage。各種社會事件嘅出現，背後又係咪一定要有秘密組織去策動先可以成事呢？

廿三，甚至有人選擇相信，六合彩都係一個整定嘅局。從前做報館，久不久就收到某國嘅讀者來電，問我哋要六合彩貼士。「你哋一定知道啲內幕嘅～～」「就算我哋有貼士，又點解要話你知？」「最多，中咗我分返啲畀你哋；我唔貪心，要三個號碼就夠。」

廿四，更重要係，唔止一個人認為我哋知六合彩號碼。所以，六合彩報不但有市場，而且都生意據聞都幾穩定。

廿五，假如六合彩事前有貼士都有人信，話有神秘組織統治地球，又點會無人信？但又話說回頭，人類如果無咗各種信仰，就只係得返最基本嘅動物意識同需求，亦都唔會有文明。

廿六，信仰，既人類自以為由動物進化成「更高等生命體」嘅一個emerging phenomenon；個人嘅信仰到群眾嘅信仰，又係另一個層次嘅 emerging phenomenon。從抽離嘅角度去睇呢啲現象，以上所講到嘅各種非理性思維同行為，似乎都係演進過程必經嘅階段。

廿七 ，【One more thing】剛才講「十字𠝹豆腐圖」，其中一個好多人用，但又經常用錯晒嘅，就係惡名遠播嘅 SWOT。

左邊嘅 Strengths and Weaknesses 係一對，係講內在因素，即係一間公司，一間機構自己可以控制得到嘅範圍。右面嘅 Opportunities and Threats 又係一對；係外在、不可以被控制嘅條件因素。上半，係正面因素，下半，係負面因素。

同一個銀仔，都有兩面；一間公司某方面越係突出，就代表同時有一個好嚴重嘅缺陷；另外，好老土咁講，有危就有機，有機會亦代表有挑戰。

map 好咗一張 SWOT 之後，最少可以搵出五對制定策略嘅方向：

（1）Strengths ＋ Weaknesses  ＝ 取長補短，自我完善

（2）Strengths ＋ Threats ＝ 防守

（3）Strengths + Opportunities ＝ 進攻

（4）Weaknesses + Threats  ＝ vulnerabilities

（5）Weaknesses + Opportunites = 留返畀人哋嘅機會

識得用，其實類似SWOT嘅工具，可以編織出好多動聽嘅故事。正如今日嘅開頭所講，要一般人明白、相信一件事，最簡單嘅方法就係二分法。當然，吓吓都要成個SWOT切晒出來，著晒相，咁就好低手㗎喇；thinking tools 主要都係自己做畀自己睇