【2021 07 28】是日精選 ＋ 短評 (Patreon)

01，網上有打手，水軍，都唔算新聞。2016年美國總統大選，其實已經用 bot 去做 engagement。好似 NYT 呢篇報道咁講，唔單止係 for hire，直頭係 attack of the clones。

02，今日揀呢篇報道同大家分享，因為中間有一段講返 2019 年。有間叫 Graphika 嘅研究中心發現，有個叫做 Spamouflage 嘅網絡，一直將北京對香港以及美國嘅 line to take 廣傳；但起初呢啲水軍嘅 post，無乜 engagement。

03，到後來，呢啲水軍嘅 post ，經過巴拿馬、智利同埋一啲中文 YouTube Channel 嘅放大，漸漸就成為網絡上面嘅一個新嘅同溫層。係，輿論從來都可以人工合成；更正確啲咁講，輿論好多時都唔係自然現象。

04，所以，就算有自動化嘅水軍，有血有肉嘅 KOL 仍然有價有市，皆因做 PR、Marketing 嘅其實都係打工仔；而打工仔嘅心態，多數係「做咗當得咗」。所以，搵咗 KOL 出咗個 post，有嘢交差，完成任務。

05，政治，就係建立響各種神話之上。娛樂事業，又係一個製造神話嘅工業。呢兩個行業，從來都係密不可分。所以，遠嘅唔講，香港近年都有一班紋眉黨；以我所知，都係集團式經營。

06，自古以來都有 Spinmeister。之前都有寫過，《三國演義》成書於元末。羅貫中將當時逐鹿中原嘅群雄，都投射到小說情節裡面，尤其係佢嘅朋友劉伯溫，直頭好似諸葛孔明翻生咁。

07，真正嘅 Spinmeister，我形容佢哋嘅工作係研發「思想病毒」。其實，佢哋都唔係從無到有咁去研發一隻病毒出來；就好似 gain-of-function 嘅研究咁，都係用現存嘅病毒剪剪貼貼。不斷咁試，直到發現一隻具高度傳染性嘅，就忽然大規模社區爆發。

08，用返以上嘅例子，關雲長、諸葛孔明呢啲造神運動，其實就係人工合成出來，畀百姓去崇拜嘅人物，目的係宣揚某一套價值觀。

09，過去由於思想病毒嘅散播，速度比較慢，殿堂級 Spinmeister 做出來嘅神話，可以流傳好耐，甚至橫跨好多個世紀，影響唔同文化背景嘅人。

10，今時今日乜嘢資訊都好易傳播，反而 alt-fact 嘅 half-life 亦短咗好多。我嘅觀察係，目前大多數做 propaganda 工作嘅人，著重傳播多於設計。

11，我估最主要嘅原因，係設計病毒係高門檻嘅工作。相反，傳播就求只要明白 SEO 同 facebook 派 post 嘅 algorithm ，多多少少都可以操作得到。

12，更重要係，依家嘅玩法係，任由嘅傳聞亂竄，然後先至從坊間採集樣本，睇吓乜嘢 message，乜嘢途徑最有效，然後就大量投放資源，去放大影響。

13，呢個 approach 嘅最大反效果，係訊息同病毒基因一樣，不斷人傳人嘅過程當中會變種；近乎 frictionless 嘅傳遞過程，基因異變嘅速度同幅度，都更難掌握。

14，「思想病毒」同真嘅病毒一樣，越係高傳染性嘅，通常宿主都唔會病得好嚴重。係，如果一隻病毒會令個宿主即時死亡，呢隻病毒係近乎無可能傳染。思想病毒嘅情況都係一樣：假如信咗某種思想，會令一個人離群、性格變得孤癖，呢種思想好大可能會一直係異端。

15，從呢個角度去睇，我哋成日都接觸到唔同嘅思想病毒；更正確咁講，所有思想都有如病毒。但只要唔令你病到不似人型，其實真係無所謂。相反，我會話，將自己曝露於更多唔同嘅思想，先至係建立抵抗力，最有效嘅方法。

16，係，人嘅思想都可以有疫苗，呢隻疫苗，就叫做讀書。

祝　增廣見聞