【2021 07 26】是日新聞精選 + 短評 (Patreon)

01，首先，同大家道個歉；早幾日去咗 South Dakota 參加 FreedomFest 。響美國，政治係一門生意，同我哋嘅娛樂圈差唔多；呢個 Expo 就好似啲乜乜後援會嘅大集合咁，呢由朝八一直踩到落晚八，真係好耐都無試過見咁多人，講咁多嘢。

02，我去嘅其中一個原因，係當中有個 panel，講香港。又話說，參加 FreedomFest 嘅兩千幾人裡面，對香港有興趣嘅，可能有幾百友嘅；但呢個比例唔係好具代表性，畢竟呢啲人都係相對比較關心香港嘅事。

03，去呢啲 Expo，好多時間要 social。識我一段日子嘅朋友都知，全世界我最唔識得解釋同介紹嘅，就係我自己。今次尤其係啲人問：「你邊度㗎？」我心個句就係：「孑然一身，浪跡天涯。」但口就會話：「我寫 Patreon ，有一百幾十個讀者。以前我就做過吓媒體，有間叫壹傳媒嘅，佢哋有份叫蘋果日報。係呀，你哋新聞見到之前被迫停刊個間呢⋯⋯我之前又搞過 Think Tank⋯⋯」

04，通常佢哋知道我來自香港，反應不外乎：「吖呀，我一直都想去㗎，無機會囉。」一係就話：「咁你依家安唔安全呀？有乜嘢我哋可以幫手呀？」先此聲明，我無叫過任何一個美國人對中國又或香港做任何嘢，你知喇，我係一個去到邊都咁守法嘅人。

05，我只係同啲人講返當前嘅事實：「尋日聽有演講嘉賓分享，話美國咁落去，遲早玩完，會被中國取代。你哋知唔知世界上最相信呢個講法嘅係邊個？中國共產黨囉。呢一個信念，亦都解釋咗自從胡溫年代中共嘅國策。」

06，「中共相信佢哋個套主張，優勝過全世界嘅任何一套制度。事實係，美國，都有人信呢套咁嘅相法。當然，我來到呢個國家，唔係因為佢係一個應許之地，唔係因為佢係完美，而係因為呢度有空間畀我哋去講出美國有啲乜嘢問題，我哋又可以做啲乜嘢去改善自己同身邊嘅人嘅處境。呢個係美國真正嘅力量，係來自我哋每一個人。God Bless America。」

07，嗯，我係唔係應該從政呢？分享會後，有啲人搵我私下分享，我就由《大國堀起》呢套 CCTV 嘅教育電視講起，一直到之後零八金融海嘯，中國期間經歷過嘅宏觀經濟點樣波動，到後來習近平嘅「深化」，以及點樣改造香港。

08，以上嘅 #07 所講嘅說話，過去幾日重複咗好多次；每講一次，都好似㩒一次 F5 refresh page 咁。

09，另一個好重要嘅感想，就係 Q&A 時候講返 2019年發生嘅事：「由 2019 年起香港嘅社會運動，係一場無領袖嘅運動；令我最感動嘅係，呢場運動裡面，素未謀面嘅香港人，可以合作，可以互信。點解？因為呢個係資本主義社會裡面嘅一種習慣。呢種陌生人之間嘅互相影響，究竟可以有幾咁微妙？我哋一班西裝友，可以見 Telegram 吹雞， 中午食晏就幾千人變身落畢打街和你 Lunch。對於啲慣咗要有領導落指令先做嘢嘅幹部，呢種有如行雲流水嘅社會運動，我相信如果 Saul Alinsky 翻生，都會覺得驚嘆。」

10，「呢場社會運動，無錯係兩個好唔同嘅意識形態之間嘅角力。一邊相信要有強而有力嘅中央集權，由上而下咁將十四億人嘅生命同靈魂都綑綁一齊，做命運共同體。另一邊，就係一個大家可以到最終都互不相識，但同時可以有合作又有競爭嘅微妙關係。呢兩種意識形態，從來都存在，而香港亦唔係唯一出現矛盾嘅地方。最終，我哋要面對嘅，唔係一個國家，一個政權，而係令呢種政權可以繼續橫行無忌，相信集權嘅信念。」

11，我可以為香港做嘅，就係將呢個地方最珍貴嘅一面，同全世界分享。過去幾日，我希望畀到更多人見到香港真正最美好嘅一面。我唔認為吓吓都咬牙切齒，又或者要搏人同情；當全世界都「消費香港」，香港先至會有希望。好感慨係，2013年我最後一次返大陸，就係去北京人民大學講香港自由港嘅歷史。曾幾何時，香港模式響大陸都仲有少少市場；俱往矣。

12，我算唔算係和理非？Guilty as charged。但作為一個和理非要，除咗勇氣，更重要係要融化更多世界各地嘅人，令佢哋追求曾經存在過嘅香港，知道香港所代表嘅個種獅子山下嘅精神。當然，我所講嘅人，亦都包括香港裡面嘅藍朋友，甚至大陸裡面嘅人。伊索寓言裡面，都有北風和太陽呢個比喻。總之，兄弟爬山。

13，講返今日嘅新聞精選，其實 ProPublica 呢篇 long-form reporting 講中共嘅「獵狐行動」，好精彩。簡單講，就係習近平嘅所謂打貪，其中一個重點就係身在海外嘅中國人。獵狐專項小組，會威脅佢哋嘅對象，用佢哋嘅仍然響大陸嘅家人做肉參，甚至會威脅埋呢啲前中共權貴身處海外嘅家人。 

14，最即時嘅聯想就係：「唔怪得咁多人會中電話騙局喇。」再諗深啲，就會諗到送中。所以，香港有藍朋友想出走，我唔覺得出奇。但睇到尾，我就諗治外法權（extraterritoriality）呢個概念。歷史上，extraterritoriality 係帝國主義嘅產物。今時今日，中共口頭上未稱霸，就先諗住要建立治外法權。當然，可以話其他國家都有做啲咁嘢，但 two wrongs do not make one right。

15，打貪又好，獵狐又好，戰狼又好，某程度上都係成功嘅 brand building。重點係，以上所講嘅一系列，都係做畀十四億人睇；中共，最主要嘅 stakeholders，唔係全世界，而係佢自己所統治嘅人民。

16，套入中共嘅思維模式，一定要馴服香港。矛盾嘅係，香港人本來好多都好似我咁，和理非，好易被統治，好易做順民。結果，寒蟬效應之下，雖然好似得返主旋律，但中共又點知附和嘅人，有幾多係真心？有幾多係不情願？

17，呢種不信任，其實點都係揮之不去。點解極權之下嘅擦鞋仔，乜都要做到咁露骨？因為其實大家都知，中共唔信香港人，唔信佢哋，所以佢哋以表忠透，就要做啲返唔到轉頭哋咁難睇嘅行為。更重要係，當社會上無晒反對聲音，奴材要出位上位，可以點做？梗係要做到「比契弟更契弟」。

18，點解班擦鞋仔會走去詆毀伍家朗？梗係有人以為捉到運動員當中有黃絲。

19，香港嘅精英運動員，本來可以有助凝聚香港人身份認同；大家記唔記得當年李麗珊？但呢把係雙刃刀，中共一定有所避忌，但又唔可以明打壓，唯有慢慢陰乾囉。另外，掌握香港體育資源嘅一班權貴，當中有幾多沽名釣譽？有幾多終飽私囊？最終，咪搞到運動員連出賽隊衣都要自己整囉。

20，順便講多一句。聽聞自從 2008 年北京奧運，香港搞體育又好，乜嘢文藝都好，重點係要宣揚國威。即係話，最低限度係一場盛事，但更重要係搞啲係可以令中國成為世界第一嘅嘢。曾經佢哋以為，中國可以做電競世界第一，後來無咗件事，睇怕都係因為發現，原來世界第一唔係講咁易囉。

21，好重要，講多一次：無論場大龍鳳幾咁勞師動眾，目標對象其實都係十四億人，要佢哋信：（一）做中國人好威，（二）好好彩今生今世可以做中國人，（三）同中國作對無好下場。呢個 propaganda 嘅 formulation 好簡單，但亦都好有效。

22，最終，愛國，愛香港，都淪為空泛、膚淺、虛偽嘅口號；以上所講「比契弟更契弟」嘅風氣，亦會淪落到好似反右運動個種人食人，鬼打鬼。有理由相信，唔駛等好耐，權貴之間會為邊個做下一任行政長官而狗咬狗骨；但今次場戲唔係做畀香港人睇，而係做畀北京睇，所以呢場人格謀殺，可能比當年唐英年所受嘅欺凌侮辱，有過之而無不及。

今日講住咁多先，明日再續。