2021.09.23 (Patreon)

今日揀嘅六篇新聞及評論：（一）繼北京話要加入「跨太平洋夥伴全面進展協定」（簡稱 CPTPP），台灣入表又話要申請成為會員；（二）John Bolton 為 The Economist 寫嘅一篇 By Invitation，講佢對 AUKUS 嘅睇法；（三）習近平指咗一條片畀聯合國，話會停止境外嘅煤電廠；並且 2060 年會做到碳中和；（四）China Quarterly 題為 Who Not What 嘅論文，分析中共處理輿論嘅思維同程序；（五）另外，Foreign Affairs 題為 China's Social Credit Systems is Actually Quite Boring 嘅論文 ；最後，（六）係講點樣有效學習。

01，已經有消息指，CPTPP 唔想畀北京加入；台灣此舉，就分明係「搞局」。其實類似嘅國際多邊協作組織，無乜實質嘅功能，中共同民進黨，都係想借人家來同自己國內嘅 stakeholders 講，自己做緊嘢。

Taiwan Applies to Join Pacific Trade Pact Days After China | WSJ 

02，話雖如此，AUKUS 呢種軍事聯盟，意義就有啲唔一樣。當然，無仗打嘅日子，軍事聯盟都係「裝飾的鮮花」，一般都不會結果。AUKUS 擺明就係中共對，但中共對呢件事異常咁刻制。John Bolton 認為，美國目前嘅印太佈局，係多個唔同嘅聯盟，AUKUS 係一個，印澳日美 Quad 又係一個，北約又一個（仲有五眼）。重點係，每個聯盟都各自有唔同嘅組成，有各自嘅利益。

03，策略上，呢個模式嘅多邊主義，好處就係可以每一組分別有各自嘅共識，唔需要每件事都要幾十個國家都認同先至行動。面對利益錯縱複雜嘅環境，而且變數又多嘅情況，呢個 adaptation 其實都係好合理嘅安排。

China Pledges to Stop New Coal Energy Plants Abroad | BBC 

04，之前都有寫過，當全世界發達國家都話 2030 目標碳中和，中國繼續係地球第一大嘅燃煤國（有一半嘅煤係中國燒嘅）；但請恕我 cynical，唔信各國嘅政工作者係為咗地球環境去提出 2030 碳中和呢個目標。

05，廿世紀人類文明嘅進步，最主要原因之一，係將醞藏咗億年嘅石化能源，幾十年間釋效晒；二戰後嘅幾代人，亦因此係人類有史以來生活得最好嘅一班人。不過，自 1960 年代，發達國家就已經嘗試要減少對石化能源嘅依賴，原因係當時嘅認知當中，石化能源嘅分佈好唔平均。不過，搵下又多啲，搵下又多啲，結果大家都無咗件事。

06，題外話，廿世紀初美國有個奇男子叫 Floyd Odlum ，大家可以試下 Google 佢，但應該可以搵到關於佢嘅資料唔多。話說，1929 年大蕭條之後幾年，佢可能係全美國唯一股市賺大錢嘅人。之後，佢又做電影，又做航天；呢兩門生意，戰時又係好重要嘅工業。戰後，佢有做過火箭（係，早過 Elon Musk 幾十年），亦有做鈾礦。佢出版過一份關於鈾礦嘅小冊子，我手上有一份，搵日寫寫（講講）呢個故事畀大家聽。

07，以上用習近平話唔燒煤發電又有乜嘢關係呢？一，佢話境外嘅電廠之嘛；你哋供電不足，對工商業有乜影響，中國都係最後贏家，係咪？二，更重要係，中國其實都想發展核能，而且目標係做世界第一大核能國。最近，中共成功實驗 Thorium 嘅核電；呢個 agenda 其實都好明顯。

08，兩個月前，好多人話北京出手打 crypto mining 係因為「浪費電力」；但我就唔係咁諗。係，北京只係唔可以接受有一隻唔受國家控制嘅 free currency，就係咁簡單。所以，正路來講只要政權不變，bitcoin 亦只會被禁落去。不過，大陸無得開礦，對 crypto 市場嘅長遠影響，係微乎其微。畢竟，需求始終存在；HODL 嘅，係唔會放手。

北京打壓 Crypto Mining 與能源經濟學 ｜unsubject.me 

09，另外，China Quarterly 呢篇，我其實想分享好耐。兩位研究員，睇咗唔少一手資料，包括由網易流出啲內部參考等，分析中共點樣層層而下咁去監控網上輿論。大數據？人工智能？其實更貼切實情應該係好似 Google Doc 嘅文件，人手操作。

10，其實 2012 年左右，我仲返到大陸，當時都聽過啲大陸做初創嘅朋友講解，呢啲網絡監控，絕對比大家想像中「鳩流流」。我呢位朋友，當年響「天涯」都有啲名氣（但 2013 年就被軟禁，大家失去咗聯絡）。佢話，監控係一班人，但執法都係公安去做。所以，監控班人唔出聲呢，公安係唔會知。但問題係監控班人用嘅標準係乜？

11，Who not what 呢篇學術論文，其實標題都講咗重點：「唔係你講乜，而係睇你係邊個。」換句話說，你無影響力，你話乜都無人理；但如果你有影響力，一個無傷大雅嘅笑話，都可能會令你有麻煩。監控嘅人，其實又點知道乜嘢會觸犯國家級神經？佢哋有份好似 Google Doc 咁嘅文章，不斷 update ；但遇到唔明嘅時候，就請示上級。上級嘅指示，又寫入呢份 collaborative 嘅文章 （當然唔係用 Google 喇）。如是者，一層層咁問上去，都係因為當事人有啲身份，細嘅話唔到事。結果就係影響力越大嘅人物，就越易觸動到接近權力核中。

Who Not What: The Logic of China's Information Control Strategy | The China Quarterly 

12，另一篇相關嘅文章，係 Foreign Policy 講社會信用系統；大致都係話，官僚操作無大家想像中咁滴水不漏，而且好多時執法對象，都係針對企業，多過對個人。當然，呢個只係普遍嘅情況。另外，執法嘅過程，好多時都無一個標準。嗯，神奇國度，你想佢有乜嘢標準呢又？

China's Social Credit System is Actually Quite Boring | Foreign Policy  

13，今日最後分享嘅，唔係時事。話說近來去 Coursera 睇 Learning How to Learn ，學吓點樣去令學習更有效率，發覺道理好簡單：一，練習，但係有目的同方法咁去針對自己嘅弱點改進。二，學習過程，有兩個 mode，一個就係練習，即係深化，令 long term memory retrival 更有效，又或者係 mind-muscle connection 更強。另一個 mode 就係要 disfocus，要有創造力，係思考多於學習。

How to Study Effectively | Psyche Guide 

14，其實《論語．學而》都話「學而不思則罔， 思而不學則殆」；意思係學但又唔去思考，即係唔明；只係思考而唔去吸收外面現實嘅知識，就死得。另外，我發現學習嘅時候，尤其係思考，最好係無得上網。

今日嘅分享，暫告一段落。