【隨筆】點解有啲制度係明知有錯都係會一錯再錯？ (Patreon)

因為認錯嘅代價實在太大

我其實好避忌去猜度其他人嘅行為背後究竟係為咗乜；因為有時候，可能真係無乜動機，只係隨機嘅行為。

但《人民日報》連續三日嘅社論都話要清零，從表面證據睇，又唔似係主筆諗唔到寫乜，所以鳩寫。三日喎，阿主筆想揸流攤都唔會搵啲咁嘢搞。所以，作為一個前主筆，我都可以幾肯定咁講，一定係上頭落柯打。

上頭係邊個呢？點解落呢個柯打呢？話說，人民日報社論，可以係神奇大帝落嘅口喻；一連三日咁煞有介事，就算唔係神奇大帝本人，都應該去到好高層。

咁我又去睇吓篇文寫乜。各位，我都算係一個幾識得睇穿字裡行間有乜微言大義嘅讀者，似乎呢篇「躺平不可取、躺贏不可能」，想講嘅重點係：

有啲國家唔係唔想好似我哋做事咁嚴謹，而係佢哋根本無咁嘅能力！佢哋係試過好多方法之後，發覺搞唔掂，所以先至躺平。就係咁，佢哋清唔到零，遲早死好多人。我哋就唔同呢，一定可以清零㗎喎。

言下之意，你哋邊條粉蛋唔同我做到最盡，就係⋯⋯

睇到呢度，我倒抽一口涼氣。

首先，當你聽到有人話：「撐住呀，你一定得㗎！」潛台詞係乜？潛台詞就係知道你頂到一額汗，無咗半條人命，但都要你撐落去。

「撐住呀，如果唔係你就係民族罪人呀。」哦，點撐先？我睇咗呢幾篇社論，頂你個肺，就係我成日講個種：「有信心就一定得。」頂你，點做先得㗎。谷針吖？封城吖？定係點？你要我執行，我咪執行囉，但都要有個 SOP 。

就咁畀個目標，清零，然後要自己諗點做。結果咪，有啲地方嘅幹部，亂鳩咁來；重點係，個個都揸住張聖旨，你邊個夠膽阻差辦公？

我知好多讀者都會話：「小學生水平係咁㗎喇。」呢個解釋當然係一種睇法；但有冇其他嘅方法，去理解呢個咁唔理性嘅行為？唔通真係咁隨機？

神奇國度對「共病毒並存」呢個命題，提升到去意識形態嘅層面，令自己無位走。呢個現象，其實係一個制度性嘅認知障礙。換個講法，就係人人都知一件事係完全唔合理，但無人夠膽出聲，上上下下亦如是，因為出聲講真話無好處。甚至乎變本加厲，大家發現鳩講主旋律先至係最安全。

如是者，就算最高領導人明知自己鳩咗，都唔會縮，因為唔可以；縮即係認錯，有啲制度無論你係乜嘢位，認錯嘅後果都可大可小；大則禍連三代不止，你真係屎都夠膽食，但錯一定唔可以認。

係，就算到今日，乜嘢人民公社、大躍進、三年饑荒，中共都係側側膊，當唔記得就算；總之，就係，死，不，認，錯。

就係咁，成班人明知錯都要錯落去；想講一、兩句真心話？死得。

各位，請唔好嫌我重複，一個好嘅制度，標準係唔會因為一個人嘅錯，令所有人受傷害。

相反，一個壞嘅制度，就算係好人都會變壞人。

唔好期待聖人出現；制度不變，聖人都變衰人。如果制度無問題嘅，偶爾畀條蛋散玩一陣，最多都係茶餘飯後多個人鬧吓。乜嘢二十大，結果合乎預期又好，超出預期又好，無制度轉變，其實邊個做都一樣。

一樣係一錯再錯。