聯儲局議息係乜嘢一回事（三之一） (Patreon)

Dual Mandate 始末

趁今次議息未有結果，幫大家溫習一啲關於聯儲局嘅知識。以下係我今個月 Market Order 嘅 Presentation 裡面嘅 Talking Point （唔轉返書面語，反正都無諗過要出書）。

亦由於內容太多，文字分三篇寫，敬請留意 🙏🏻

01，大家知唔知 dual mandate 係乜？控制物價同最大可能嘅就業？但如果你真係睇返 Federal Reserve Act ，其實明明係咁講：

“to promote effectively the goals of maximum employment, stable prices, and moderate long-term interest rates”

（a）maximum employment；（b）stable prices；and （c）moderate long-term interest rates 

02，數一、二、三都數錯？當 moderate interest rates 無到？好明顯，dual mandate 本來係三頭馬車；其實 Bernanke 之前，美聯儲係有 interest rate targeting ，係 Bernanke 提出要改成 inflation targeting 。但好少人留意；但事實上 Bernanke 亦都真係將 interest rate targeting 呢個任務變成歷史：「咁長時間近乎零息，仲學乜人講 interest rate targeting 吖。真係人唔笑狗都吠。」

03，另外，考吓大家，知唔知所謂嘅 dual mandate 係幾時開始？

係 1977 年，即係 Bretton Woods System 崩潰後嘅事；當時同今日有好多相似嘅地方，包括又係地緣政治風險增加，能源、礦、航運價格等上升；當時都係賴各種因素令物價上升，同依家好似。

04，Pop Quiz 第三條：大家可唔可以講得出你記得佢個名嘅聯儲局主席；越早期越好。

我估大多數人最多都係數到 Paul Volcker ；佢之前嘅聯儲局主席無乜人識都好正常，因為當時都未有 dual mandate ，聯儲局嘅唯一功用係救銀行。銀行無事，又邊有人記得聯儲局主席係邊個？

係，央行本來嘅功能，就係要來做銀行嘅銀行，宏觀經濟調控，係過去四十年左右嘅事。事實上，好多關於宏觀調控嘅理論，仍然非常之咁簡陋，同巫術嘅水平差唔多。

05，好多人記得 Paul Volcker 係「加息到近廿厘打擊通脹」。但有聽開我講嘅朋友就應該記得，我講過通脹除咗係「太多貨幣追逐太少貨物」，更加要明白貨幣即債，通脹乃大家都槓桿之下嘅最終結果。1980 年代起你問我美國最大嘅覺醒，係最終都有幾年可以做到平衡預算（去到 Clinton 年代）。係，對比歐洲，美國算係好生性。

06，1985 年，美息同美元高到一個位，真係要七大工業國一齊升值；當時有陰謀論又話美國用呢招去增加自己出口競爭力。依家睇返，1980年代初美元急升，其實係夾死晒啲石油出口國及拉美，包括埋蘇聯。Plaza Accord 七十工業國嘅貨幣兌美元升值，當時對呢啲國家都唔係無好處，至今佢哋嘅入口成本又低咗。其實睇匯率升跌對一個國家係好咗定差咗，都要睇佢嘅進口同出口嘅價格彈性。

07，Volcker 去到任期嘅後面，其實咪一樣減息。佢 1987 年 8 月卸任，格林斯潘上任無幾耐就出現 1987 股災。依家睇返 1987 股災，對長遠嘅所有經濟指標走勢，可以話係完全無影響。係唔係當時格林斯潘處理得好，即時減息？無證據喎。

08，但呢轉放水，進一步令已經泡沫狀態嘅日本經濟更泡沫。當時日本同美國嘅經濟關係，非常之咁錯綜複雜。由 1988 年 2 月起，格林斯潘又再加返息，一直加到 1989 年 5 月。呢個時候個世界好多時發生緊，其中一個就係蘇聯陣營開始瓦解，另一個就係日本嘅經濟泡沫亦終於爆破。

09，1989 年發生嘅連串事有冇關？令我諗起 Milton Friedman 嘅 Money Mischief 講到 FDR 點樣 demonetize 白銀導致國民黨結果輸咗畀共產黨。Greenspan 透過 FOMC 搞嘅每一隻鑊，都可以話係史詩級。

10，非理性亢奮大家都記得；呢一幕格林斯潘又加息，美元又升，呢次夾爆嘅係當年嘅亞州神話。亞洲金融風暴，可以話係日本泡沫爆破嘅餘波。當中更有俄羅斯債務違約導致 LTCM 事件。但結果所謂嘅「強美元」政策一直去到 2000 年嘅科網爆破。之後又係 Greenspan put 出場嘅時候。

11，2001 年後嘅 Greenspan put ，直接促成佢任內最後一個泡沫，i.e. 次按。佢 2006 年將個位交畀 Bernanke 嘅時候，亦都交咗隻世紀級嘅鑊。

12，Bernanke 未上任就已經有個花名叫 Helicopter Ben，因為佢曾經主張經濟唔好就搵直升機派錢。但其實佢上任嘅第一件事，係加咗一輪息。但去到 2008 年，終於到自我實現嘅預言發生。餘下的，都是歷史；Helicopter Ben 將由日本人發明嘅 QE 帶到美國。美國亦步入史無前例嘅零息新常態。

13，Bernanke 亦親手結束 interest rate targeting 。從此就只有 dual mandate ；世人亦只記得 dual mandate 

（待續．未完）

Presentation Deck