大蕭條唯一贏家 (Patreon)

真．隱世富豪 Floyd Odlum

逆境投機，最容易犯嘅錯誤，就是「買跌」。

「逆境唔買跌？」係咪有少少不可思議。無錯，捕捉時機（timing the market）其實同賭一鋪無分別。歷史上的大跌市，通常都係短時間內完成；有幸捕捉得到時機嘅人，往往都係老人與海，可一不可再。

2008 金融海嘯，曾經有唔少人問我同樣的問題：「逆境點解投機？」我嘅答案都係一樣：「除非有根本上嘅改變，否則，值得持有的資產，仍然值得持有。」

當然，亦有人話，每次危機過後，都有新嘅機遇。事後孔明咁講，2008 年最大機遇，係對貨幣發行制度投不信任票；有人買金，有人買 Bitcoin。問題係：「當年你有勇氣去買 Bitcoin 咩？」

聖經創世紀中挪亞嘅故事，相信大家都耳熟能詳。記得小時神父講呢個故事話：「挪亞建方舟嘅時候，被其他人笑；但他係義人，有信德，所以他同家人避過一劫。」

大個之後，我明白到一個道理：「 唔係所有瘋子都係挪亞，但萬里晴空嘅日子，多數人都認為挪亞係瘋子。」

挪亞嘅另一個教訓係：「唔好放棄希望。」

「可不可簡單啲，講吓買邊隻股票？」十八個月前，即係疫情爆發前寫呢篇文嘅第一稿，Tesla 股價已經連續半年屢創新高。當時我問：「你會唔會不問價追？」

當日 TSLA 日日創新高究竟有乜嘢原因？其實，冇特別原因。

視 TSLA 為一間簡單的電動車公司，當時嘅股價肯定非理性。但假如你當係一間改變人類依賴石化能源嘅公司；個睇法就唔同晒。其實加上 Elon Musk 嘅 Space X ，呢兩間公司嘅使命，係將人類送上太空；火星上面，唔會有石化能源嘛。

如果我話 Elon Musk 係廿一世紀挪亞，你又會唔會話佢係瘋子？

當然，你可能會覺得，我好似有少少個人崇拜。但其實我相信，唔係 Elon Musk，都會有第二個人做呢啲事。正如若然愛廸生從未出世，呢個世界都仲有 Nikola Tesla 一樣。

資本主義市場，有好多 Tesla 咁嘅故事。又有邊個會諗到，一家買書的網站，最終會顛覆整個零售業？又或者， 2004 年上市嘅 Google？2012年上市嘅 Facebook？

但我哋始終都係對英雄人物，有種執迷。話說，我曾經研究過一個很少人聽過嘅傳奇投機者 Floyd Odlum；據說 1930 年代美國經濟大蕭條，就只有佢從股市賺大錢過大錢。

1923 年，Odlum 同幾個朋友夾份，籌集 39600 元，投資電力公司。兩年間，這筆錢已經滾大到 70 萬美元。短短十年間，Odlum 由Utah 一個寂寂無名嘅律師，搖身一變成為美國最有影響力嘅投機者。牛氣沖天嘅大時代，之後就係百年一遇嘅大蕭條；唔少人霎時富貴，但最終都被打回原形。

1920 年代嘅電力公司，就有如 2000 年代嘅科網股。1929年股災前，Odlum 將手頭上所有資本套現。

究竟當時他為何如此決斷？我嘗試過去搵答案，但實在無從稽考。Odlum 絲毫無損，笑到最後，你可以話佢純粹好運；但佢避過 1929 年股災一劫之後，大蕭條嘅日子佢基本上仍然不斷收購；憑手上巨額現金，以大幅折讓價買入當時好前衛嘅行業，包括：幾家航空公司（當時航空公司同今日嘅 Blue Origin、SpaceX 屬同類嘅前衛產業）、巴士客運（美國戰後國策之一，就係發展公路網）、傳媒如 RCA（當年亦係新興行業）、電影製作及發行。

1933 年，佢持有嘅控股公司 Atlas，已經全美最大嘅投資基金，資產值由 1930年的 1500 萬美元，幾年間暴升至 1 億 2500 萬美元。由1930年至1960年代，Atlas 嘅每年平均回報是 25%。雖然 Odlum 主要都係 buy and hold，但都有沽出股票嘅時候。多數配售都係將已經成熟嘅生意，轉讓友好企業家。Atlas 曾經將持有多年 RKO Pictures 和航空公司，就配售畀另一個傳奇大亨 Howard Hughes ，成為一時佳話。最上乘嘅投機者，不但低價買入，高價沽售，更加可以另下一手滿心歡喜咁接貨。

網上可以搵到其他關於 Odlum 同 Atlas 嘅資料不多，但資料顯示第二次世界大戰後，Atlas 最主力投資火箭同核能。見識過原爆嘅威力，戰後 Odlum 將世上已知嘅鈾礦，見一個買一個，最高峰嘅時候，地球上一半的鈾礦資源由 Atlas 掌握。

佢相信，通脹會肆虐，社會需要核電。1950年代，佢已經提出要開發核動力飛機。佢相信航空技術縮短地域界限，將會影響全球經濟和地緣政治。後來，美國政府大舉開發太空科技，Odlum 擁有嘅 Atlas Corporation 亦參與其中；甚至後來美國第一代洲際導彈 SM-65，亦因此命名為 Atlas。

1960 年代之後，Atlas 和 Odlum 彷彿從世上消失。如果大家有讀過 Ayn Rand 嘅 Atlas Shrugged ，好容易會將 Odlum 嘅退隱，同當時嘅世道聯想起來。

不過，Odlum 深居簡出，其實據說都係同佢個人健康有關，畢竟以當時醫學水平同條件，佢都已經一把年紀，身體有啲毛病都唔出奇。1973 年，New York Times 刊登咗可能係 Odlum 最後一次專訪，當時他最擔心嘅問題，仍然係通脹。

雖然佢形容自己係一個「長遠的悲觀主義者」（long-term pessimist），但短線而言人總會為生存而奮鬥；據說呢個亦係 Odlum 一直主張嘅倫理價值。

正因如此，無論如何都唔好放棄希望，尤其逆境中，呢個係唯一可靠嘅信念，亦都係呢種想法，驅使人類社會不斷進步，一代新人勝舊人。