陰謀論．Deep State．Post Trump USA (Patreon)

一，證明一件事嘅存在，好易；就算你只係搵到碩果僅存嘅唯一例子，存在，就係存在。

二，相反，絕對肯定咁去證明一件事係唔存在，就好難。

三，我哋儘其量都只可以話：「呢件事存在嘅可能性好低；好低，唔代表完全唔可能。」就正如上面嘅一句陳述，我都只可以話「好難」而唔可以話「絕對無可能」。

四，無端端點解講邏輯？原來，人世間，好多爭議，其實都係源自於一個可能永遠都無答案嘅問題：「究竟呢個世界有冇X？」X，可以係神，可以係鬼，可以係靈魂，亦以可以係任何大家未見過嘅事物。呢啲一切不能被否定嘅命題，最多都只可以話係「科學以外嘅範疇」。無錯，科學方法最重要嘅係：「可以被推翻嘅命題」。

五，「信則有，不信則無」亦只可以話有半句道理。信與不信，唔等於存在與否。正如上面所講，要絕對否定一件事嘅存在，好難。

六，再進一步咁講，構想嘅事物，又算唔算存在？世間好多事物，其實都係構想：你手上嘅銀紙、唔見咗密碼嘅 Bitcoin、合約、文憑、憲法、國家，民族，個人意識形態、平等、自由、公義⋯⋯以上全部，都係構想出來。人類文明如果減去構想，就只係得返最原始嘅存在。

七，聖經話 God created man in His own image；但掉返轉都一樣講得通：Men created gods in their own images.

八，好，入正題。今日討論嘅係 deep state。當然，第一個處理嘅問題係：deep state 是否存在？但正如上面所講，要證明一件事唔存在，好難；所以，我亦唔會嘗試去挑戰咁高難度嘅事。

九，與其去討論上帝是否存在，我哋儘其量都只係可以去了解：「大家心目中嘅上帝係乜嘢一回事？點解有人選擇去相信有上帝造物主嘅存在？」

十，用以上嘅句式，關於 deep state，真正可以討論嘅範圍係：（一）何謂 deep state？（二）為何有人相信 deep state 嘅存在？

十一，Wikipedia 關於 deep state 嘅定義，劈頭第一句就係：陰謀論。

十二，何謂陰謀論？「疑神疑鬼，咪就係陰謀論囉！」可能有人會咁講；即係話，陰謀論嘅大前提，就係難以否定嘅命題。

十三，陰謀論，本身嘅含意就係呢啲人唔需要認真對待。主流輿論，亦通常都會將非主流嘅人，例如 antivaxx、flat earthers 等，描繪成多疑鬼祟，邏輯混亂。不過，根據我個人接觸發現，有啲人就算個別議題諗法極為非主流，佢哋其他嘅觀點立場又可以好主流。即係話，好少人具備完全絕對反社會人格。當然，正如上面所講，凡事都有可能，只不過係可能性有幾高。

十四，甚至我可以大膽講，任何人偶爾都會有感到自己同個世界好似有隔膜。呢種孤獨嘅感覺，好正常。多數人，會覺得係自己嘅問題；畢竟，我哋每個人其實或多或少都會有啲非主流嘅諗法，而我哋亦都好清楚其他主流嘅諗法係咩。所以，多數人都會將呢啲非主流嘅諗法收埋。

十五，當一班人有共同諗法嘅人，搵到「志同道合」嘅朋友，就好似滾雪球咁，聲勢越來越大；呢群人漸漸會認為，有問題嘅唔係佢哋自己，而係個世界。

十六，假如有個社會，絕大多數人都只係關心自己目前嘅物質享受；咁樣有無問題？又假如多數人都選擇話：「我唔覺得個世界有咩問題。」係咪真心，唔緊要，重點係當多數人都選擇接受現實，呢個現象又意味啲乜嘢？

十七，調返轉，假如有個社會，絕大多數人都唔關心自己目前嘅物質享受，咁又係咪代表更加理想，更進步？假如多數人都求變，咁究竟點樣變先至滿足到所有人？

十八，變與不變，係任何社會任何時候都要面對嘅問題。為變而變，為改而改，係無意思嘅；所以真正核心問題其實係：「你認為世界究竟有咩唔妥？」而呢個問題，亦可以用來區分唔同嘅意識形態。不如我哋玩個遊戲？以下呢份問卷，得一條問題，而且無既定答案，即係任你點答都得。 

https://forms.gle/21RpsikvziJ11ez99

十九，至於 deep state，我睇過嘅描述都係話：「相信社會有個秘密權力核心，透過控制輿論、權力、利益，支配多數人嘅生活、思想等等。」但假如 deep state 就只係得一個咁闊嘅定義，其實又有乜嘢好爭論呢？當然，亦都有更天馬行空嘅諗法，例如話呢啲權力核心根本唔係人類⋯⋯

二十，另一邊廂，有人選擇相信，只要有得投票選舉，就可以限制政府嘅權力；更有人相信，只要政府善良仁愛，人世間就唔再有紛爭⋯⋯

廿一，處世，就係要接受每個人都有思想盲點，尤其係自己。其他人嘅思想盲點，我哋好多時都會放到好大，而思想盲點嘅定義，就係自己往往都留意唔到嘅矛盾。

廿二，有時，我哋會選擇相信一啲無可能證實或推翻嘅講法。實情係，我哋對世事現象嘅認知其實好少，但我哋又好唔甘心去接受呢種無知，所以無論幾咁夾硬來，我哋都會搵個方法去解釋；呢個就係各種神話傳說故事比喻嘅起源。有啲人，將呢啲構想出來嘅解釋，當做唔可能錯嘅真理，人世間嘅紛爭同仇恨，亦從此而起。

廿三，當人見到信念同事實有矛盾衝突嘅時候，絕大多數嘅時候，人都係會堅持信念，同時為事實嘅矛盾衝突搵個解釋。呢個心理現象，學問叫做 cognitive dissonance。

廿四，1954年美國中西部有個叫 The Seekers 嘅宗教組織宣稱，當年 12 月 21 日係世界末日；教主呼籲信眾變賣家當，等世界末日時飛碟來拯救信徒。結果，當然無大洪水無飛碟無世界末日。

廿五，The Seekers 吸引咗 Leon Festinger 嘅注意；佢潛入呢班人當中，將所見所聞寫成社會心理學嘅經典著作 When Prophecy Fails。Cognitive dissonance 呢個概念，亦都係由呢本書提出。

廿六，「你估班信眾最終點？」殺咗個教主？自殺？我問過好多人，多數都咁估。好，你又信唔信，當中有部份信眾認為：「梗係因為我哋嘅信念感動咗 UFO，所以佢哋索性幫全地球避過一劫！」大家記唔記得舊約聖經 Sodom and Gomorrah 嘅一章？「Abraham 做唔到嘅都畀呢班 UFO 信徒做到。」

廿七，承上篇，群眾狂熱運動係由身份、信念所驅動；呢啲身份觀念信念，無乜空間去理性思考，甚至乎當事實同狂熱份子嘅信念有明顯矛盾嘅時候，佢哋都一樣可以搵到理由去解釋。

廿八，近年社會棟樑精英主義者，好鍾意去 fact check 對家，尤其係 Donald Trump 以及 Trump 嘅支持者。另一邊廂，就開口埋口話人係 fake news。其實，呢啲行為嘅目的，都只係為咗維繫自己支持者，對另外一邊嘅人嘅思維模式，可以話係完全冇影響。

廿九，美國呢個社會，點解好似特別容易醞釀群眾狂熱？一來，因為呢個地方對非主流嘅顛覆，向來都有種執迷；學 Thomas Jefferson 話齋：a little rebellion now and then is a good thing, and as necessary in the political world as storms in the physical.

三十，另外，美國呢個社會 好祟拜英雄，而英雄嘅定義，就係要 overcome 佢哋嘅缺陷同遺憾，所以英雄同 misfit 屬同一類人。好耐之前 Apple Inc 已經將教主 Steve Jobs 塑造成 misfit。就算最近一期嘅廣告，都仲用 Billie Eilish 賣緊呢個 message（雖然人人都已經用緊 Apple，misfit 乜呢又？）當時得令嘅 misfit，首推 Elon Musk。

三十一，Donald Trump 做總統又有幾咁出奇？政治上，佢係 misfit。家陣佢一沉百踩，只會令佢嘅支持者、信眾，更加相信美國已經被一班既得利益者，裡裡外外咁把持。科網平台嘅封殺，只會令呢班人更加走向地下神秘組織。我亦相信，佢哋好快就會攞開國元勳嘅說話，包括我上面 quote Thomas Jefferson 嘅一句，去支持佢哋嘅革命精神。

三十二，Donald Trump 冒起，同時亦係 deep state 進入論述嘅時間；兩者，我認為互為因果。就算無 Donald Trump，又或者佢唔再係主角，呢個劇目都會繼續演落去。

三十三，Deep state 嘅論述就係維持呢場群眾狂熱運動嘅魔鬼。請容許我再 quote Eric Hoffer 寫在 the True Believer 嘅一句作結：

Hatred is the most accessible and comprehensive of all the unifying agents. Mass movements can rise and spread without belief in a god, but never without a belief in a devil.