公事我唔鍾意講電話 📞 (Patreon)

緣起：休息咗兩年，都係時候認真做返本業。有啲工作上嘅反省，唔好浪費，寫低畀自己日後參考又好，順便又同大家分享吓。

公事，我唔鍾意講電話。

「有乜事，唔該白紙黑字寫低，最好 email ，如果唔係 message 都得。」我通常都咁同人講。

點解要白紙黑字？因為好多人，對自己要求啲乜，其實唔係諗得咁清楚。當你要佢哋寫出來，呢個過程可以好有效咁，要對家整理好諗法。

亦有啲人，唔鐘意諗嘢；佢哋會去搵以前嘅 template 去抄 。其實未必唔係好事，從組織管理嘅角度，如果機構本身有強大嘅尋租本錢，因循守舊乃生存之道。呢種種以文件作為管理嘅方法，一脈相承自從前嘅官僚體系；日不落帝國幅員遼闊，一樣管到貼貼服服，靠嘅就係文字、法制。

「有冇時間講兩句？」根據我嘅經驗，一諗起有啲乜嘢事就打電話嘅人，EQ 唔高，小小事都好緊張，放到好大，同埋做事無乜條理。

當我心情好嘅時候，聽完對家發洩，我會話：「我將你講嘅嘢，整理吓，過兩日 email 返畀你喇。」

但如果我無乜耐性，或者覺得對家唔值得可憐，我就會話：「咁喇，你將想要嘅嘢，寫低 email 畀我。」

「乜咁煩㗎，講吓咪得囉？」職場上，有兩種人我最欣賞，一種係唔怕煩、唔怕悶嘅人。另一種，係唔怕試、但會檢討反省嘅人。兩種人，都好難得；但前者比後者更罕見。

如果有人肯乜都同係白紙黑字，而且寫得清清楚楚，呢啲就係人才。

職場寫作嘅最高境界

職場寫作嘅最高境界，係邊個都睇得明；甚至連一個剛剛返工嘅 intern 都可以睇得明。

但好可惜，職場文字多數都係東抄西拼，一塌糊塗，無結構，無邏輯，無同理心。

首先，點先至可以寫低件事，令對方明白點做？其實寫作過程中，作者係要不斷咁代入對方嘅立場，去問問題；最好係甚至連對方冇諗過會問嘅問題，都幫佢問埋。

當然，係唔駛連啲問題都寫出來，但都有人咁做，是為 FAQ 模式。唔知大家有冇留意，我寫文嘅時候，好多時都有呢種自問自答。

但好多人都唔識問問題，皆因好奇心被教育制度磨滅；教育制度訓練學生答問題，而唔係鼓勵佢哋去問問題。其實來來去去，問題就係 5W1H ，真係對件事上心嘅人，自然會諗到對方會有乜嘢問題。

學問就係學點樣去問

好嘅問題，極之難得。

有啲問題太大，例如生命嘅意義係乜；唔係話呢啲問題唔好，但呢啲只係午夜夢回，又或者人生高山低谷嘅日子，先有嘅感悟，平日無乜嘢，真係唔好諗太多，活下當下更重要。

有啲問題，又太過膚淺。我又唔係話膚淺嘅問題，就可以不理。膚淺嘅問題，遇到有好奇心嘅答題者，一樣可以變成有意思嘅問題。

例如：「通脹咁嚴重，買啲乜嘢好？」「好唔好入啲英鎊？」

希望大家唔好覺得膚淺係侮辱。大家其實都係 #以結果為目標。問嘅人，想要一個簡單嘅最終答案。

好可惜，呢個世界唔係所有問題，都有簡單嘅答案。

通脹無錯係好嚴重，但如果你知點解有通脹，可能答案呼之欲出。

「乜通脹唔係因為印銀紙咩？」其實各國央行從來都係咁印，當然時多時少，但如果你睇實證，出現金融危機嘅時候，往往印得更厲害，但係唔係即刻就反彈？反之，次次開始有泡沫就有逆周期措施，又係唔係即刻跌？

「會唔會除咗央行嘅貨幣政策，仲有其他因素？」如此推論落去，就可以一步一步咁睇得更清楚。之前呢個月寫嘅文，錄嘅片，好多都係循呢個方向去思考。

「你思考完未呀？咁即係買啲乜？依家可以買英鎊未？」

我唔鍾意幫人做決定；我自己買乜賣乜，輸贏都係我自己嘅事。假如連賭錢落注都要搵其他人嘅意見做決定，我對呢啲人嘅建議係：「都係唔好賭喇。」

咁講，可能會得罪人。但想人生過得好，最緊要係可以從錯誤中學習。如果無經過自己嘅思考，錯咗亦只會話：「一日最衰就係聽咗個 XXX 講。」

然後，下次換個對象，聽 YYY 講，錯咗，又賴落人嘅度。

我唔係怕錯，因為人點都會錯；但如果指出我嘅推論有乜問題，我可以學到啲嘢。假如只係要一個「升」或者「跌」嘅答案，我哋最終除咗輸贏，就乜嘢得著都無。

幾時先至要面談？

我唔鍾意講電話，但有啲時候，我又會要求面談。

Pitch ，一定要面談。口語溝通，重點係抒發情感，建立共鳴、信任。如果無得去 pitch 嘅 tender ，我覺得可以慳返唔入。話晒我都花時間整份嘢出來，你畀時間我去表演下都好吖。

溝通有三個層次，最基本係 to inform ；白紙黑字嘅好處，係對家可以慢慢消化。

再高一個層次，係 to influence 。呢個層次就一定要面談，例如開會。好可惜，多數管理層、老闆，唔係好在乎演說技巧；尤其係東方文化裡面，好多上司覺得「叫你做就做喇」，開會只不過係懶得好好咁整理自己嘅思緒。結果聽嘅人覺得浪費時間，講嘅亦都好無癮。

但溝通嘅最高層次，係 to inspire ；即係已經唔可以話邊個純粹係講、邊個純粹係聽，大家都覺得有所得著。坦白講，職場好少有呢啲 epiphany moment 。

畢竟，當最基本嘅兩個層次都做唔到，又學乜嘢人講 inspiration 吖。

諗返轉頭，兩個月前開始的起心肝起動個 Youtube ，都係見人有我有。其實都好大工程，但學習嘛，唔落手落腳試係唔可能做到。當然，細節嘅例如揀乜嘢題材，邊度放，點放，點起題，呢啲雕蟲小技都學到啲嘅。

但最重要係錄片嘅時候，提醒自己，Youtube 呢類平台真正係要來畀 influencers ，重點係建立信任。所以演說技巧係好重要，點樣去 structure 一個題目，絕對唔係好似寫文咁平鋪直敘。

我亦發現，當一個寫作嘅人要演譯自己嘅文字，原來係可以改善文字嘅質素。

下一個問題就係，咁多嘢要做，點樣先至可以增加成效，提升層次。